قىرعىزستان پارلامەنتى ەل تۋىن وزگەرتۋ تۋرالى زاڭ جوباسىن ماقۇلدادى

قىرعىزستاندا جوگوركۋ كەنەشتىڭ كونستيتۋتسيالىق زاڭناما، مەملەكەتتىك قۇرىلىم، سوت- قۇقىقتىق ماسەلەلەر جانە رەگلامەنت جونىندەگى كوميتەتى «قىرعىز رەسپۋبليكاسىنىڭ مەملەكەتتىك رامىزدەرى تۋرالى» قىرعىز رەسپۋبليكاسىنىڭ زاڭىنا وزگەرىستەر ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

قىرعىز رەسپۋبليكاسىنىڭ مەملەكەتتىك سيمۆولىنا وزگەرىس ەنگىزۋ تۋرالى ۇسىنىس تاستاعان - سپيكەر نۋرلانبەك شاكيەۆ پەن دەپۋتات ۋلان پريموۆ. ولاردىڭ سوزىنشە، قازىر تۋدىڭ ورتاسىنداعى كۇن ساۋلەسى مەن تۇندىك تۇرلىشە قابىلدانادى. بىرەۋلەر ونى كۇنباعىسقا ۇقساتسا، ەندى ءبىرى كيىز ءۇي بولىگى رەتىندە كورەدى.

دەپۋتات ۋلان پريموۆ ارىپتەستەرىنەن زاڭ جوباسىنىڭ تۇجىرىمداماسىن قولداۋدى سۇراپ، مەملەكەتتىك رامىزدەرگە وزگەرىستەر ەنگىزەتىن جالعىز ەل قىرعىزستان ەمەس ەكەنىن اتاپ ءوتتى. ونىڭ ايتۋىنشا، تۋ بەينەلەنگەن بارلىق قاجەتتى قۇجاتتارعا وزگەرتۋلەر بىردەن ەنگىزۋدىڭ قاجەتى جوق، ولاردى كەزەڭ- كەزەڭىمەن ەنگىزۋگە بولادى.

قىرعىز رەسپۋبليكاسىنىڭ تۋىنداعى كۇن ساۋلەسىنىڭ جاڭا نوبايىن جاساۋ ءۇشىن وسى تۋدى باستاپقى كەزەڭدە جاساۋشى اۆتورلار جۇمىلدىرىلدى. ولار ماتەماتيكالىق ەسەپتەۋ، سىزبالار جانە سوعان بايلانىستى جۇمىستار جۇرگىزدى. اۆتورلاردىڭ ءبىرى ءجۇسىپ ماتايەۆتىڭ اتاپ وتۋىنشە، باستاپقى نۇسقا وزگەرىسكە ۇشىراعان - العاشقىدا كۇن ساۋلەسىن انىق ەسكە تۇسىرەتىن ءپىشىن ۇسىنىلدى. تۋدىڭ تاعى ءبىر اۆتورى ەديل ايداربەكوۆ تۋدىڭ جاڭا نۇسقاسىن قاراستىرعاندا كۇن ساۋلەسىنىڭ بەينەسى عىلىمي تۇرعىدان قاراستىرىلماعانىن ايتتى.

سونداي- اق تالقىلاۋ بارىسىندا دەپۋتات داستانبەك دجۋمابەكوۆ تۋدىڭ جەكەلەگەن ەلەمەتتەرىن وزگەرتۋ ماسەلەسىن رەفەرەندۋمعا شىعارۋدى ۇسىندى. حالىق دەپۋتاتى نۇرلانبەك ازىگاليەۆ مەملەكەتتىك رامىزدەردى وزگەرتپەۋ كەرەك دەپ ايتۋعا بولمايتىنىن ايتتى. دەپۋتات مەيكينبەك ابداليەۆتىڭ پىكىرىنشە، قىرعىزستان ازاماتتارىنىڭ پىكىرىن ەسكەرۋ قاجەت. بۇل رەتتە تۋدى تۇزەتۋگە باستاماشى بولعان ۋلان پريموۆ وسىدان 32 جىل بۇرىن تۋدى رەفەرەندۋم ەمەس، پارلامەنت بەكىتكەنىن باسا ايتتى.

ەسكە سالا كەتسەك، قىرعىزستان پرەزيدەنتى سادىر جاپاروۆ بۇل باستامانى قولدايتىنىن ءبىلدىردى. سونداي- اق مەملەكەتتىك رامىزدەگى كۇن ساۋلەسىنىڭ وزگەرۋىن قىرعىز رەسپۋبليكاسىنىڭ ۇلتتىق قاۋىپسىزدىك جونىندەگى مەملەكەتتىك كوميتەتىنىڭ باسشىسى كامچىبەك تاشيەۆ تە قولداپ، بۇل تۋرالى Facebook پاراقشاسىندا جازدى.

اۆتور

زارينا تۋعانبايەۆا