قىرعىزستان مەن قازاقستان اراسىندا ساياسي قايشىلىقتار جوق - جەيەنبەك قۇلۋبايەۆ

بىشكەك. KAZINFORM - قىرعىز رەسپۋبليكاسىنىڭ سىرتقى ىستەر ءمينيسترى جەيەنبەك قۇلۋبايەۆ ق ر سىرتقى ىستەر ءمينيسترى مۇرات نۇرتىلەۋمەن كەزدەسۋ بارىسىندا قىرعىزستان مەن قازاقستان اراسىندا ساياسي قايشىلىقتار جوق ەكەنىن مالىمدەدى. بۇل تۋرالى «كابار» اگەنتتىگى حابارلادى.

«بارلىق وزەكتى ماسەلە مينيسترلەر، پرەمەر- مينيسترلەر جانە مەملەكەت باسشىلارى دەڭگەيىندە كەلىسسوزدەر مەن كەزدەسۋلەر ارقىلى شەشىلەدى»، - دەدى ول.

سونداي- اق جەيەنبەك كۇلۋبايەۆ عاسىرلار بويى سىننان وتكەن قىرعىز-قازاق دوستىعى ورتاق ماقساتقا جەتۋگە، حالىقتاردىڭ ءال-اۋقاتىن ارتتىرۋعا سەپتىگىن تيگىزەتىنىن اتاپ ءوتتى.

«ەجەلدەن ەكى ەلدى تۋىستىق قاتىناستار بايلانىستىرىپ كەلەدى. سوندىقتان ءبىز اتا-بابامىزدان كەلە جاتقان قۇندىلىقتاردى ساقتاپ، ارتتىرۋىمىز كەرەك. تاۋەلسىزدىك جىلدارىندا ەكىجاقتى قارىم-قاتىناستىڭ بەرىك نەگىزىن قالادىق جانە ەكىجاقتى ىرگەلى قۇجاتتارعا قول قويدىق. بۇگىندە ىنتىماقتاستىقتىڭ جوعارى دەڭگەيىنە قول جەتىپ وتىر»، - دەدى ول.

ول مەملەكەت باسشىلارىنىڭ 2022 -جىلعى رەسمي كەلىسسوزدەرىنىڭ قورىتىندىسى بويىنشا قىرعىز-قازاق ديپلوماتيالىق قارىم-قاتىناستارىنىڭ دامۋ ناتيجەلەرىنە جوعارى باعا بەرىلگەنىن ەسكە سالدى. سونىمەن قاتار تاراپتار دوستىق ارىپتەستىكتى ودان ءارى دامىتىپ، ساياسي، ساۋدا-ەكونوميكالىق، سۋ-ەنەرگەتيكالىق جانە گۋمانيتارلىق سالالار بويىنشا وڭ ناتيجەلەرگە قول جەتكىزۋگە ۋاعدالاستى.

كەزدەسۋ سوڭىندا جەەنبەك كۇلۋبايەۆ بۇل كەزدەسۋ ەكى ەل مەن حالىقتاردىڭ مۇددەلەرىن تولىق كورسەتەتىن ىنتىماقتاستىقتىڭ الداعى قادامدارى مەن باعىتىن انىقتاۋعا مۇمكىندىك بەرەتىنىنە سەنىم ءبىلدىردى.

كەلىسسوزدەر قورىتىندىسى بويىنشا، ەكى ەلدىڭ سىرتقى ىستەر مينيسترلەرى 2024-2026 -جىلدارعا ارنالعان ارىپتەستىك باعدارلاماسىنا قول قويدى.

ەستەرىڭىزگە سالساق، ق ر س ءى م باسشىسى مۇرات نۇرتىلەۋ قىرعىزستانعا جەيەنبەك قۇلۋبايەۆتىڭ شاقىرۋىمەن رەسمي ساپارمەن بارعان بولاتىن.

اۆتور

ابىلايحان جۇماشيەۆ