قوسشىدا 500 ءۇي ءسىبىر جاراسى كومىلگەن جەرگە جاقىن سالىنعان: قاۋىپ بار ما

قالا اكىمدىگى مەن وبلىستىڭ باس ۆەتەرينار دارىگەرى قاۋىپتى نىساننىڭ قاي جەردە ورنالاسقانىن جانە نەلىكتەن جەرگىلىكتى تۇرعىندارعا قاۋىپ توندىرمەيتىنىن ءتۇسىندىردى، دەپ حابارلايدى Kazinform اگەنتتىگىنىڭ ءتىلشىسى.

الەۋمەتتىك جەلىلەردە قوسشى قالاسىنىڭ «تازا بۇلاق» اۋدانىنداعى 500-گە جۋىق ءۇي ءسىبىر جاراسى كومىلگەن ورىننىڭ ۇستىنە سالىنعانى تۋرالى اقپارات تارالىپ، جەرگىلىكتى تۇرعىنداردى الاڭداتتى.

وسىعان بايلانىستى قوسشى قالاسىنىڭ اكىمدىگى تۇسىنىكتەمە بەردى.

— قوسشى قالاسىنىڭ «تازا بۇلاق» اۋدانىندا تاريحي ەسەپكە الىنعان نىسان بار، ول تۋرالى مالىمەتتەر ەسەپ قۇجاتتارىندا كورسەتىلگەن. قولدا بار دەرەكتەرگە سايكەس، بۇل وشاق 1986 -جىلعى 28 -تامىزدا تىركەلگەن. اتالعان اۋماق اۋرۋ مالدىڭ ۇشاسىن مۇشەلەگەن ورىن بولعان، — دەپ حابارلادى اكىمدىك.

الايدا بۇل نىساننىڭ سانيتاريالىق- قورعاۋ ايماعىنا قاتىستى ماسەلەنىڭ وزىندىك قۇقىقتىق تاريحى بار. بۇعان دەيىن سانيتاريالىق- قورعاۋ ايماعى 2010 جانە 2014 -جىلدارى سەلينوگراد اۋدانى اكىمدىگىنىڭ قاۋلىلارىمەن بەلگىلەنگەن. 2021 -جىلى بۇل قاۋلىلار قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ ەرەجەلەرىن ەسكەرە وتىرىپ، پروكۋراتۋرانىڭ شەشىمىمەن كۇشىن جويعان.

— سانيتاريالىق-ەپيدەميولوگيالىق سالاماتتىلىق سالاسىندا مەملەكەتتىك باقىلاۋ مەن قاداعالاۋدى جۇزەگە اسىراتىن لاۋازىمدى تۇلعالارعا قولدانىستاعى نىساندار ءۇشىن الدىن الا سانيتاريالىق- قورعاۋ ايماقتارىن بەلگىلەۋ، ولاردىڭ كولەمىن ايقىنداۋ جانە بەلگىلەنگەن كولەمىن وزگەرتۋ وكىلەتتىگى بەرىلگەنى انىقتالدى، — دەپ ءتۇسىندىردى اكىمدىكتەگىلەر.

قوسشى قالاسى اكىمدىگىنىڭ مالىمەتىنشە، قازىرگى ۋاقىتتا اتالعان اۋماققا ىرگەلەس جەردە 500-دەن استام تۇرعىن ءۇي ورنالاسقان. سونىمەن قاتار 2021 -جىلدان بەرى قوسشى قالاسى مەن تايتوبە اۋىلىنداعى وسى نىساننىڭ سانيتاريالىق- قورعاۋ ايماعى شەگىندە تۇرعىن ءۇي سالۋعا، جەكە قوسالقى شارۋاشىلىق جۇرگىزۋگە، باۋ-باقشا وسىرۋگە جانە كوممەرتسيالىق نىساندار ورنالاستىرۋعا جەر تەلىمدەرى بەرىلمەگەن.

— قوسشى قالاسىنداعى ءسىبىر جاراسى كومىلگەن ورىننىڭ شارتتى اۋماعى كولەمى 3 × 5,5 مەتر بولاتىن بەتون ساركوفاگپەن قورشالعان. قورشاۋعا «ءسىبىر جاراسى» دەگەن جازۋى بار تاقتايشا ورناتىلعان. جەر ۋچاسكەسى 2017 -جىلعى 31 -مامىرداعى № ا ن 0236029 تۇراقتى جەر پايدالانۋ قۇقىعىن بەرۋ تۋرالى اكتىنىڭ نەگىزىندە زاڭدا بەلگىلەنگەن تارتىپپەن راسىمدەلگەن. ءتيىستى مالىمەتتەر قازاقستان رەسپۋبليكاسىنىڭ مەملەكەتتىك جەر كاداسترىنىڭ اۆتوماتتاندىرىلعان اقپاراتتىق جۇيەسىنە ەنگىزىلگەن. اقمولا وبلىسىنىڭ سانيتاريالىق- ەپيدەميولوگيالىق باقىلاۋ دەپارتامەنتى سانيتاريالىق جاعدايى قولايسىز ەلدى مەكەندەر اۋماعىنداعى بەلگىلى ءسىبىر جاراسى كومىلگەن ورىندارعا جىل سايىن مونيتورينگ جۇرگىزىپ، توپىراق سىنامالارىن الادى. زەرتحانالىق زەرتتەۋلەردىڭ ناتيجەلەرى تەرىس، — دەپ تولىقتىردى ۆەدومستۆو وكىلدەرى.

