قىرعىزستان پارلامەنتىنىڭ ءتوراعاسى ق ر پرەزيدەنتى تەلەراديوكەشەنىندە بولدى
استانا. KAZINFORM - قازاقستانعا رەسمي ساپارى اياسىندا قىرعىز رەسپۋبليكاسى جوگوركۋ كەنەشىنىڭ ءتوراعاسى نۋرلانبەك تۋرگۋنبەك ۋۋلۋ قازاقستان رەسپۋبليكاسى پرەزيدەنتىنىڭ تەلەراديوكەشەنىنە كەلدى.
جوگوركۋ كەنەش سپيكەرى مەديا قۇرىلىمنىڭ قىزمەتىمەن تانىسىپ، Jibek Joly تەلەارناسىنىڭ ستۋدياسىن ارالادى. تەلەراديوكەشەننىڭ نەگىزگى جۇمىس باعىتتارى تۋرالى اقپارات بەرىلدى. سونداي- اق Silk Way Central Asia حالىقارالىق مەدياجوباسى تانىستىرىلدى.
بۇل جوبانىڭ ماقساتى - ورتالىق ازيادا ءبىرىڭعاي اقپاراتتىق كەڭىستىك قالىپتاستىرۋ جانە ءوڭىر ەلدەرىنىڭ مۇددەلەرىن جاھاندىق مەديا الاڭىندا ىلگەرىلەتۋ.
Silk Way تەلەارناسى التى تىلدە حابار تاراتادى: قازاق، قىرعىز، ورىس، اعىلشىن، وزبەك جانە تۇرىك تىلدەرىندە. سونىمەن قاتار، كونتەنت تاجىك جانە تۇرىكمەن اۋديتورياسىنا بەيىمدەلەدى. حابار تاراتۋ گەوگرافياسى ءتورت قۇرلىقتاعى 120 ەلدى قامتىپ، 300 ميلليون استام الەۋەتتى كورەرمەندى قامتيدى.
جوبا اياسىندا New Time دەگەن اتاۋمەن ورتالىق ازياداعى ماڭىزدى وقيعالارعا اپتالىق شولۋ، سونداي-اق Success Stories of Central Asian Women - ايماقتاعى تابىستى ايەلدەر تۋرالى تەلەحيكايالار سياقتى باعدارلامالار اعىلشىن تىلىندە شىعىپ جاتىر.
الداعى ۋاقىتتا قىرعىزستان، وزبەكستان، تۇرىكمەنستان جانە تاجىكستاننىڭ ۇلتتىق تەلەكومپانيالارىمەن كونتەنت الماسۋ جانە سەرىكتەستىكتى نىعايتۋ كوزدەلىپ وتىر.
ايتا كەتسەك، بۇعان دەيىن باس ديرەكتورى ۆۋ ۆەت ترانگ باستاعان ۆەتنام اقپارات اگەنتتىگىنىڭ (VNA) دەلەگاتسياسى ق ر پرەزيدەنتى تەلەراديوكەشەنىنىڭ كەڭسەسىندە بولىپ قايتتى.
اۆتور
گۇلنۇر عازيز قىزى
