قازپوشتا جوعالعان سالەمدەمەلەردى ارزان باعاعا ساتىپ جاتقانى راس پا

استانا. KAZINFORM - الەۋمەتتىك جەلىلەردە قازپوشتا جوعالعان سالەمدەمەلەردى تومەن باعاعا ساتادى دەگەن جالعان حابارلامالار تاراپ جاتىر.

وسى اقپاراتقا قاتىستى قازپوشتا اق مالىمدەمە جاسادى.

- بۇل اقپارات شىندىققا سايكەس كەلمەيتىنىن حابارلايمىز. مۇنداي ۇسىنىستارعا سەنبەڭىزدەر جانە جەكە دەرەكتەرىڭىزدى ەشكىمگە ايتپاڭىز، - دەپ جازىلعان مالىمدەمەدە.

ايتا كەتۋ كەرەك، قازپوشتا مەكەنجايى دۇرىس كورسەتىلمەگەن سالەمدەمەنى جىبەرۋشىگە كەرى قايتارادى.

- ەگەر وسىنداي حابارلامالاردى كورسەڭىز نەمەسە كۇماندى سىلتەمەلەرمەن بەتپە-بەت كەلسەڭىز، دەرەۋ ءبىزدىڭ رەسمي بايلانىس ورتالىعىمىزعا حابارلاسىڭىز: 1499.

ءسىزدىڭ قاۋىپسىزدىگىڭىز ءبىز ءۇشىن ماڭىزدى! - دەپ ەسكەرتتى ۇلتتىق كومپانيادان.

بۇعان دەيىن اۋىلدىق جەرلەردەگى «قازپوشتا» بولىمشەلەرى مەملەكەتتىك قىزمەتتەر كورسەتۋى مۇمكىن ەكەنىن جازعانبىز.