قۇرعاق ساۋمال وبىردى، قانت ديابەتىن ەمدەيدى دەپ وتىرىك جارناما جاساعان ءوندىرۋشى ايىپپۇل تولەدى

الماتى وبلىسى پروكۋراتۋراسى ينتەرنەت جەلىسىندە، سونىڭ ىشىندە تانىمال بلوگەرلەر، سپورتشىلار جانە ارتىستەردىڭ پاراقشاسىندا بيولوگيالىق بەلسەندى قوسپالاردىڭ قاسيەتتەرىن اسىرا سىلتەپ كورسەتەتىن جارناما تاراتىلعانىن انىقتادى، دەپ حابارلايدى Kazinform.

مىسالى، جەلىدە NEOSAUMAL، SAUMAL سۋبليماتتاۋ ادىسىمەن قۇرعاتىلعان بيە ءسۇتى قانت ديابەتىن، ونكولوگيالىق جانە باسقا اۋرۋلاردى ەمدەيتىن بىرەگەي ءونىم رەتىندە بەلسەندى جارنامالانىپ جاتىر.

ەلدىڭ شاعىمىن نازارعا الا وتىرىپ وبلىس پروكۋراتۋراسىنىڭ تاپسىرماسى بويىنشا مەملەكەتتىك كىرىستەر دەپارتامەنتى ءونىم جارناماسىنىڭ راس-وتىرىگىن تەكسەردى.

SAUMAL تاعامعا بيولوگيالىق بەلسەندى قوسپا رەتىندە جالپى نىعايتۋشى، يمۋندىق ىنتالاندىرۋشى، تىنىشتاندىرعىش ءونىم رەتىندە تىركەلگەنى انىقتالدى.

باسقاشا ايتقاندا، دارىلىك قاسيەتى جوق جانە جارنامادا كورسەتىلگەن اۋرۋلاردى ەمدەۋگە شاماسى كەلمەيدى.

دەنساۋلىق كودەكسىنىڭ 56-بابىنىڭ 2-بولىگىنە سايكەس ب ب ق جارناماسى انىق، ارنايى ءبىلىمسىز نەمەسە ارنايى قۇرالداردى قولدانباي ءتۇسىنىلىپ-تانىلۋعا، تۇتىنۋشى سەنىمىن تەرىس پايدالانۋ ارقىلى ولاردى جاڭىلىستىرماۋعا ءتيىس.

كودەكستىڭ 56-بابىنىڭ 3-تارماعىنىڭ 11,13-تارماقشالارى بويىنشا جارنامادا قان ديابەتىن، ونكولوگيالىق جانە باسقا اۋرۋلاردى ەمدەۋ تاسىلدەرىن، ب ب ق- لاردى بىرەگەي، بارىنشا قاۋىپسىز جانە ءتيىمدى رەتىندە ۇسىنۋعا تىيىم سالىنعان.

وسىلايشا كومپانيا ازاماتتاردىڭ سەنىمىن تەرىس پايدالانا قويماي، كورىنەۋ جالعان جارناما تاراتۋ ارقىلى اكىمشىلىك قۇقىق بۇزعان.

SAUMAL- دىڭ وندىرۋشىسىنە 30-قاراشادا ا ق ب ت ك 157-بابى بويىنشا اكىمشىلىك حاتتاما تولتىرىلىپ، 175 ا ە ك كولەمىندە (603750 تەڭگە) ايىپپۇل سالىندى.
اۆتور
جانات قاپالبايەۆا