قۇس ەتىنە دەگەن سۇرانىستىڭ نەشە پايىزىن وتاندىق شارۋاشىلىقتار قامتاماسىز ەتىپ وتىر

استانا. KAZINFORM - حالىقتىڭ قۇس ەتىنە سۇرانىسىنىڭ 73 پايىزى وتاندىق ءوندىرىس ەسەبىنەن قامتاماسىز ەتىلىپ وتىر. بۇل تۋرالى اۋىل شارۋاشىلىعى مينيسترلىگىنەن ءمالىم بولدى.

ۆەدومستۆو اقپاراتىنا قاراعاندا، 2025 -جىلدىڭ 1- قاڭتارىنداعى جاعداي بويىنشا قۇس سانى 45,2 ميلليون باس بولدى (102,6 پايىز)، ونىڭ ىشىندە اۋىل شارۋاشىلىعى قۇرىلىمدارىندا 38,2 ميلليون (104,2 پايىز). ال قالعانى جەكە ءۇي شارۋاشىلىقتارىندا.

- 2024 -جىلدىڭ 12 ايىندا 358,7 مىڭ توننا قۇس ەتى ءوندىرىلدى (109,8 پايىز). حالىقتىڭ قۇس ەتىنە سۇرانىسىنىڭ 73 پايىزى وتاندىق ءوندىرىس ەسەبىنەن قامتاماسىز ەتىلىپ وتىر. يمپورتتى الماستىرۋ ماقساتىندا قۇس فابريكالارىن سالۋ جانە جاڭعىرتۋ جۇمىستارى ىسكە اسىرىلىپ جاتىر. 2024 -جىلى جوبالىق قۋاتى 15945 توننا بولاتىن 6 قۇس فابريكاسى ىسكە قوسىلدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ەسكە سالساق، قازاقستان بىلتىرعى 11 ايدا 38 مىڭ توننا قۇس ەتىن ەكسپورتتادى.

2024 -جىلدىڭ اياعىندا جوعارى اۋديتورلىق پالاتانىڭ ءتوراعاسى ءاليحان سمايىلوۆ قۇس ەتىنە مەملەكەتتەن بولىنەتىن سۋبسيديالاردىڭ ءتيىمسىز يگەرىلىپ جاتقانىنا بىرنەشە مىسال كەلتىردى.

اۆتور

رۋسلان عابباسوۆ