قۇقىق قورعاۋ ورگاندارىندا لاۋازىمدى تۇلعالار پوليگرافولوگيالىق تەكسەرۋدەن وتەدى

استانا. KAZINFORM - باس پروكۋراتۋرا قۇقىق قورعاۋ، ازاماتتىق قورعاۋ ورگاندارى مەن مەملەكەتتىك فەلدەگەرلىك قىزمەتتە پوليگرافولوگيالىق زەرتتەۋدەن ءوتۋ ەرەجەسىنە وزگەرىستەر ەنگىزدى. قۇجات جوباسى «اشىق ن ق ا» پورتالىندا جاريالاندى.

پوليگرافولوگيالىق زەرتتەۋ - ادامنىڭ جەكەلەگەن فيزيولوگيالىق رەاكسيالارىن ارنايى داتچيكتەردىڭ كومەگىمەن تىركەۋدەن تۇراتىن ساۋالناما جۇرگىزۋ ءراسىمى.

جاڭا وزگەرىستەرگە سايكەس، قازاقستان رەسپۋبليكاسى قۇقىق قورعاۋ ورگاندارىنىڭ، ازاماتتىق قورعاۋ ورگاندارىنىڭ، مەملەكەتتىك فەلدەگەرلىك قىزمەتىنىڭ قىزمەتكەرلەرى جوعارى تۇرعان باسشى لاۋازىمعا ۇسىنىلعان كەزدە (اتتەستاتتاۋ نەمەسە جوسپاردان تىس اتتەستاتتاۋ نەمەسە جوعارى تۇرعان باسشى لاۋازىمعا كونكۋرس شەڭبەرىندە) وتەدى.

زەرتتەۋ جوعارى لاۋازىمعا ۇسىنىلعان ادامنىڭ كەلىسىمىمەن جۇرگىزىلەدى.

سونداي-اق باس پروكۋراتۋرا پوليگرافولوگيالىق زەرتتەۋدەن ءوتۋدىڭ مىندەتتەرىن ءتۇسىندىردى.

- لاۋازىمدى قىزمەتتەگى جاسىرىن تەرىس سەبەپتەرىن (تىيىم سالىنعان قوعامدىق بىرلەستىكتەر قىزمەتىنىڭ، قىلمىستىق جانە تەرروريستىك ۇيىمدار مۇددەلەرىنە جانە باسقالارى)، جاعىمسىز تاۋەلدىلىگىن، ەسىرتكى، پسيحوتروپتىق، پسيحيكالىق جانە فيزيكالىق تاۋەلدىلىك تۋعىزاتىن وزگە دە پسيحواكتيۆتى زاتتاردى تۇتىنۋ تۇتىنباۋىن انىقتاۋ. سونىمەن قاتار قىزمەت اتقارۋعا كەدەرگى كەلتىرەتىن جاسىرىن سىرقاتتارىن، ءوز-وزىنە قول جۇمساۋعا بەيىمدىگىن، تابىسى تۋرالى، مۇلكى جانە مۇلىكتىك سيپاتتاعى مىندەتتەمەلەرى، قوس ازاماتتىعىنىڭ بار بولۋى تۋرالى مالىمەتتەردى جاسىرۋىن نەمەسە بۇرمالاۋىن انىقتاۋ مىندەتىن كوزدەيدى، - دەلىنگەن قۇجاتتا.

ودان بولەك، لاۋازىمدى تۇلعانىڭ سىبايلاس جەمقورلىق قۇقىق بۇزۋشىلىق جاساۋىنىڭ، بوگدە ادامدارعا قۇپيا نەمەسە قىزمەتتىك اقپارات بەرۋىنىڭ فاكتىلەرى تەكسەرىلەدى.

- قىلمىستىق، سىبايلاس جەمقورلىق قۇقىق بۇزۋشىلىقتار جاساعانى ءۇشىن جاۋاپقا تارتىلۋ فاكتىلەرى، تىيىم سالىنعان قوعامدىق بىرلەستىكتەرمەن، قىلمىستىق جانە تەرروريستىك ۇيىمدارمەن قاتىناس جاساۋىن نەمەسە ەگەر بۇل بۇرىن ولاردىڭ قىزمەتتىك مىندەتتەمەلەرىنە كىرمەگەن بولسا، كوممەرتسيالىق قۇرىلىمدارعا قاتىسۋىن، قىزمەتتىك وكىلەتتىگىن تەرىس پايدالانۋ فاكتىلەرىن انىقتاۋ، - دەلىنگەن باس پروكۋراتۋرا حابارلاماسىندا.

ەسكە سالا كەتسەك، سەنات بىلتىر جەلتوقساندا قۇقىق قورعاۋ ورگاندارىنداعى تاعايىنداۋعا قاتىستى، جوسپاردان تىس پوليگرافولوگيالىق تەكسەرۋ ەنگىزۋ تۋرالى زاڭدى ماقۇلدادى.

اۆتور

داۋلەت ىزتىلەۋ