قىرعىزستاندا اسقار اقايەۆتىڭ ۋاقىتشا دەپۋتاتتىق كوميسسيا قۇرۋ تۋرالى وتىنىشىنەن باس تارتۋ ۇسىنىلدى

استانا. KAZINFORM - جوگوركۋ كەنەشتىڭ كونستيتۋتسيالىق زاڭناما، مەملەكەتتىك قۇرىلىم، سوت- قۇقىقتىق ماسەلەلەر جانە رەگلامەنت كوميتەتى بۇرىنعى پرەزيدەنت اسقار اقايەۆتىڭ ۋاقىتشا دەپۋتاتتىق كوميسسيا قۇرۋ جانە ەكس- پرەزيدەنت مارتەبەسىن قالپىنا كەلتىرۋ تۋرالى مالىمدەمەسىن قارادى، دەپ جازادى كابار اگەنتتىگى.

كوميتەت ءتوراعاسى چولپون سۇلتانبەكوۆا بۇل ءوتىنىشتىڭ جوگوركۋ كەنەشكە 3 -قىركۇيەكتە تۇسكەنىن ەسكە سالدى.

تالقىلاۋ بارىسىندا دەپۋتات گۋليا قوجوقۇلوۆا بۇل ماسەلەنى جان-جاقتى زەردەلەۋ ءۇشىن ۋاقىتشا دەپۋتاتتىق كوميسسيا قۇرۋ قاجەتتىگىن اتاپ ءوتتى. دەپۋتات جانار اقايەۆ اسقار اقايەۆتىڭ تۇسىندا ەلدە وتباسىلىق- كلاندىق باسقارۋ وركەندەپ، اقسىي وقيعاسى بولعانىن ەسكە الدى.

تالقىلاۋ بارىسىندا كوميتەت ا. اقايەۆتىڭ مالىمدەمەسىن نازارعا الىپ، ونى جوگوركۋ كەنەشتىڭ قاراۋىنا ەنگىزدى، سونداي- اق جوگوركۋ كەنەشكە ا. اقايەۆتىڭ ۋاقىتشا دەپۋتاتتىق كوميسسيا قۇرۋ تۋرالى ءوتىنىشىن قاناعاتتاندىرۋدان باس تارتۋدى ۇسىندى.

اسقار اقايەۆ قىرعىزستان پارلامەنتىنەن ەكس- پرەزيدەنت مارتەبەسىن قايتارۋدى سۇراعانىن جازعان بولاتىنبىز.

اۆتور

ەركەجان سماعۇلوۆا