قوسشى قالاسىنا جاڭا اكىم تاعايىندالدى

استانا. KAZINFORM - اقمولا وبلىسى اكىمىنىڭ 2024 -جىلعى 11-قاراشاداعى وكىمىمەن قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى جانە ءماسليحات دەپۋتاتتارىنىڭ ماقۇلداۋىمەن قوسشى قالاسىنىڭ اكىمى بولىپ ازامات كاپىشيەۆ تاعايىندالدى.

بۇل تۋرالى اقمولا وبلىسىنىڭ اكىمدىگى حابارلادى.

اقمولا وبلىسىنىڭ اكىمى مارات احمەتجانوۆ قوسشى قالاسىنىڭ اكتيۆىنە جاڭا اكىمدى تانىستىرا وتىرىپ، ازامات كاپىشيەۆتىڭ جوعارى كاسىبي قاسيەتتەرى بار ءبىلىمدى جانە بىلىكتى باسشى ەكەنىن اتاپ ءوتتى. جاڭا باسشىلىققا تۇرعىن ءۇي-كوممۋنالدىق شارۋاشىلىق، سونىڭ ىشىندە سۋمەن قامتاماسىز ەتۋ، ەلەكتر جانە جىلۋمەن جابدىقتاۋ، ينفراقۇرىلىم سالالارىندا ءبىرقاتار مىندەتتەر قويىلدى.

ايماق باسشىسى جوسپارلانعان بارلىق نىسانداردىڭ ۋاقىتىلى پايدالانۋعا بەرىلۋىن جەكە باقىلاۋعا الۋدى، سونداي-اق جىلىتۋ ماۋسىمىنىڭ ءساتتى جانە ۇزدىكسىز ءوتۋىن قامتاماسىز ەتۋدى تاپسىردى. قالا كەلبەتىن جاقسارتۋ، قوقىس شىعارۋ ماسەلەلەرىنە ەرەكشە نازار اۋدارۋ قاجەتتىگى دە ايتىلدى.

گەوگرافيالىق ءتيىمدى ورنالاسۋدى ەسكەرە وتىرىپ، ينۆەستيتسيالاردى تارتۋ، كاسىپكەرلىك پەن تۋريزمدى دامىتۋ جۇمىستارىن جالعاستىرۋ قاجەت. الەۋمەتتىك نىسانداردى ىسكە قوسۋ جانە جول جەلىسىن دامىتۋ بويىنشا بەلسەندى جۇمىس كۇتىلەدى.

كەزدەسۋ سوڭىندا مارات احمەتجانوۆ جۇكتەلگەن مىندەتتەردى جۇزەگە اسىرۋدا تابىس تىلەپ، قوسشى قالاسىنىڭ بۇرىنعى اكىمى گايدار قاسەنوۆكە اتقارعان جۇمىسى ءۇشىن العىسىن ءبىلدىردى.