قۇنى - 3 ميلليارد تەڭگە: «مەدەۋ» تابيعي پاركىندە زاڭسىز بەرىلگەن جەر قايتارىلدى
الماتى. KAZINFORM - مەدەۋ اۋدانىنىڭ پروكۋراتۋراسى «مەدەۋ» تابيعي پاركىندە زاڭسىز بەرىلگەن جەر تەلىمدەرىن انىقتادى.
الماتى قالاسىنىڭ پروكۋراتۋراسىنىڭ مالىمەتىنشە، ەرەكشە قورعالاتىن تابيعي اۋماقتاردى الىپ جاتقان جەرلەر، جەكە مەنشىكتە بولا المايدى. الايدا 2020 -جىلى تابيعي پارك اۋماعىندا جەكە تۇلعالار اۋدانى 35 گ ا 10 جەر ۋچاسكەسىنە مەنشىك قۇقىعىن تىركەگەن.
بۇعان گورنووكتيابر اۋىل اكىمشىلىگىنىڭ 1994-1997 -جىلدارداعى جەر ۋچاسكەلەرىن ءبولۋ تۋرالى شەشىمدەرىنىڭ بار ەكەندىگى جونىندە مۇراعاتتىق انىقتامالار نەگىز بولدى.
مۇراعاتتىق انىقتاما قۇقىق بەلگىلەيتىن قۇجات بولىپ تابىلمايتىنىنا قاراماستان، تىركەۋشى ورگان مەنشىك قۇقىعىن زاڭسىز تىركەگەن.
الماتى قالاسىنىڭ پروكۋراتۋراسى اتالعان انىقتامالاردى جانە جەر تەلىمدەرىن يەلىكتەن شىعارۋ جونىندەگى كەيىنگى مامىلەلەردى جارامسىز دەپ تانۋ تۋرالى سوتقا جۇگىندى.
سوت شەشىمىمەن پروكۋروردىڭ تالاپ-ارىزدارى قاناعاتتاندىرىلىپ، «مەدەۋ» تابيعي پاركىنە كاداسترلىق قۇنى 3 ميلليارد تەڭگە سوماسىنداعى جەر قايتارىلدى.
سونىمەن قاتار سوتقا قاتىسۋدى قامتاماسىز ەتكەن مەدەۋ اۋدانى پروكۋراتۋراسىنىڭ ءوتىنىشحاتى بويىنشا مەنشىك قۇقىعىن تىركەۋ كەزىندە جىبەرىلگەن بۇزۋشىلىقتار ءۇشىن سوت كىنالى تۇلعالاردىڭ جاۋاپتىلىق ماسەلەسىن قاراۋ جونىندە جەكە ۇيعارىم شىعاردى.
اۆتور
ەلميرا ورالبايەۆا
