قۇلجا تاسجولى التى جولاققا دەيىن كەڭەيتىلمەك
الماتى. KAZINFORM - الماتىدا قۇلجا تاسجولى التى جولاققا دەيىن كەڭەيتىلمەك. بۇل اتالعان ۋچاسكەنىڭ وتكىزۋ قابىلەتىن 2 ەسەگە ارتتىرادى.
«الماتىدا 4-ماۋسىمدا رىسقۇلوۆ داڭعىلىنان بۇقتىرما كوشەسىنە دەيىن قۇلجا تاس جولىن قايتا جاڭارتۋ باستالادى. بۇل جۇمىس اياسىندا جولدى 4 جولاقتان 6 جولاققا دەيىن كەڭەيتۋ جوسپارلانعان، بۇل ۋچاسكەنىڭ وتكىزۋ قابىلەتىن ەكى ەسەگە ارتتىرۋعا مۇمكىندىك بەرەدى»، - دەپ اتاپ ءوتتى قالالىق اكىمدىكتەن.
جالپى، ۇزىندىعى 2,3 شاقىرىم جولدى قايتا جاڭارتۋ كوزدەلگەن. جول بويىن كەڭەيتۋ ارقىلى ءار باعىتتا 3 جولاق سالىنادى. بۇل شارا اۋماقتىڭ وتكىزۋ قابىلەتىن تاۋلىگىنە 40 مىڭ اۆتوكولىكتەن 80 مىڭعا دەيىن ارتتىرادى.
سونىمەن قاتار، جول جيەگىنە توسقاۋىل قورشاۋىن، جول بويىن جارىقتاندىرۋ جانە سۋ بۇرۋ تىرەكتەرىن ورناتۋ جوسپاردا. جاياۋ جۇرگىنشىلەردىڭ قاۋىپسىزدىگىن قامتاماسىز ەتۋ ءۇشىن ەكى جاعىنان ەنى 2-دەن 3 مەترگە دەيىنگى تروتۋار جابدىقتالادى.
«جول بويىن قايتا جاڭارتۋ جۇمىستارى ءۇش كەزەڭگە بولىنگەن. ءبىرىنشى كەزەڭدە جولدىڭ باتىس جاعى، ەكىنشىسى ورتالىق بولىگى، ءۇشىنشىسى شىعىس جاعىندا جۇمىس ىستەلەدى. ءبىراق ءاربىر كەزەڭدە ەكى باعىتتا دا قوزعالىس شەكتەلمەيدى. ءاربىر ۋچاسكەدەگى جۇمىستىڭ ۇزاقتىعى شامامەن ءبىر ايعا سوزىلادى. جول بويىنىڭ بۇكىل ەنى بويىنشا جولدى تاڭبالاۋ جانە بەلگىلەر ورناتۋ ارقىلى قوزعالىستى وسى جىلدىڭ 25-تامىزىنا دەيىن اشۋ جوسپارلانعان»، - دەپ حابارلادى اكىمدىكتەن.
بىلتىر بۇقتىرما كوشەسى مەن قۇلجا تاس جولىنىڭ قيىلىسىنداعى جولايىرىقتا، دالىرەك ايتقاندا، بۇقتىرما كوشەسى بويىندا 4 جولاقتى اۆتوتۋننەل اشىلعان بولاتىن.
سونداي-اق بيىل سەيفۋللين داڭعىلى مەن جانسۇگىروۆ كوشەسىنىڭ قيىلىسىندا جولايرىقتى اشۋ جوسپاردا.
جوبا اياسىندا سەيفۋللين داڭعىلىندا كولىكتەردىڭ كەدەرگىسىز ءجۇرۋى ءۇشىن جالپى ۇزىندىعى 690 مەتر بولاتىن ەكى تۇنەل سالۋ كوزدەلگەن. جانسۇگىروۆ كوشەسىندە 4 جەر ءۇستى جاياۋ جۇرگىنشىلەر وتكەلى سالىنىپ، تروتۋارلار جانە كوگالداندىرۋ قاراستىرىلعان.
اۆتور
الما مۇقانوۆا
