قىرعىزستاندا تيك-توك جەلىسىنىڭ جۇمىسىنا تىيىم سالىنادى

استانا. KAZINFORM - قىرعىزستاننىڭ سيفرلىق دامۋ مينيسترلىگىنە قاراستى بايلانىس سالاسىن رەتتەۋ جانە قاداعالاۋ قىزمەتى ينتەرنەت- پروۆايدەرلەرىنە TikTok الەۋمەتتىك جەلىسىنە كىرۋدى شەكتەۋدى سۇراپ حات جولدادى.

ەسكە سالا كەتەيىك، كەشە اتالعان ۆەدومستۆوعا ەلدىڭ ۇلتتىق قاۋىپسىزدىك مەملەكەتتىك كوميتەتىنەن حات كەلگەن بولاتىن.

وندا TikTok-تىڭ قىرعىزستاندىق سەگمەنتىندە، اتاپ ايتقاندا بالالارعا ارنالعان اقپارات كەڭىستىگىندە «كونتەنت سەنزۋراسىنا جۇيەلى جانە پرينتسيپتى كوزقاراس جوق» دەلىنگەن.

شەنەۋنىكتەر بالالاردىڭ دەنساۋلىعىنا، ولاردىڭ دەنە، رۋحاني جانە ادامگەرشىلىك دامۋىنا زيان كەلتىرۋدىڭ الدىن الۋ شارالارى تۋرالى زاڭعا سىلتەمە جاساپ وتىر.

«قىرعىز رەسپۋبليكاسى ۇكىمەتىنىڭ 2023 -جىلعى 22-قىركۇيەكتەگى № 501 قاۋلىسىمەن بەكىتىلگەن راديوجيىلىك بەلگىلەۋ ەرەجەسىنىڭ 8-تارماعىنا سايكەس بالالاردىڭ دەنساۋلىعىنا، ولاردىڭ ينتەللەكتۋالدىق، پسيحيكالىق، رۋحاني-ادامگەرشىلىك دامۋىنا زيان كەلتىرۋدىڭ الدىن الۋ ماقساتىندا جانە «بايلانىس تۋرالى» زاڭنىڭ 21-1-بابىنىڭ نەگىزىندە ۇلتتىق قاۋىپسىزدىك جونىندەگى مەملەكەتتىك كوميتەتى قىرعىز رەسپۋبليكاسىنىڭ اۋماعىندا TikTok اقپاراتتىق قىزمەتىنە قولجەتىمدىلىكتى شەكتەۋدى جانە 2024 -جىلعى 18- ساۋىرگە دەيىن جازباشا جاۋاپ بەرۋدى سۇرايدى» دەلىنگەن ماتىندە.

ايتا كەتسەك، قىرعىزستاننىڭ مادەنيەت مينيسترلىگى TikTok الەۋمەتتىك جەلىسىن بۇعاتتاۋ تۋرالى ءوتىنىشتى تسيفرلىق دامۋ مينيسترلىگىنە وتكەن جىلدىڭ تامىز ايىنىڭ سوڭىندا جولدادى.

ۆەدومستۆونىڭ اتاپ وتۋىنشە، ءبىرقاتار ۇكىمەتتىك ەمەس ۇيىمدار تاراپىنان بالالاردىڭ پسيحيكالىق دامۋى مەن دەنساۋلىعىنا كەرى اسەر ەتەتىن TikTok الەۋمەتتىك جەلىسىنىڭ زياندى اسەرى تۋرالى الاڭداۋشىلىق بىلدىرگەن وتىنىشتەر كوبەيدى.

بۇل شەشىم قوعامدا دا، ساراپشىلار اراسىندا دا رەزونانس تۋدىردى.

تانىمال الەۋمەتتىك جەلىگە تىيىم سالۋ شاعىن جانە ورتا بيزنەس ماسەلەلەرىن ۋشىقتىرادى، قىرعىز رەسپۋبليكاسىنداعى ءسوز بوستاندىعى مەن دەموكراتياعا نۇقسان كەلتىرەدى، جاستاردىڭ ءوزىن-ءوزى تانىتۋ مۇمكىندىكتەرىن ازايتادى دەگەن پىكىر تارادى.

اۆتور

زارينا تۋعانبايەۆا