قوسشىدا سالىق ورگانىنىڭ قىزمەتكەرى بىرنەشە رەت ينتەرنەت-الاياقتىق جاساعان
كوكشەتاۋ. KAZINFORM - قوسشى قالاسىنىڭ پروكۋراتۋراسىنىڭ ۇيلەستىرۋىمەن سالىق ورگانىنىڭ قىزمەتكەرى جاساعان 5 ينتەرنەت-الاياقتىق قىلمىس اشىلدى.
اقمولا وبلىسى پروكۋراتۋراسى باسپا ءسوز قىزمەتىنىڭ مالىمەتىنشە، سالىق ورگانىنىڭ قىزمەتكەرى قاراپايىم ازاماتتاردى دەكلاراتسيا تاپسىرۋ قاجەتتىگىن سىلتاۋراتىپ شاقىرىپ، ولاردىڭ جەكە جانە بيومەتريالىق (ادامنىڭ بەت-الپەتىن سايكەستەندىرۋ) دەرەكتەرىن ءوزىنىڭ ۇيالى تەلەفونىنا ءتۇسىرىپ، ونلاين تۇرىندە جابىرلەنۋشىلەرگە ميكرو-نەسيەلەر راسىمدەپ ءوزىنىڭ شوتتارىنا اۋدارعان.
«پروكۋراتۋرانىڭ نۇسقاۋلارىن ورىنداۋ بارىسىندا الاياق انىقتالىپ، ق ر قىلمىستىق كودەكسىنىڭ 190-بابىمەن (الاياقتىق) قىلمىستىق جاۋاپقا تارتىلدى»، - دەدى ۆەدومستۆودان.
وسى رەتتە، پروكۋراتۋرا قىزمەتكەرلەرى ازاماتتاردى بارلىق اقپاراتتاردى جان-جاقتى تەكسەرىپ، بەيتانىس ادامداردىڭ ونلاين رەجيمىندە ءتۇرلى قارجىلىق وپەراتسيالارىن جۇرگىزۋ تۋرالى ۇسىنىستارىنان ساق بولۋعا شاقىرادى.
ايتا كەتسەك، بۇدان بۇرىن وكىلەتتىكتى اسىرا پايدالانعان اكىم مەن الاياقتىق جاساعان مەردىگەر سوتتالعانىن جازعان ەدىك.
اۆتور
اسلان وسپانوۆ
