قىرعىزستان پوليتسەيلەرى قازاقستاندىق ارىپتەستەرىنە 50 توننا گۋمانيتارلىق كومەك جىبەردى

استانا. KAZINFORM - قىرعىز رەسپۋبليكاسىنىڭ ىشكى ىستەر مينيسترلىگى الاپات سۋ تاسقىنىمەن كۇرەسىپ جاتقان قازاقستان رەسپۋبليكاسىنا 50 توننادان استام گۋمانيتارلىق كومەك جىبەردى.

قىرعىز رەسپۋبليكاسى ءى ءى م حابارلاۋىنشا، قازاقستاندىق پوليتسەيلەرگە جىبەرىلگەن گۋمانيتارلىق جۇك قاجەتتى زاتتار، ءدارى- دارمەكتەر، رەزەڭكە ەتىك، ديزەلدى جانە ەلەكتر گەنەراتورلارى، ۇرلەمەلى قايىقتار، شاتىرلار، ماتراستار، تاماق ونىمدەرى، كورپە-جاستىق، توسەك-ورىن تۇرىندە جىبەرىلگەن.

- بۇل باستاما داعدارىس كەزىندە ەكى ەل اراسىنداعى ىنتىماقتاستىقتى قولداۋدىڭ ءبىر بولىگى بولدى. ءبىزدىڭ قازاقستانمەن ىنتىماقتاستىعىمىزدىڭ تاريحى ارىدەن باستالادى جانە مۇنداي ساتتەردە ءبىر-بىرىمىزگە قولداۋ كورسەتۋ ماڭىزدى. بۇل گۋمانيتارلىق كومەك تابيعي اپات سالدارىمەن كۇرەسىپ جاتقاندارعا جەڭىلدىك اكەلىپ، زارداپ شەككەن ايماقتاردى قالپىنا كەلتىرۋگە كومەكتەسەدى دەپ ۇمىتتەنەمىز»، - دەپ اتاپ ءوتتى ۆەدومستۆودان.

ەستەرىڭىزگە سالا كەتەيىك، 6-ساۋىردە قىرعىز رەسپۋبليكاسىنىڭ پرەزيدەنتى سادىر جاپاروۆتىڭ تاپسىرماسىمەن قازاقستاننىڭ سۋ تاسقىنىنان زارداپ شەككەن ايماقتارى ءۇشىن قىرعىزستان باۋىرلاس قازاقستانعا 300 توننا گۋمانيتارلىق جۇك تيەلگەن 15 جۇك كولىگىن جونەلتكەن بولاتىن. 14-ساۋىردە قىرعىزستاندا وندىرىلگەن 150 توننا ءسۇت ونىمدەرىنەن تۇراتىن «جاردەم كەرۋەنى» گۋمانيتارلىق جۇگىنىڭ ەكىنشى پارتياسى جونەلتىلدى.

اۆتور

ەركەجان سماعۇلوۆا