قوجاناسىر مەن باقشا يەسى
قوجاناسىر ءبىر باقشاعا كىرىپ، باقشاداعى جەمىستەردى جۇلىپ، قابىنا سالىپ الىپ جاتقاندا، باقشا يەسى ۇستىنەن شىعىپ قالىپ:

- ءاي، سەن، مۇندا نەعىپ ءجۇرسىڭ؟ - دەيدى. قوجاناسىر ساسپاستان:
- جاڭا ءبىر قاتتى قۇيىن تۇرىپ، وسىندا ۇشىرىپ اكەپ تاستاعانى. ءوزىمنىڭ دە باسىم اڭكى- تاڭكى بولىپ تۇر، اعايىن، تىم قاتتى ايقايلاماشى! - دەيدى.
- ال سەنى مۇندا جەل كوتەرىپ اكەپ تاستاسىن، مىنا جەمىستەردى كىم جۇلىپ تاستادى؟ - دەيدى باقشا يەسى.
- مەن قۇيىن دومالاتىپ جۇرگەندە قارمانىپ قولىما ىلىككەن نارسەلەردى ۇستاپ ەدىم. مۇمكىن سوندا جۇلىنىپ كەتكەن بولار، - دەيدى قوجا.
- ول دا سولاي بولسىن، ال مىنا قاپقا جەمىستى تولتىرعان دا جەل مە؟ - دەيدى باقشا يەسى.
- اپىرم- اي، وسىعان مەن تاڭعالىپ تۇر ەدىم، سەن دە دۇرىس اڭعاردىڭ- اۋ! ءبىراق وسىندا مەنى ۇشىرىپ اكەپ تاستاعان قۇيىنعا ءبىر قاپ جەمىس بۇيىم با؟ ءسىرا، جەل كوتەرىپ اكەلگەن ماڭايداعى ءبىر پاقىردىڭ ەڭبەكتەپ جيناعان قاۋىنى مەن قابى بولار، مەن ارقالاپ الا كەتەرمىن! - دەپتى قوجا ەش ساسپاستان.
اق كويلەك
قوجاناسىر ءبىر كۇنى تۇندە دالاعا شىقسا، ەسىكتىڭ الدىندا الدەنە اعاراڭداپ تۇر ەكەن. جالما- جان ۇيىنە جۇگىرىپ كىرىپ، مىلتىعىن الىپ شىعىپ، الگى اعارعاندى اتىپ تاستايدى دا: «نە دە بولسا، ەرتەڭ كورەرمىن»، - دەپ ۇيىنە كىرىپ جاتىپ قالادى. ەرتەڭىندە تۇرىپ تۇندەگى اتقان نارسەسىن قاراسا، ول ءوزىنىڭ جۋىپ، جايىپ قويعان كويلەگى ەكەن، مىلتىقتىڭ وعى ماتانى شۇرىق تەسىك قىپ كەتىپتى. قوجا كويلەگىن ءارى- بەرى اينالدىرىپ قاراپ تۇرىپ: «اپىر- اي، ءا، كويلەگىمنىڭ ىشىندە ءوزىمنىڭ بولماعانىما شۇكىر، ەگەر دە ءوزىم بولسام، نە بولار ەدىم؟» - دەپتى.
قوجاناسىر اتتان قۇلاعاندا
ءبىر كۇنى قوجاناسىردىڭ اتتان جىعىلىپ جاتقانىن كورىپ، بالالار سىقىلىقتاپ كۇلەدى. سوندا قوجاناسىر ءۇستى- باسىن قاعىپ جاتىپ:
- نەسىنە كۇلەسىڭدەر؟ مەن ءوزىم دە تۇسەيىن دەپ جاتىر ەدىم، - دەپتى
ەسەگىمە ۇقسايدى ەكەنسىز
ءبىر كۇنى قوجاناسىر جولاۋشىلاپ ءجۇرىپ، سول ماڭدى بيلەپ تۇرعان حانمەن كەزدەسە قالىپتى. حان وتىرىپ:
- مەنىڭ الماشۇبار دەگەن اتىم بار، شاپقاندا كوز ىلەسپەيدى، - دەپ ماقتانادى.
- مەنىڭ اسىل تەكتى ەسەگىم بار. اقىرسا - داۋسى ايشىلىق جەرگە جەتەدى، - دەيدى قوجاناسىر.
- مەن اقىرعانىمدا قىزمەتشى نوكەرلەرىم:
«قۇدىرەتتى حانىمىزدىڭ داۋىسى ارىستاننىڭ اقىرعانىنان دا كۇشتى»، - دەۋشى ەدى، سەنىڭ ەسەگىڭ مەنەن دە قاتتى اقىرا ما؟ - دەيدى حان.
- تاقسىر، ءسىزدىڭ اقىرعانىڭىزدى ەستىگەن جوق ەدىم. ايقايلاڭىزشى، كورەيىن، - دەيدى قوجاناسىر. حان تاماعىن قىرناپ- قىرناپ الىپ، ايقايلاپ قويا بەرىپتى.
- تاقسىر، شىنىندا دا، ءوزىڭىز مەنىڭ ەسەگىمە ۇقسايدى ەكەنسىز، - دەپتى سوندا قوجاناسىر.