قوسشى قالاسىنىڭ تايتوبە كەنتى تۇسىنداعى نۇرا وزەنىنىڭ جاعالاۋىن نىعايتۋ جۇمىستارى جۇرگىزىلۋدە
كوكشەتاۋ. KAZINFORM - اقمولا وبلىسىندا سۋ تاسقىنىنا قارسى ءىس-شارالار جالعاسىپ جاتىر.
استانالىق اۋداندارعا ەكسكاۆاتور، ساموسۆال جانە تيەگىشتەر بار 85-كە جۋىق تەحنيكا ەلوردادان كومەككە كەلدى. بۇل تەحنيكالارمەن قوسشى قالاسىنىڭ تايتوبە كەنتى تۇسىنداعى نۇرا وزەنىنىڭ جاعالاۋىن نىعايتۋ جۇمىستارى جۇرگىزىلۋدە.
اقمولا وبلىسى اكىمدىگىنىڭ مالىمەتىنشە، ايماق باسشىسى مارات احمەتجانوۆ وڭىردە سۋ تاسقىنىنا قارسى جۇرگىزىلىپ جاتقان جۇمىستاردى بارىپ كوردى.
قوسشى قالاسىنىڭ 19 جانە 20 شاعىن اۋداندارىندا سۋ تاسقىنىن بولدىرماۋ باعىتىندا اۋقىمدى جۇمىستار قولعا الىنعان. بۇعان قۇتقارۋشىلار مەن كوممۋنالدىق قىزمەتتەردەن بولەك، 200-گە جۋىق ەرىكتى، قوعام بەلسەندىلەرى جانە تۇرعىندار اتسالىسۋدا. ولار قۇم سالىنعان قاپتاردى توسەپ، بوگەتتەردى توپىراقپەن نىعايتىپ جاتىر.
ارشالى اۋدانىنىڭ جىبەك جولى اۋىلىندا ەسىل وزەنىنىڭ جاعاسى مەن بەزىمياننايا بوگەتىنىڭ سىرتىنان توپىراقتان تۇرعىزىلعان بوگەتتى نىعايتۋ جانە ۇزارتۋ جۇمىستارى تاۋلىك بويى ءۇزىلىسىز جۇرگىزىلۋدە. وعان 45 ارنايى تەحنيكا تارتىلعان. ونىڭ 25- ءى ەلوردادان، 20 سى جەرگىلىكتى تەحنيكا. بۇعان قوسا، قۇم تولتىرىلعان 2 مىڭ قاپ توسەلدى، تاعى وسىنداي 3 مىڭ قاپ ازىرلەندى.
تۇنگى ۋاقىتتا جىبەك جولى كەنتىندە اعىن سۋدىڭ دەڭگەيىن باقىلاۋ ءۇشىن موبيلدى بەكەتتەر قويىلدى.
ايتا كەتسەك، بۇدان بۇرىن اقمولا وبلىسىندا سۋ تاسقىنىنا قارسى جۇمىستار جالعاسىپ جاتقانىن جازعان ەدىك.
اۆتور
اسلان وسپانوۆ
