قۇرىلتاي وتىرىسى: ۆەتەرينار دارىگەرلەردىڭ مارتەبەسىن كوتەرۋ قۇجاتى قارالادى

وندا دەپۋتاتتار ۆەتەريناريا ماسەلەلەرى بويىنشا ەنگىزىلەتىن وزگەرىستەردى تالقىلايدى.

ايتا كەتەيىك، 30 -قازاندا قۇرىلتاي ءتوراعاسى ايبەك دادەبايدىڭ توراعالىعىمەن وتكەن بيۋرو وتىرىسىندا قۇرىلتايدىڭ الداعى وتىرىسىنىڭ كۇن ءتارتىبى ناقتىلاندى.

ءبىرىنشى وقىلىمدا ۆەتەريناريا ماسەلەلەرى بويىنشا كەيبىر زاڭنامالىق اكتىلەرگە ەنگىزىلەتىن وزگەرىستەر مەن تولىقتىرۋلار جوباسى قارالادى. تۇزەتۋلەر مەملەكەتتىك ورگانداردىڭ ۆەتەريناريا سالاسىنداعى وكىلەتتىكتەرىنىڭ ارا-جىگىن اجىراتۋعا، ۆەتەريناريالىق دارىگەرلەردىڭ مارتەبەسىن كوتەرۋگە جانە ولاردى الەۋمەتتىك قولداۋعا باعىتتالعان.

سالانى سيفرلاندىرۋعا دا ەرەكشە كوڭىل ءبولىنىپ وتىر. بۇعان قوسا، ۆەتەريناريالىق باقىلاۋ مەن بيولوگيالىق قاۋىپسىزدىك تالاپتارىن كۇشەيتۋ، ۆەتەريناريالىق قىزمەت سۋبەكتىلەرىنىڭ جاۋاپكەرشىلىگىن ارتتىرۋ شارالارى دا ۇسىنىلادى.

بۇعان دەيىن حابارلانعانداي، بيىل تامىزدا اۋىل شارۋاشىلىعى مينيسترلىگىندە وتكەن كەڭەستە ۆەتەريناريالىق قاۋىپسىزدىك، ينفراقۇرىلىمدى دامىتۋ جانە سالانى سيفرلاندىرۋ ماسەلەلەرى قارالدى.

مەملەكەت باسشىسىنىڭ تاپسىرماسىنا سايكەس، مال شارۋاشىلىعىن دامىتۋدىڭ كەشەندى جوسپارىمەن قاتار، 2026- 2030 -جىلدارعا ارنالعان ۆەتەريناريانى دامىتۋدىڭ كەشەندى جوسپارى بەكىتىلدى. ونى ىسكە اسىرۋعا 66,2 ميلليارد تەڭگە قاراستىرىلعان.

سونىمەن قاتار، دەپۋتاتتار «قازاقستان رەسپۋبليكاسى مەن ازيا دامۋ بانكى اراسىنداعى قارىز تۋرالى كەلىسىمدى (جاي وپەراتسيالار) (فيسكالدىق باسقارۋ جانە قارجى سەكتورى رەفورمالارىنىڭ باعدارلاماسى — 2-كىشى باعدارلاما) راتيفيكاتسيالاۋ تۋرالى» قازاقستان رەسپۋبليكاسى زاڭىنىڭ جوباسىن قارايدى.

بۇدان بولەك، قۇرىلتايدا «سيفرلاندىرۋ جانە جاساندى ينتەللەكت جىلى اياسىندا ەكونوميكانىڭ ناقتى سەكتورى سالالارىن سيفرلىق ترانسفورماتسيالاۋ» تاقىرىبىندا تىڭداۋ وتكىزۋ تۋرالى اقپارات قارالادى.

قۇرىلتايدىڭ باسپا ءسوز قىزمەتى تاراتقان مالىمەتكە قاراعاندا، جالپى وتىرىس قورىتىندىسى بويىنشا ب ا ق وكىلدەرىنە ارنالعان بريفينگ وتكىزۋ جوسپارلانىپ وتىر. وندا ۆەتەريناريا ماسەلەلەرى بويىنشا وزگەرىستەر ەنگىزۋ تۋرالى زاڭ جوباسى جونىندە سپيكەرلەر رەتىندە اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى، قۇرىلتاي دەپۋتاتتارى سەرىك ەگىزبايەۆ جانە بوتا ەلەۋسىزوۆا (جۇمىس توبىنىڭ جەتەكشىسى) شاقىرىلادى.

