قوستاناي وبلىسىنداعى اۋىل ىشىمدىكتەن باس تارتتى

قوستاناي. KAZINFORM - اۋليەكول اۋدانىنداعى كوكتال اۋىلىنىڭ تۇرعىندارى ءبىراۋىزدان ىشىمدىكتەن باس تارتۋ تۋرالى شەشىم قابىلدادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

Қостанай облысындағы ауыл ішімдіктен бас тартты
Фото: Әулиекөл ауданының әкімдігі

اۋليەكول اۋدانىنىڭ اكىمدىگى كوكتالدىڭ وزگە اۋىلدارعا ۇلگى بولا الاتىنىن ءتۇسىندىردى. ونىڭ ۇستىنە سوڭعى ءۇش جىلدا مۇندا بىردە-ءبىر زاڭ بۇزۋشىلىق تىركەلگەن جوق. اقساقالدار باعدارلامانىڭ وسى وڭ ديناميكانى ساقتاۋعا كومەكتەسەتىنىن اتاپ ءوتتى.

الكوگولسىز اۋىل بولۋ يدەياسى حالىقتىڭ بارلىق توبى اراسىندا قولداۋ تاپتى. شارۋالار، مەديتسينا قىزمەتكەرلەرى مەن مۇعالىمدەر بەلسەندىلەردىڭ دالەلدەرىمەن كەلىستى. كەنتتە بارلىعى 519-عا جۋىق ادام تۇرادى.

بيزنەسكە كەلسەك، كاسىپكەرلەر الكوگولدىك ىشىمدىكتەرگە بەرىلەتىن ليتسەنزيادان ءبىراۋىزدان باس تارتتى - ولار الكوگولدى اكەلمەيدى جانە ساتپايدى. اۋىلدا استىرتىن دۇكەندەر جوق.

- بىرنەشە جىلدان بەرى اۋىلدا ىشىمدىك ىشكەن ەشكىم جوق، بارلىق ءىس-شارالار ىشىمدىكسىز وتكىزىلەدى. كاسىپكەرلەردىڭ وزدەرى سۇرانىس بولماعان سوڭ، مۇنداي زاتتاردى ساتۋ ءتيىمدى ەمەس دەيدى، - دەپ باياندادى اكىمدىكتە.

بيلىك سالاۋاتتى چەللەندجدى ايماقتاعى باسقا ەلدى مەكەندەر دە قولعا الاتىنىنا ۇمىتتەنەدى.

بۇعان دەيىن تۇركىستان وبلىسىندا 30-عا جۋىق اۋىل ىشىمدىكتەن باس تارتقانى بەلگىلى بولدى.

بىلتىر ماڭعىستاۋ وبلىسى ءتۇپقاراعان اۋدانىنىڭ اكىمى تاۋشىق اۋىلىن «الكوگولسىز اۋىلعا» اينالدىرۋدى ۇسىندى.

ال اباي وبلىسىندا ءبىر اۋىل الكوگولدەن تولىقتاي باس تارتتى.

اۆتور

زارينا تۋعانبايەۆا

سوڭعى جاڭالىقتار