قىرعىزستان «رەكەتير 3» فيلمىن كورسەتۋگە نەگە تىيىم سالدى - «كىرگىزتاسماسى» جاۋابى

استانا. KAZINFORM - «كىرگىزتاسماسى» مەملەكەتتىك كينو ورتالىعى «رەكەتير: جاڭا ۋاقىت» فيلمىنىڭ پروكاتتان الىنۋ سەبەبىن ءتۇسىندىردى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

اتالعان ورتالىق ديرەكتورى تالانتبەك تولوبەكوۆتىڭ دەرەگىنشە، قازاقستاندىق فيلم «بالالاردىڭ دەنساۋلىعىنا، ولاردىڭ فيزيكالىق، زياتكەرلىك، پسيحولوگيالىق، رۋحاني جانە ادامگەرشىلىك دامۋىنا زيان تيگىزۋدىڭ الدىن الۋ شارالارى تۋرالى» قىرعىز زاڭى نەگىزىندە پروكاتتان الىنعان. ويتكەنى، بۇگىندە قىرعىز مەكتەپتەرىندە بوپسالاۋشىلىق دەرەكتەرى جيىلەپ تۇر. وسى جايتتى قاپەرگە العان ورتالىق ماماندارى 2025 -جىلدىڭ 3-اقپانىندا «رەكەتير: جاڭا ۋاقىت» فيلمىنە بەرىلگەن №29 پروكاتتاۋ كۋالىگىن 21-اقپاننان باستاپ قايتارىپ الۋ تۋرالى شەشىم قابىلداعان. تىيىم قىرعىزستانداعى بارلىق كينوتەاترعا مەنشىك نىسانىنا قاراماستان قولدانىلادى.

- سوڭعى ۋاقىتتا ەرەگەس، كوشەدەگى بۇزاقىلىق ارەكەت سالدارىنان بالالاردىڭ ءولىمى جيىلەپ كەتتى. بۇل قالاي دەگەندە دە قوعامىمىزعا، مادەنيەت قايراتكەرلەرىنە ماڭىزدى بەلگى. ءبىز ترانسفورماتسيالانىپ، ءداستۇرلى قۇندىلىقتارىمىزعا بارىنشا ىلگەرىلەۋىمىز قاجەت. وسىنىڭ نەگىزىندە كينو ورتالىق ماماندارى فيلمنىڭ پروكاتتاۋ كۋالىگىن قايتارىپ الۋ تۋرالى شەشىم قابىلدادى، - دەپ تۇسىندىرەدى ول.

ونىڭ اتاپ وتۋىنشە، ورتالىق پروكاتتاۋ كۋالىكتەرىن ءجيى قايتارىپ الادى. بۇل فەستيۆالدەردە كورسەتىلۋگە ۇسىنىلعان، سونىمەن قاتار پروكاتقا شىققان فيلمدەردە تىيىم سالىنعان دۇنيەلەر وتە كوپ بولعان جاعدايدا قولدانىلادى.

- وزدەرىڭىز بىلەتىندەي، وتكەن جىلى تاعى ءبىر قازاقستاندىق تۋىندى - «ءداستۇر» فيلمىنە بەرىلگەن رۇقسات قايتارىپ الىندى. وندا دا تىيىم سالىنعان دۇنيە كوپ بولدى. قازىر ۇرپاقتىڭ بولاشاعىن، ءوسىپ كەلە جاتقان جاستاردىڭ ۇلكەن ەكراننان قۇندىلىقتار جايلى دۇرىس تۇسىنىك العانىن ويلاۋ ماڭىزدى. بۇل تريلوگيا بولعاندىقتان ءمان ماتىنى قيىلىپ قالۋى جانە دۇرىس بەرىلمەۋى مۇمكىن. فيلم جاس ۇرپاقتى تەرىس قىلىققا يتەرمەلەۋى ىقتيمال، - دەدى تالانتبەك تولوبەكوۆ.

ونىڭ ايتۋىنشا، قىرعىزستاندا ۇيىمداسقان قىلمىسپەن كۇرەس بەلسەندى تۇردە جۇرگىزىلىپ جاتىر. وسىعان بايلانىستى قازاقستان كينەماتوگرافيستەرى قىرعىز تاراپىنا رەنجىمەۋى كەرەك.

- ۇيىمداسقان قىلمىسپەن كۇرەس بارلىق باعىتتا جۇرگىزىلىپ جاتىر. تۇسىنىستىك تانىتۋ قاجەت. ءبىز قازاقستان رەجيسسەرى اقان ساتايەۆتى جاقسى كورەمىز ءارى باعالايمىز. ونى قازاقستاننىڭ تالانتتى كينورەجيسسەرلەرىنىڭ ءبىرى سانايمىز. 2023 -جىلى قىرعىز پروكاتىندا قازاقستان فيلمى بولماعانىن اتاپ وتكىم كەلەدى. ال 2024 -جىلى كينو ورتالىقتىڭ باستاماسىمەن قازاقستاننىڭ 9 تۋىندىسى شىقسا، وسى جىلدىڭ باسىنان كورەرمەن نازارىنا 3 فيلم ۇسىنىلدى. قىرعىزستاندا اي سايىن قازاقستان فيلمدەرىنىڭ تۇساۋكەسەرى وتەدى. كورسەتىلىمگە مۇلدەم تىيىم سالىنبايدى، ءبىز ىقپالداستىقتى قولدايمىز. قىرعىز فيلمدەرىنىڭ قازاقستان نارىعىندا تابىسقا جەتىپ جاتقانى قۋانتادى. بۇل جەردە دە كورەرمەن قازاقستان تۋىندىلارىن جىلى قابىلدايدى. قىرعىز بەن قازاق كينوسىنىڭ گۇلدەنۋى ءبىر ۋاقىتقا ساي كەلەدى. ءبىزدىڭ تارلاندارىمىز بەن كلاسسيكتەرىمىز بىرگە جۇمىس ىستەدى. ەكى ەلدىڭ ىقپالداستىق پروتسەسى مۇنان ارى دا دامي تۇسەدى دەپ ويلايمىن، - دەدى كينو ورتالىق ديرەكتورى.

ەسكە سالساق قازاقستان قالالارىندا كينوعا بيلەت قانشا تۇراتىنى تۋرالى جازعان ەدىك.

اۆتور

مارلان جيەمباي