ال ەكىنشى زاڭ جوباسى — قازاقستان مەن ازيا دامۋ بانكى اراسىنداعى كەلىسىمگە قاتىستى قارجى ءمينيسترى ءمادي تاكيەۆ جانە قۇرىلتاي دەپۋتاتى، جۇمىس توبىنىڭ جەتەكشىسى قايرات ايتۋعانوۆ تىلشىلەر سۇراقتارىنا جاۋاپ بەرەدى.

ەسكە سالساق، وتكەن اپتاداعى قۇرىلىتاي وتىرىسىندا دەپۋتاتتار «2014 -جىلعى 29 -مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ جونىندە حاتتامانى راتيفيكاتسيالاۋ تۋرالى» زاڭ جوباسىن ەكى وقىلىمدا قاراپ، قابىلدادى.

قۇجاتتى تانىستىرعان ساۋدا جانە ينتەگراتسيا ءمينيسترى ارمان شاققاليەۆتىڭ مالىمەتىنشە، حاتتاماعا 2025 -جىلعى 28 -شىلدەدە ماسكەۋ قالاسىندا ەۋرازيالىق ەكونوميكالىق وداققا مۇشە مەملەكەتتەردىڭ باسشىلارى قول قويدى. ونىڭ ەرەجەلەرى وداق اياسىنداعى قۇقىقتىق رەتتەۋدى جەتىلدىرۋگە جانە قۇقىق قولدانۋ پراكتيكاسى بارىسىندا انىقتالعان ولقىلىقتاردى جويۋعا باعىتتالعان.

— ۇسىنىلىپ وتىرعان حاتتامادا ەۋرازيالىق ەكونوميكالىق وداق تۋرالى شارتقا 30 تۇزەتۋ ەنگىزۋ كوزدەلگەن. ولار ىشكى نارىقتىڭ جۇمىس ىستەۋى، مەملەكەتتىك ساتىپ الۋ، تەحنيكالىق رەتتەۋ، كورسەتىلەتىن قىزمەتتەر ساۋداسى، باسەكەلەستىك، ەلەكتر ەنەرگەتيكاسى جانە كولىك ماسەلەلەرىن قامتيدى. اتاپ ايتقاندا، ەۋرازيالىق ەكونوميكالىق كوميسسيانىڭ وداقتىڭ ىشكى نارىعىنداعى كەدەرگىلەردى ءادىسنامالىق تۇرعۇدان سارالاۋ جانە توسقاۋىلدار مەن شەكتەۋلەردى جويىلدى دەپ تانۋ جونىندەگى وكىلەت بەكىتىلەدى. اتالعان نورما كوميسسيا جۇمىسىنىڭ ءبىرىڭعاي ءتاسىلىن قالىپتاستىرۋدىڭ قۇقىقتىق نەگىزىن ايقىندايدى جانە ەلدەرىمىز اراسىنداعى كەدەرگىسىز ورتانى قالىپتاستىرۋدى جاقسارتۋعا ىقپال ەتەدى، — دەدى ول.

سونىمەن قاتار 28 -قازانداعى قۇرىلتاي وتىرىسىندا ءتوراعا ايبەك دادەباي پرەزيدەنت جولداۋىنىڭ ماڭىزى جونىندە مالىمدەمە جاسادى.

ونىڭ سوزىنشە، مەملەكەت باسشىسىنىڭ جولداۋى — ەلىمىزدىڭ جاڭا جاعدايداعى الداعى ناقتى دامۋ باعدارىن ايقىندايتىن باعدارلامالىق قۇجات.

— بۇل — كونستيتۋتسيا قابىلدانىپ، بۇكىل ساياسي جۇيە جاڭعىرتىلعاننان كەيىنگى العاشقى جولداۋ. ەندى مەملەكەت باسشىسى جاڭا ساياسي ينستيتۋتتاردىڭ الدىنا ناقتى مىندەتتەر قويىپ وتىر، ياعني — جۇرگىزىپ جاتقان رەفورمالاردى ناقتى مازمۇنمەن بايىتىپ، ولاردىڭ جۇزەگە اسىرىلۋىن قامتاماسىز ەتۋ. وسى ورايدا، قۇرىلتاي دەپۋتاتتارىنا دا زور ءۇمىت ارتىپ وتىر، — دەدى ايبەك دادەباي.

اۆتورلار

رۋسلان عابباسوۆ