قىرعىزستان مەن پاكىستان سىرتقى ىستەر مينيسترلەرى استانادا كەزدەسەدى
استانا. قازاقپارات- 21-مامىردا استانادا قىرعىزستان مەن پاكىستان سىرتقى ىستەر مينيسترلەرى كەزدەسەدى، دەپ حابارلايدى قىرعىز رەسپۋبليكاسى سىرتقى ىستەر مينيسترلىگىنىڭ باسپا ءسوز قىزمەتى.
«2024 -جىلعى 19-مامىردا قىرعىز رەسپۋبليكاسى سىرتقى ىستەر مينيسترلىگىندە قىرعىز رەسپۋبليكاسى سىرتقى ىستەر ءمينيسترىنىڭ ورىنباسارى اۆازبەك اتاحانوۆ پەن پاكىستان يسلام رەسپۋبليكاسىنىڭ قىرعىز رەسپۋبليكاسىنداعى ەلشىسى حاسان ءالي زايگامنىڭ كەزدەسۋى ءوتتى. ەلشى قىرعىز تاراپىنا اعىمداعى جىلدىڭ 18-مامىرىندا بىشكەكتە شەتەلدىك ستۋدەنتتەردىڭ، سونىڭ ىشىندە پاكىستان ازاماتتارىنىڭ قاتىسۋىمەن وقيعا تۋرالى اقپارات الۋعا كورسەتكەن كومەگى ءۇشىن العىسىن ءبىلدىردى. ا. اتاحانوۆ وقيعانىڭ رەتتەلگەنىن جانە جاعداي قىرعىز رەسپۋبليكاسىنىڭ قۇقىق قورعاۋ ورگاندارىنىڭ تولىق باقىلاۋىندا ەكەنىن، بارلىق قاتىسى بارلارعا قاتىستى تەرگەۋ ءجۇرىپ جاتقانىن اتاپ ءوتتى»، - دەپ حابارلادى ۆەدومستۆو.
تاراپتار قىرعىز رەسپۋبليكاسىنىڭ سىرتقى ىستەر ءمينيسترى جەەنبەك قۇلۋبايەۆ پەن پاكىستان پرەمەر- ءمينيسترىنىڭ ورىنباسارى - سىرتقى ىستەر ءمينيسترى موحامماد يسحاك داردىڭ كەزدەسۋىن 21-مامىردا استانادا وتەتىن ش ى ۇ سىرتقى ىستەر مينيسترلەرى كەڭەسى اياسىندا ۇيىمداستىرۋعا كەلىستى.
18 -مامىردا بىشكەكتە شەتەلدىكتەر قاتىسقان جاپپاي توبەلەس بولدى. ول 13-مامىردا جاتاقحانا قوناقتارى اراسىنداعى توبەلەستەن باستالعان.
كەيىن قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ ءتوراعاسى كامچىبەك تاشيەۆ بىشكەكتەگى تۇنگى وقيعاعا قاتىستى تۇسىنىكتەمە بەردى. وقيعا سالدارىنان 29 ادام مەديتسينالىق كومەككە جۇگىنسە، ونىڭ 15- ءى ەل استاناسىنىڭ ەمدەۋ مەكەمەلەرىنە جەتكىزىلدى.
قىرعىز رەسپۋبليكاسىنىڭ مينيسترلەر كابينەتى بىشكەكتەگى تۇنگى وقيعادان كەيىن مالىمدەمە جاساپ، وندا ۇلتارالىق زورلىق- زومبىلىق پەن تارتىپسىزدىك تۋدىرۋ ارەكەتتەرىن قاتاڭ ايىپتادى.
پاكىستان پرەمەر- ءمينيسترى شاحباز شاريف بىشكەكتە شەتەلدىك ازاماتتارعا قاتىستى وقيعاعا الاڭداۋشىلىق ءبىلدىردى.
قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى قىرعىزستاننان قازاقستانعا كەتۋدى جوسپارلاپ وتىرعان شەتەلدىك ستۋدەنتتەر تۋرالى اقپاراتتى جوققا شىعاردى.
اۆتور
زارينا تۋعانبايەۆا
