قوستانايدا كاسىپورىن شەنەۋنىكتەرمەن سىبايلاسىپ، 3 ميلليارد تەڭگە سۋبسيديانى جىمقىرعان

قوستاناي. KAZINFORM - قارجى مونيتورينگى اگەنتتىگى قوستاناي وبلىسىندا BEEF EXPORT GROUP ج ش س ەت وڭدەۋ كاسىپورنى ديرەكتورىنىڭ باسشىلىعى ۇيىمداستىرعان قىلمىستىق توپقا قاتىستى تەرگەۋدى اياقتادى.

اتالعان ادامدار ۇزاق ۋاقىت بويى ق ر اگروونەركاسىپ كەشەنىن دامىتۋ ۇلتتىق جوباسى شەڭبەرىندە مەملەكەت سۋبسيديا رەتىندە بولگەن بيۋدجەت قاراجاتىن ۇرلاۋمەن اينالىسىپ، مەملەكەتكە 3 ميلليارد تەڭگەدەن استام شىعىن كەلتىرگەن.

تەرگەۋ بارىسىندا كۇدىكتىلەردەن 107 ميلليون تەڭگە وتەلىپ، 3,1 ميلليارد تەڭگە مۇلكىنە تىيىم سالىندى.

قىلمىستىق سحەماعا 49 ادام تارتىلعان، ونىڭ 13 - ۇيىمداسقان توپتىڭ مۇشەلەرى.

ولارعا سۋبسيديا جىمقىرۋ، سالىق تولەۋدەن جالتارۋ، زاڭسىز كاسىپكەرلىك قىزمەت، قىلمىستىق جولمەن الىنعان مۇلىكتى زاڭداستىرۋ، لاۋازىمدى تۇلعالارعا پارا بەرۋ جانە قۇجاتتاردى قولدان جاساۋ سەكىلدى بىرنەشە ايىپ تاعىلعان.

ۇيىمداسقان توپتىڭ باسشىسى ءوز باقىلاۋىنداعى كومپانيانىڭ قىزمەتىنە سالىقتىق تەكسەرۋ جۇرگىزگەن مەملەكەتتىك قىزمەتشىگە زورلىق-زومبىلىق جاسادى دەپ كۇدىككە ءىلىنىپ وتىر.

سونداي-اق، قوستاناي، اقتوبە، سولتۇستىك قازاقستان، پاۆلودار جانە باتىس قازاقستان وبلىستارىنىڭ 30 شارۋا قوجالىقتىڭ باسشىلارى مەن وكىلدەرى ءىس بويىنشا كۇدىكتى دەپ تانىلدى.

بۇدان باسقا، سوتقا دەيىنگى تەرگەۋ شەڭبەرىندە قوستاناي وبلىسى اكىمدىگىنىڭ اۋىل شارۋاشىلىعى باسقارماسىنىڭ 3 لاۋازىمدى تۇلعاسىنا اقشا ۇرلاۋعا جانە پارا الۋعا جاردەمدەستى دەگەن ايىپ تاعىلدى.

7 ۆەتەرينار دارىگەرگە قۇجاتتاردى قولدان جاساعانى، اقپاراتتىق جۇيەگە كورىنەۋ جالعان اقپارات ەنگىزگەنى، سونداي-اق زاڭسىز سىياقىلار العانى ءۇشىن ايىپ تاعىلدى.

قازىرگى ۋاقىتتا تاراپتار قىلمىستىق ءىس ماتەريالدارىمەن تانىسىپ جاتىر.

اۆتور

جانات قاپالبايەۆا