قىرعىزستان كولەڭكەلى ەكونوميكامەن كۇرەسكە بەت بۇردى - ساراپشى

سوڭعى اپتادا قىرعىزستاندىق كاسىپكەرلەردىڭ ەلدەگى سالىق وزگەرىستەرىنە قارسى نارازىلىقتارى جيىلەدى. قىرعىز ساياساتتانۋشىسى باقىت باكەتايەۆ Kazinform تىلشىسىنە بەرگەن سۇحباتىندا ەلدە جۇرگىزىلىپ جاتقان سالىق رەفورماسى، سونداي- اق ساۋداگەرلەردىڭ جاڭا سالىق رەجيمىن ەنگىزۋمەن كەلىسپەۋىنىڭ سەبەپتەرى تۋرالى ايتتى.

ساراپشى پرەزيدەنت سادىر جاپاروۆ باسقاراتىن جاڭا بيلىك سىبايلاس جەمقورلىق جانە كولەڭكەلى ەكونوميكامەن كۇرەسۋدىڭ جاڭا باعىتىن بەلگىلەگەنىن ايتادى.

- بيىلعى جىلدىڭ باستى جەتىستىگى سالىق كولەمىن بەس ەسە ارتتىرۋ بولدى. جەلتوقسانعا قاراي قىرعىزستاننىڭ ج ءى ءو 1 تريلليون سومنان استى، - دەدى ساياساتتانۋشى.

باقىت باكەتايەۆتىڭ پىكىرىنشە، وتكەن 30 جىل ىشىندە قىرعىزستان ازاماتتارى باي كەدەي ەلگە اينالدى. بۇعان جان باسىنا شاققانداعى قىمبات اۆتوموبيلدەر، ەليتالىق ۇيلەر، تۋريستىك ساپارلار جانە باسقا دا برەندتىك زاتتار ستاتيستيكاسى دالەل بولا الادى.

- رەسمي دەرەككە سۇيەنسەك، ەلدىڭ جان باسىنا شاققانداعى جالپى ىشكى ءونىمى 1200 دوللاردان اسادى. سونىمەن قاتار، كولەڭكەلى قارجى اعىندارىن ەسكەرسەك، بۇل كورسەتكىشتى شامامەن بەسكە كوبەيتۋگە بولادى. قىرعىزستاندا كوپ جىلدار بويى ءىرى كوتەرمە جەتكىزۋشىلەر تاراپىنان نارىققا جەتكىزىلەتىن تاۋار كولەمى مەن بولشەك ساۋدادا ساتىلاتىن تاۋار كولەمىنىڭ اراسىندا ۇلكەن ايىرماشىلىق بار، - دەدى ول.

ساياسات تانۋشى ساۋدا- ساتتىق قىزمەتىنە كاسسالىق باقىلاۋ ماشينالارىن ەنگىزۋدى جويۋ - وتكەنگە ورالۋمەن بىردەي دەپ ەسەپتەيدى. الەمنىڭ بارلىق دامىعان ەلدەرىندە تاۋارلار قوزعالىسىن ەسەپكە الۋ كاسسالىق باقىلاۋ ماشينالارى ارقىلى جۇزەگە اسىرىلادى، ودان باسقا ءادىستى الەم ءالى ويلاپ تاپقان جوق. وسىعان بايلانىستى قىرعىزستاننىڭ مينيسترلەر كابينەتى مەملەكەتتىڭ كولەڭكەلى ەكونوميكاسىن جارىققا شىعارۋ بويىنشا تۇراقتى جۇمىس جۇرگىزۋدە.

- ۇكىمەت كاسىبىن جاڭا باستاعاندارعا، شاعىن جانە ورتا بيزنەسمەندەرگە سەگىز ميلليون سوم اينالىمعا دەيىنگى پاتەنتپەن جۇمىس ىستەۋگە مۇمكىندىكتەر بەرەدى، ءتىپتى كاسسالىق باقىلاۋ ماشينالارىن پايدالانعان جاعدايدا نولدىك مولشەرلەمە بار، الايدا نارىقتىڭ بەلگىلى نەمەسە كوپتەگەن ءىرى قاتىسۋشىلارى ناقتى قارجى اعىندارىن كورسەتكىسى كەلمەيدى. ەلدە بارلىق باعىتتا اۋقىمدى رەفورمالار ءجۇرىپ جاتىر، بۇل جاعدايدا ەكونوميكاعا كەرى اسەرىن تيگىزۋشى ءبىراز كاسىپ يەلەرى انىقتالۋى ءتيىس، - دەدى ساراپشى.

ەستەرىڭىزگە سالا كەتەيىك، قىرعىزستاندا قاراشا ايىنىڭ سوڭىنان باستاپ بۇكىل ەل بويىنشا جاڭا سالىق رەجيمىنە قارسى ساۋداگەرلەر ميتينگىلەرى وتۋدە. كەشە ەل پرەزيدەنتى سادىر جاپاروۆ ءىرى «دوردوي» بازارىنىڭ ساۋدا ورىندارى يەلەرىنىڭ ميتينگىسىنە قاتىسىپ، كاسىپكەرلەر ءۇشىن ساۋدا سالاسىنداعى پاتەنتتىك جۇيە 2024 -جىلدىڭ شىلدەسىنە دەيىن ۇزارتىلاتىنىن مالىمدەدى.

اۆتور

ەركەجان سماعۇلوۆا