اقمولا وبلىسى ۆەتەريناريا باسقارماسىنىڭ باسشىسى تالعات ءجۇنىسوۆتىڭ ايتۋىنشا، تايتوبە مەن قوسشى اۋماعىندا ءسىبىر جاراسى كومىلگەن ەكى ورىن بار.

— قوسشى قالاسىنىڭ اۋماعىندا 1986 -جىلى پايدا بولعان ءسىبىر جاراسى كومىلگەن ورىن بار. ول سارقىراما وزەنىنىڭ ماڭىندا، تۇرعىن ۇيلەردەن 40- 50 مەتر قاشىقتىقتا جانە «تازا بۇلاق» دەمالىس ايماعىنا جاقىن ورنالاسقان. كەزىندە بۇل جەردە مالدىڭ ۇشاسى مۇشەلەنىپ، تەرىسى كومىلگەن. كەيىن مالدىڭ ءسىبىر جاراسىمەن اۋىرعانى انىقتالعان. ۆەتەريناريالىق قىزمەت وسى ورىندى ءسىبىر جاراسى كومىلگەن جەر رەتىندە بەلگىلەگەن. 2021 -جىلى ول جەرگە بەتون ساركوفاگ ورناتتىق. ودان ءسىبىر جاراسىنىڭ ەشقانداي باتسيللاسى تارالمايدى، قاۋىپ جوق، — دەدى ول.

ونىڭ سوزىنشە، ۇيلەردىڭ نەلىكتەن وسى ورىنعا جاقىن سالىنعانىن سانيتاريالىق- قورعاۋ ايماعىنىڭ بۇرىن بەلگىلەنبەۋىمەن تۇسىندىرۋگە بولادى.

— بۇرىن سانيتاريالىق-قورعاۋ ايماعى بولماعان دەۋگە بولادى، سوندىقتان مۇنداي كورشىلىككە رۇقسات ەتىلگەن. كەيىن 1000 مەترلىك سانيتاريالىق-قورعاۋ ايماعى بەلگىلەندى. سودان بەرى ءبىز ءسىبىر جاراسى كومىلگەن ورىننان 1000 مەتردەن از قاشىقتىقتا قۇرىلىس جۇرگىزۋگە رۇقسات بەرەتىن انىقتامالاردى بەرمەيمىز. الايدا بۇعان دەيىن سالىنعان نىساندار سول جەردە قالدى. ءىس جۇزىندە ولار ساركوفاگتىڭ جانىندا ورنالاسقان. ءبىراق، جوعارىدا ايتقانىمداي، ودان ەشقانداي قاۋىپ جوق، سوندىقتان الاڭداۋعا نەگىز جوق، - دەپ ءتۇسىندىردى وبلىستىڭ باس ۆەتەرينار دارىگەرى.

ءسىبىر جاراسى (لاتىنشا Anthrax) — Bacillus anthracis اتتى سپورا ءتۇزۋشى باكتەريا قوزدىراتىن، ادام مەن جانۋارلارعا ورتاق اسا قاۋىپتى جۇقپالى اۋرۋ.

نەگىزگى سيپاتتامالارى:

• قوزدىرعىشى: Bacillus anthracis باكتەرياسى. ونىڭ سپورالارى توپىراقتا ونداعان جىلدار بويى (100 جىلعا دەيىن) ساقتالۋعا قابىلەتتى.

• ينفەكسيا كوزى: ءىرى قارا مال، قوي، ەشكى، جىلقى، تۇيە جانە باسقا دا ءۇي جانۋارلارى.

• جۇعۋ جولدارى:

• اۋرۋ مالمەن نەمەسە ونىڭ تەرىسىمەن، جۇنىمەن تىكەلەي جاناسقاندا (جاعدايلاردىڭ %95- 99- ى تەرى ارقىلى جۇعادى)؛

• اۋرۋ مالدىڭ ەتىن نەمەسە ءسۇتىن دۇرىس پىسىرمەي جەگەندە (اليمەنتارلى جول)؛

• سپورا شاڭىن جۇتقاندا (وكپەلىك ءتۇرى).

• نەگىزگى تۇرلەرى:

• تەرىلىك ءتۇرى (ەڭ ءجيى كەزدەسەتىن ءتۇرى، تەرىدە جارا، كاربۋنكۋل تۇزىلەدى)؛

• جايىلمالى نەمەسە گەنەراليزاتسيالانعان تۇرلەرى (وكپەلىك جانە ىشەكتىك فورمالار، وتە اۋىر وتەدى).

• الدىن الۋ شارالارى: ۆەتەريناريالىق باقىلاۋدان وتپەگەن ەت ونىمدەرىن ساتىپ الماۋ، مال سويۋ كەزىندە قاۋىپسىزدىك ەرەجەلەرىن ساقتاۋ جانە جانۋارلار مەن قاۋىپتى ايماقتاعى ادامداردى ۋاقىتىندا ۆاكسيناتسيالاۋ.