قورعاستا اۋەجاي سالىنادى
استانا. قازاقپارات- جەتىسۋ وبلىسىنداعى قورعاس كەدەن بەكەتىنە اۋەجاي سالۋ قاراستىرىلۋدا. بۇل تۋرالى بۇگىن الماتىدا وتكەن ІІІ قازاقستان-ساۋد ارابياسى ىسكەرلىك كەڭەسىندە ايتىلدى.
جاڭا جوباعا اراب ەلىنەن 2,5 ميلليارد دوللار ينۆەستيتسيا تارتىلماق. مۇنداعى ماقسات ەكى ەل اراسىنداعى ساۋدا-ساتتىق كولەمىن ارتتىرۋ. ول ءۇشىن اۋە جولى ارقىلى تىكەلەي لوگيستيكا جاسالادى. كەڭەسكە ساۋد ارابياسىنان ەلۋدەن اسا جانە ەلىمىزدەن وننان اسا كاسىپكەر قاتىسىپ، ءوزارا ساۋدا كوزدەرىن قاراستىردى. ارابتار الماتى قالاسىنىڭ تۋريستىك الەۋەتىن ارتتىرۋعا دا قىزىعۋشىلىق ءبىلدىردى.
ايتا كەتەيىك، قازاقستان -ساۋد ارابياسى ىسكەرلىك كەڭەسىنىڭ العاشقى جيىنى بىلتىر استانادا ءوتتى. ەكىنشى كەڭەس ەر-رياد قالاسىندا بولدى. ناتيجەسىندە قازاقستاندىق ІТ حاب اشىلدى. ال اۋەجاي سالىناتىن بولسا تاۋار تاسىمالى جىلدامدايدى.
قانات قۇدايبەرگەن، قازاقستان-ساۋد ارابياسى ىسكەرلىك كەڭەسىنىڭ تەڭ ءتوراعاسى:
- ويتكەنى بۇل لوگيستيكالىق پروبلەمالارعا بايلانىستى. ويتكەنى بىزگە تاۋارلاردى ساۋد ارابياسىنىڭ نارىعىنا جەتكىزۋ نەمەسە ساۋد ارابياسىنان بەرى جەتكىزۋ وتە قيىنداۋ بولىپ تۇر. سول ماسەلەلەردى شەشۋ ءۇشىن كەلىسىمدەرگە كەلىپ جاتىرمىز. ول مىناۋ ساۋد ارابياسى مەن قازاقستان اراسىندا اۆيا ارقىلى جۇك تاسىمالداۋ.
احمەد ءالي ءال-داحيل، قازاقستان-ساۋد ارابياسى ىسكەرلىك كەڭەسىنىڭ تەڭ ءتوراعاسى:
- جاقىندا بىزدە ەر-رياد قالاسىندا ءال-فارابي يننوۆاتسيالىق حابى اشىلدى. ІТ سالاسىنداعى كومپانيالارعا جاڭا تەحنولوگيالارمەن قولداۋ كورسەتەدى. ءبىزدىڭ كاسىپكەرلەر جاسىل ەنەرگيا، اۋىل شارۋاشىلىعى، تۋريزم، گەولوگيا سالاسىنا قىزىعۋشىلىق تانىتىپ وتىر. بۇدان باسقا ينۆەستيتسيا سالاتىن، ساۋدانى ارتتىراتىن سەكتورلاردى ىزدەستىرىپ جاتىرمىز.
