قونىس اۋدارۋ باعدارلاماسى بويىنشا بولىنگەن قارجىنى ۇرلاۋ فاكتىلەرى انىقتالدى

استانا. KAZINFORM - سولتۇستىك قازاقستان وبلىسىنىڭ پروكۋرورلارى قونىس اۋدارۋ باعدارلاماسى بويىنشا بيۋدجەت قاراجاتىن ۇرلاۋ فاكتىلەرىن انىقتادى، دەپ حابارلايدى وبلىستىق پروكۋراتۋراسىنىڭ باسپا ءسوز قىزمەتى.

باسپا ءسوز قىزمەتىنىڭ مالىمەتتەرىنە قاراعاندا، قاداعالاۋ ورگانى تەكسەرۋلەر اياسىندا الەۋمەتتىك شارتتىڭ قابىلدانعان مىندەتتەمەلەرىن ورىنداماۋ جانە تۇرعىن ءۇي قۇنىن اسىرا باعالاۋ ءۇشىن قولدانىستاعى زاڭنامانىڭ ورەسكەل بۇزىلعانىن انىقتادى.

وسىلايشا، ايىرتاۋ، ع. مۇسىرەپوۆ، جامبىل اۋداندارىندا قونىس اۋدارۋ باعدارلاماسىنا قاتىسۋشىلار الەۋمەتتىك كودەكستىڭ تالاپتارىنا جانە ادامداردى ەرىكتى تۇردە قونىس اۋدارۋ قاعيدالارىنىڭ تالاپتارىنا قاراماستان، تۇرعىن ءۇيدى ساتىپ الۋ شىعىندارىن وتەۋگە مەملەكەتتىك وتەماقىنى بارىنشا كوپ الۋ ءۇشىن ولاردىڭ ناقتى قۇنىن اسىرىپ اسىرىپ كورسەتكەن.

وسىنداي زاڭسىز ارەكەتتەردەن مەملەكەتكە جالپى سوماسى 11,3 ميلليون تەڭگە شىعىن كەلتىرىلگەن.

وسى فاكتىلەرگە سۇيەنە وتىرىپ، پروكۋراتۋرا قىلمىستىق كودەكستىڭ 190-بابىنا (الاياقتىق) سايكەس، سوتقا دەيىنگى تەرگەپ-تەكسەرۋ جۇمىستارىن باستادى.

اۋداندىق سوت ۇكىمىمەن باعدارلامانىڭ 3 قاتىسۋشىسىنىڭ باس بوستاندىعى ءبىر جىلدان ءۇش جىلعا دەيىنگى مەرزىمگە شەكتەلدى.

سونىمەن بىرگە، الەۋمەتتىك شارت بويىنشا ءوز مىندەتتەمەلەرىن بۇزا وتىرىپ، مەملەكەتتەن قارجىلاي كومەك العان قونىس اۋدارۋ باعدارلاماسىنا قاتىسۋشىلار تۇراقتى تۇرۋ ءۇشىن قونىس اۋدارعان ورنىنان رەسپۋبليكانىڭ باسقا ايماقتارىنا كوشكەن.

وسىعان قاراماستان، جەرگىلىكتى اتقارۋشى ورگانداردىڭ شەنەۋنىكتەرى 103,6 ميلليون تەڭگە كولەمىندەگى تولەمدەردى ءوندىرىپ الۋ شارالارىن قولدانباعان.

پروكۋرورلىق قاداعالاۋ اكتىلەرىنە سايكەس، جەرگىلىكتى اتقارۋشى ورگانداردىڭ 25 قىزمەتكەرى (ونىڭ ىشىندە مانساپ ورتالىقتارى فيليالىنىڭ 11 باسشىسى) تارتىپتىك جاۋاپكەرشىلىككە تارتىلىپ، 19,1 ميلليون تەڭگە كولەمىندەگى بيۋدجەت قاراجاتى وتەلدى.

قالعان سوماعا تالاپ ارىزدار سوتقا بەرىلىپ، قارالۋدا.

بيۋدجەتتىك قاراجاتتى جۇمساۋ ماسەلەسى وبلىستىق پروكۋراتۋرانىڭ باقىلاۋىندا.