قىرعىز ەلىنەن باتىس قازاقستان وبلىسىنا 80 توننا گۋمانيتارلىق جۇك جەتكىزىلدى
ورال. KAZINFORM - باۋىرلاس قىرعىز ەلىنەن باتىس قازاقستان وبلىسىنا 80 توننا گۋمانيتارلىق جۇك جەتكىزىلدى.
ورال قالاسىنداعى سالتانات سارايىنىڭ جانىنا كەلىپ توقتاعان جۇك كولىكتەرىن اق جايىق جۇرتشىلىعى قارسى الدى.
باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ 3 مىڭنان استام شاقىرىم جول ءجۇرىپ كەلگەن قىرعىز اعايىنعا ريزاشىلىعىن ءبىلدىردى.
«قىرعىز باۋىرلارىمىز قازاق ەلىندە بولىپ جاتقان وسىنداي سىن ساعاتتا العاشقى بولىپ كومەك قولىن سوزدى. قازاق دالاسىنا 300 توننا حالىقارالىق گۋمانيتارلىق كومەك جەتكىزىلدى. وسىعان وراي باتىس قازاقستانعا كەرۋەندى باستاپ كەلگەن قىرعىزستان توتەنشە جاعدايلار مينيسترلىگىنىڭ وكىلى زاميربەك مىرزاعا، بارلىق جۇرگىزۋشىگە العىسىمىزدى ايتامىز. قازاق- قىرعىز ءبىر تۋعان، ءتىلىمىز ءبىر، ءدىلىمىز ءبىر، ءدىنىمىز ءبىر. وسى باۋىرلاستىعىمىز ماڭگىلىك جالعاسا بەرسىن!» دەگەن باقىتجان حابەر ۇلى گۋمانيتارلىق جۇكتى باستاپ كەلگەن زاميربەك نارچايەۆقا «قىرعىز ەلىنە باتىس قازاقستان حالقىنىڭ اتىنان مىڭ العىس» دەگەن جازۋى بار دومبىرانى تارتۋ ەتتى.
قىرعىز رەسپۋبليكاسى ت ج مينيسترلىگىنىڭ وكىلى، پودپولكوۆنيك ز. نارچايەۆ ورال قالاسىنا 28 ادام كەلسە، سونىڭ 18- ءى جۇرگىزۋشى، 8- ءى قۇتقارۋشى ەكەنىن جەتكىزدى.
«پرەزيدەنتىمىزدىڭ تاپسىرماسىنا سايكەس قىرعىزستان ەلىنەن جەتكىزىلگەن 300 توننادان استام گۋمانيتارلىق كومەك قازاقستاننىڭ ءتورت وبلىسىنا ءبولىندى. ورال قالاسىنا سونىڭ 80 توننادايىن جەتكىزدىك. جۇك كولىكتەرىنە ازىق-تۇلىك، توسەك-ورىن، كەرۋەت سەكىلدى تۇرمىسقا ءبىرىنشى كەزەكتە قاجەتتى زاتتار تيەلگەن»، - دەدى زاميربەك نارچايەۆ.
اۆتور
عايساعالي سەيتاق
