قۋلىعىنا قۇرىق بويلامايتىن ءۇش ۇرى

استانا. قازاقپارات - ديقان ەسەگى مەن ەشكىسىن بازارعا اپارىپ ساتپاقشى بولىپتى. ەكەۋىن ەكى قولىنا جەتەلەپ جولدا كەلە جاتسا، جول شەتىندە ءۇش ادام تۇر ەكەن. بۇلار وسى جولدى تورىعان كانىگى ۇرىلار ەكەن. ءبىرىنشى ۇرى: «مەن مىنا سورلىنىڭ ەشكىسىن ۇرلاپ كەتەمىن»، - دەيدى.

коза ешкі
Фото: Максат Шагырбаев/ Kazinform

ەكىنشىسى: «مەن ونىڭ قولىنداعى ەسەگىن ۇرلاپ كەتە الامىن»، - دەپتى. ءۇشىنشى ۇرى: «بۇلاردىڭ ءبارى قيىن ەمەس، مەن ونىڭ ۇستىندەگى كيىمىن دە ۇرلاپ كەتە الامىن»، - دەپتى.

ءبىرىنشى ۇرى ءبىر باسىپ، ەكى باسىپ بارىپ ەشكىنىڭ مويىنىنداعى قوڭىراۋىن شەشىپ الىپ، ەسەكتىڭ قۇيرىعىنا بايلاپتى دا، ەشكىنى جەتەكتەپ جاپان دالاعا قاراي كەتە بەرىپتى.

الگى ديقان ءبىر بۇرىلىسقا كەلىپ ارتىنا قاراسا، ەشكىسى جوق، سونىمەن ەشكىسىن ىزدەي باستايدى. وسى كەزدە، ەكىنشى ۇرى كەلىپ ديقاننان نە ىزدەپ جۇرگەنىن سۇرايدى.

ديقان ەشكىسىن ۇرى الىپ كەتكەنىن ايتادى. ۇرى وعان: «مەن سەنىڭ ەشكىڭدى كوردىم، جاڭا عانا بىرەۋ ەشكىنى جەتەلەپ ورمانعا كىرىپ كەتتى»، - دەيدى.

الگى ديقان ەسەكتى ۇرىعا قاراي تۇرۋعا تاپسىرادى دا، ءوزى ەشكىنى ىزدەۋگە كەتەدى. سونىمەن ەكىنشى ۇرى دا ەسەكتى جەتەلەپ، قالاعان جاعىنا كەتە بەرەدى.

ديقان ورماندى ارالاپ، ەشكىسىن تابا الماي قايتىپ كەلسە ەسەگى جوق بولىپ شىعادى. وسىلايشا ول جىلاي ءجۇرىپ كۇرە جولمەن العا تارتادى.

كەنەت ديقان جولدىڭ بويىنداعى كولشىكتىڭ جاعاسىندا بىرەۋدىڭ جىلاپ وتىرعانىن كورەدى دە، ودان نە بولعانىن سۇرايدى. الگى ادام: «ماعان بىرەۋ ءبىر دوربا التىندى ارقالاپ قالاعا كىرۋدى تاپسىرعان ەدى، ءبىراق مەن وسى كولشىكتىڭ بويىنا كەلىپ دەمالىپ وتىرىپ ۇيىقتاپ كەتىپپىن. تۇسىمدە الگى ءبىر دوربا التىندى سۋعا تاستاپ جىبەرىپپىن. ويانا كەلسەم شىنىمەن دە التىن سۋعا باتىپ كەتىپتى»، - دەيدى.

ديقان ودان: «نە ءۇشىن سۋعا ءتۇسىپ ونى الىپ شىقپايسىڭ؟» دەپ سۇرايدى.

الگى ادام: «مەن سۋدان قورقامىن، ءجۇزۋ بىلمەيمىن، ەگەر كىمدە-كىم سول ءبىر دوربا التىندى سۋدان الىپ شىقسا، سوعان جيىرما جارماق التىن بەرەمىن»، - دەيدى.

ديقان ىشتەي قۋانىپ: «جاراتۋشى مالىمنىڭ ۇرلانعانىن كورىپ، باعىمدى جاندىرعالى تۇر ەكەن»، - دەپ ويلايدى.

سونىمەن ديقان كيىمىن شەشىپ سۋعا سەكىرىپ تۇسەدى. سۋدان التىن تۇگىلى، تەمىردىڭ سىنىعىن دا تابا الماپتى. جاعاعا شىعىپ كيىمىنىڭ دە ۇرلانعانىن كورىپ، باسىن شەڭبەكتەي قۇلاي كەتكەن ەكەن.

دايىنداعان: سۇڭقار اقبوز

سوڭعى جاڭالىقتار