قورقىت اتا، ورالحان بوكەي، نۇرلان بالعىمبايەۆ: استانادا كوشە اتاۋلارى بەرىلەدى
استانا. KAZINFORM - ەلوردادا اتاۋى جوق جانە جاڭادان سالىنعان كوشەلەرگە تانىمال تۇلعالار مەن جەر-سۋ اتاۋلارى بەرىلەدى.
«2023 -جىلى تامىزدا ءماسليحات سەسسياسىندا قالاداعى كەيبىر كوشەلەرگە تۇلعالار جانە جەر-سۋ اتاۋلارىن بەرۋ تۋرالى ۇسىنىستى قولداعان بولاسىزدار. اتالعان ۇسىنىستار رەسپۋبليكالىق ونوماستيكالىق كوميسسيانىڭ قاراۋىنا جولدانىپ، بيىل 24-قاڭتاردا وڭ شەشىمىن تاپتى»، - دەدى استانا قالاسى تىلدەردى دامىتۋ جانە ارحيۆ ءىسى باسقارماسى باسشىسىنىڭ مىندەتىن اتقارۋشى دوسجان يسابەك قالالىق ءماسليحاتتىڭ وتىرىسىندا.
ونىڭ ايتۋىنشا، اتالعان تۇلعالار مەن جەر-سۋ اتاۋلارى مادەنيەت جانە اقپارات مينيسترلىگىنىڭ ونوماستيكا كوميسسياسى قولدانۋعا ۇسىنىلعان تىزىمدەر قاتارىندا بار.
ەلوردانىڭ ءماسليحات دەپۋتاتتارى كوشە اتاۋلارىن ءبىراۋىزدان قولدادى.
سونىمەن قاتار سپيكەر استانا كوشەلەرىنە بەرىلەتىن تۇلعالار مەن جەر-سۋ اتاۋلارىن ءتىزىپ شىقتى.
الماتى اۋدانى بويىنشا:
ورالحان بوكەي - بەلگىلى جازۋشى، دراماتۋرگ، جۋرناليست ق ر مەملەكەتتىك سىيلىقتىڭ لاۋرەاتى؛
سىرباي ماۋلەنوۆ - اقىن، ق ر مەملەكەتتىك سىيلىقتىڭ لاۋرەاتى؛
امەن قايداروۆ - قازاق مۋلتيفيكاتسيا ونەرىنىڭ نەگىزىن قالاۋشى، سۋرەتشى، كينو رەجيسسەر، پروفەسسور؛
بۇيراق - اقتوبە وبلىسىنداعى شاتقال اتاۋى؛
اقتەكشە - جەتىسۋ وبلىسىنداعى ەلدى مەكەن اتاۋى؛
كەندىرلى - كاسپي تەڭىزىنىڭ وڭتۇستىك شىعىسىنداعى شىعاناق اتاۋى؛
كەڭساز - قاراعاندى وبلىسى جاڭاارقا اۋدانىنداعى وزەن اتاۋى؛
قاراشىعاناق - باتىس قازاقستان وبلىسىنداعى ەلدى مەكەن اتاۋى، قازاقستانداعى ەڭ ءىرى مۇناي-گاز كەن ورنى اتاۋى؛
قيماسار - الماتى تاۋلارى شاتقالى اتاۋى؛
قويتاس - ورتالىق قازاقستانداعى تاۋ اتاۋى؛
تاسوتكەل - اقمولا، اقتوبە، جامبىل وبلىستارىنداعى ەلدى مەكەن اتاۋلارى؛
مايمەكەن - شىعىس قازاقستان وبلىسىنداعى وزەن اتاۋى؛
مۇزافار الىمبايەۆ - اقىن، اۋدارماشى جانە ادەبيەتتانۋشى.
بايقوڭىر اۋدانى بويىنشا:
جۋرناليستەر ساياباعى - ەگەمەن قازاقستان كوشەسىنىڭ بويىندا ورنالاسقان ساياباق؛
ەسىل اۋدانى بويىنشا:
نۇرلان بالعىمبايەۆ – ق ر مەملەكەتتىك قايراتكەرى، ق ر بۇرىنعى پرەمەر-ءمينيسترى؛
شۇبارتاۋ - شىعىس قازاقستان وبلىسىنداعى ەلدى مەكەن اتاۋى؛
نۇرا اۋدانى بويىنشا:
تاتتىمبەت - كۇيشى، كومپوزيتور، دومبىراشى، شەرتپە كۇي مەكتەبىنىڭ نەگىزىن قالاۋشىلاردىڭ ءبىرى؛
قورقىت اتا - تۇركى حالىقتارىنا ورتاق ۇلى ويشىل، جىراۋ، قوبىزشى.
اۆتور
داۋلەت ىزتىلەۋ