قۇرىلتاي كوشى-قون زاڭناماسىن جەتىلدىرۋ جۇمىستارىن باستادى

 اسىرەسە شەتەلدىك ينۆەستورلار مەن جوعارى بىلىكتى ماماندارعا ارنالعان «التىن ۆيزاعا» قاتىستى اۋقىمدى جۇمىس جاسالدى. ونىڭ يەلەرىنە ارنايى رۇقساتسىز جانە كۆوتادان تىس جۇمىس ىستەۋگە مۇمكىندىك بەرىلەدى. بۇل قازاقستانعا كاپيتال، جاڭا تەحنولوگيالار مەن بىلىكتى كادرلار تارتۋعا باعىتتالعان. زاڭ جوباسىندا ۇزاق مەرزىمدى رەزيدەنت مارتەبەسىن بەرۋ، مەملەكەتتىك جانە الەۋمەتتىك قىزمەتتەرگە قولجەتىمدىلىكتى جەڭىلدەتۋ دە قاراستىرىلعان. قۇجاتتار QazETA سيفرلىق پلاتفورماسى ارقىلى «ءبىر تەرەزە» قاعيداتىمەن ونلاين راسىمدەلەدى.

 وزگەرىستەر بانكتىك جانە ينۆەستيتسيالىق قىزمەتتەرگە قولجەتىمدىلىكتى جەڭىلدەتىپ، ەل ەكونوميكاسىنا شەتەلدىك كاپيتال مەن جاڭا تەحنولوگيالار تارتۋعا مۇمكىندىك بەرەدى. جاڭاشىلدىقتىڭ يگىلىگىن كىمدەر كورە الادى جانە قانداي تالاپتار قويىلادى؟

شەتەلدىك ينۆەستيتسيا تارتۋ - ەل ەكونوميكاسىن دامىتۋدىڭ ماڭىزدى تەتىكتەرىنىڭ ءبىرى. بۇل جاڭا وندىرىستەر اشۋعا، جۇمىس ورىندارىن قۇرۋعا جانە زاماناۋي تەحنولوگيالاردى ەنگىزۋگە مۇمكىندىك بەرەدى. ەلىمىزدىڭ ينۆەستورلار ءۇشىن تارتىمدىلىعىن ارتتىرۋ ماقساتىندا دەپۋتاتتار «التىن ۆيزا» تەتىگىن جەتىلدىرۋدى ۇسىنىپ وتىر. سيفرلىق كۋالىك بانكتىك جانە ينۆەستيتسيالىق قىزمەتتەردى الۋدى جەڭىلدەتىپ، بيۋروكراتيالىق راسىمدەردى قىسقارتپاق.

 ءلاززات جىلقىبايەۆا، ق ر قۇرىلتايىنىڭ دەپۋتاتى:

- شەتەلدىك ينۆەستورلار، بانكتىك ينۆەستيتسيالىق قىزمەتتەر الۋ بارىسىندا «التىن ۆيزا» سيفرلىق كۋالىگىن پايدالانا الادى. بۇل ءوز تاراپىنان قىزمەت كورسەتۋدى جەدەلدەتۋگە، وڭتايلاندىرۋعا، قاعازباستىلىقتان اجىراتۋعا مۇمكىنشىلىك بەرەدى. بۇل جەردە ايتا كەتەتىن باستى ماسەلە - بۇل ءجون-جوسىقسىز شەتەلدىكتەرگە رۇقسات بەرۋ دەگەن ەمەس، ول كەرىسىنشە قىزمەت كورسەتۋدى جەدەلدەتۋ، وڭتايلاندىرۋ ماسەلەسى.

زاڭگەرلەردىڭ پىكىرىنشە، ينۆەستورلاردى قىزىقتىرۋ ءۇشىن راسىمدەردى جەڭىلدەتۋمەن قاتار بەلگىلەنگەن تالاپتاردىڭ ساقتالۋىن قامتاماسىز ەتۋ ماڭىزدى. ياعني قاراجاتتىڭ قايدان الىنعانى راستالىپ، كاپيتالدىڭ قانداي سالالارعا باعىتتالاتىنى ەسكەرىلۋى ءتيىس.

ارىس داناعاتوۆ، زاڭگەر:

- ەلگە قارجى سالىپ، وسىنداي ۆيزا العىسى كەلەتىن ءوتىنىش بەرۋشى قاراجاتتىڭ شىعۋ تەگىن تولىق كورسەتۋى كەرەك. ياعني اقشا قايدان الىندى، قانداي جولمەن ءتۇستى - ءبارى راستالۋى ءتيىس. ەكىنشىدەن، ينۆەستيتسيا ناقتى سالالارعا نەمەسە كومپانيالارعا باعىتتالۋى قاجەت. مىسالى، ينۆەستور ەكونوميكانىڭ باسىم باعىتتارىنىڭ بىرىندە جۇمىس ىستەيتىن كومپانيانىڭ جارعىلىق كاپيتالىنا قارجى سالا الادى.

كوشى-قون رەفورماسى قازاقستانعا كەلەتىن شەتەلدىكتەرمەن عانا شەكتەلمەيدى. زاڭناماداعى تاعى ءبىر وزگەرىس شەتەلگە جۇمىس ىستەۋگە باراتىن وتانداستارىمىزدىڭ قۇقىقتارىن قورعاۋعا باعىتتالعان. قازىر ازاماتتاردى شەتەلگە جۇمىسقا ورنالاستىراتىن جەكە اگەنتتىكتەردىڭ قىزمەتىن قوسىمشا مەملەكەتتىك رەتتەۋ قاجەت. ولاردىڭ جۇمىسىنا ءبىرىڭعاي ەرەجەلەر ەنگىزۋ ۇسىنىلىپ وتىر.

 ءلاززات جىلقىبايەۆا، ق ر قۇرىلتايىنىڭ دەپۋتاتى:

 - قازىرگى كەزەڭدە ءبىزدىڭ قازاقستاندىق ازاماتتاردىڭ شەتەلگە جۇمىسقا بارىپ، ول جەردە قۇقىقتارىنىڭ ساقتالماۋى، جالاقىلارىنىڭ دۇرىس تولەنبەۋى، كەڭ جاعدايدا ەڭبەك قاناۋىنا تاپ بولۋى دا ءجيى كەزدەسىپ جاتىر. سونىمەن قاتار جۇمىسپەن قامتۋ اگەنتتىكتەرى شەتەلگە جىبەرۋ الدىندا كاسىبي جانە تىلدىك دايارلىق كۋرستارىنان دۇرىس وتكىزبەيدى. سوندىقتان مۇنداي اگەنتتىكتەردىڭ قىزمەتىن ەڭبەك جانە حالىقتى الەۋمەتتىك قورعاۋ مينيسترلىگى باقىلايدى. ولاردىڭ ءبىرىڭعاي ءتىزىلىمى دە جاساقتالادى. بۇل دەلدالدارعا باقىلاۋدى كۇشەيتىپ، شەتەلدە ەڭبەك ەتەتىن قازاقستاندىقتاردىڭ قۇقىقتارىن قورعاۋعا مۇمكىندىك بەرەدى.

 قازىر زاڭ جوباسى جۇمىس توبىنىڭ تالقىلاۋىنا ءوتتى.

24.kz