قىرعىزستان ەنەرگەتيكالىق سۋسىندارعا تىيىم سالۋى مۇمكىن

جاپاروۆ قانت پەن كوفەينگە باي سۋسىنداردى جۇيەلى تۇردە تۇتىنۋ جاس ۇرپاق اعزاسىنا اۋىر زيان كەلتىرەتىنىن، جۇرەك تالماسىنا، قانت ديابەتىنە جانە بۇيرەك اۋرۋلارىنا اكەپ سوقتىراتىنىن اتاپ ءوتتى. سونىڭ سالدارىنان مەملەكەت ازاماتتاردىڭ ەمدەلۋىنە وراسان زور قاراجات جۇمسايدى.

ونىڭ مالىمەتتەرى بويىنشا، 2025 -جىلى ەل تۇرعىندارى شامامەن 54,2 ميلليون ليتر نەمەسە 129 ميلليون بانكا تۇرمىستىق ەنەرگەتيكالىق سۋسىنداردى تۇتىنعان. ءارى بۇل كورسەتكىش ۇدايى ءوسىپ بارادى. 2026 -جىلدىڭ ءبىرىنشى جارتىسىنىڭ وزىندە 36,8 ميلليون ليترگە (86 ميلليون بانكا) جەتتى.

قىرعىزستان باسشىسىنىڭ ايتۋىنشا، حالىقتىڭ دەنساۋلىعى ءۇشىن بيلىك سانالى تۇردە شەشۋشى قادامدار جاساۋعا جانە وسى سالادان تۇسەتىن 1,5 ميلليارد سوم سالىقتان باس تارتۋعا دايىن.

نۇسقاۋلىققا سايكەس، مينيسترلەر كابينەتى ءبىر اي ىشىندە ەنەرگەتيكالىق سۋسىنداردىڭ يمپورتىن، ولاردى ءوندىرۋ مەن ساتۋدى شەكتەۋ ماسەلەسىن مۇقيات زەرتتەۋى كەرەك. التى اي ىشىندە ول زاڭناما اياسىندا ءتيىستى رەتتەۋ شارالارىن قابىلداۋى كەرەك.

ەسكە سالا كەتەيىك، قازاقستاندا 21 جاسقا تولماعاندارعا ەنەرگەتيكالىق سۋسىن ساتۋعا قاتاڭ تىيىم سالىنعان.

2026 -جىلدىڭ 1-قاڭتارىنان باستاپ قازاقستانداعى ەنەرگەتيكالىق سۋسىندار اكسيزدەلگەن تاۋارلار تىزىمىنە ەنگىزىلدى، اكسيزدىك سالىق مولشەرلەمەلەرىن كەزەڭ-كەزەڭىمەن ەنگىزۋ كوزدەلگەن.