قورعانىس ۋنيۆەرسيتەتى اتاۋىنان تۇڭعىش پرەزيدەنت - ەلباسى سوزدەرى الىنىپ تاستالدى
ق ر تۇڭعىش پرەزيدەنتى- ەلباسى اتىنداعى ۇلتتىق قورعانىس ۋنيۆەرسيتەتىنىڭ اتاۋى وزگەرەدى. بۇل تۋرالى سەناتتىڭ جالپى وتىرىسىنان كەيىن دەپۋتات بەكبول ورىنباسار ايتتى، دەپ حابارلايدى Kazinform ءتىلشىسى.
«ق ر تۇڭعىش پرەزيدەنتى - ەلباسى تۋرالى» كونستيتۋتسيالىق زاڭنىڭ قولدانىلۋى توقتاتىلۋىنا بايلانىستى «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى» زاڭنىڭ نورمالارىنا سايكەس كەلتىرۋ كەرەك بولدى. زاڭدا ق ر تۇڭعىش پرەزيدەنتى- ەلباسى اتىنداعى ۇلتتىق قورعانىس ۋنيۆەرسيتەتىندە وقىتۋ ماسەلەلەرى رەگلامەنتتەلگەن. ەندى وسى ۋنيۆەرسيتەتتىڭ اتاۋى وزگەرەدى، تۇڭعىش پرەزيدەنت- ەلباسى دەگەن ءسوز الىنىپ تاستالادى. قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتى دەپ اتالادى»، - دەدى ب. ورىنباساروۆ.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۇلتتىق قوردان بالالارعا ارنالعان قاراجاتتى ەسەپتەۋ، تولەۋ جانە پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ جەكەلەگەن باپتارى ماقۇلدانبادى.
بۇل رەتتە، اتالعان باپتاردىڭ جاڭا رەداكتسياسىن ۇسىنا وتىرىپ، قۇجات ماجىلىسكە قايتارىلدى.
وسى قۇجاتتا «قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى» كونستيتۋتسيالىق زاڭنىڭ قولدانىلۋى توقتاتىلۋىنا بايلانىستى «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى» زاڭنىڭ نورمالارىنا سايكەس كەلتىرۋ قامتىلعان.
اۆتور
رۋسلان عابباسوۆ
