«قازمۇنايگاز» قازىرگى 80 مىڭ جۇمىس ورىنىن 50 جىل بويى ۇستاپ تۇرا الادى - اسحات حاسەنوۆ
استانا. KAZINFORM - «قازمۇنايگاز» كومپانياسىنىڭ باسقارما ءتوراعاسى اسحات حاسەنوۆ ب ا ق وكىلدەرىمەن وتكەن باسپا ءسوز ءماسليحاتىندا قازىرگى جۇمىس ورىندارىن نەشە جىل بويى ۇستاپ تۇرا الاتىندارىن ايتتى.
«قازىرگى تاڭدا «قازمۇنايگاز» ۇلتتىق كومپانياسىنا تيەسىلى مۇنايدىڭ قورى 780 ميلليون توننا. جىلدىق مۇناي ءوندىرۋ دەڭگەيىمىز ورتا ەسەپپەن - 24 ميلليون توننا. وسى 800 ميلليون توننا مۇنايدى 20 ميلليون تونناعا بولەدى دە، 40 جىلدىق قورى بار دەپ ەسەپتەپ جاتادى. بۇل ماتەماتيكالىق تۇرعىدان دۇرىس. ءبىراق جىل سايىن مۇناي قورىن وسىرۋگە جۇمىس ىستەپ جاتىرمىز. گەولوگيالىق بارلاۋ جۇمىستارى جۇرەدى. ياعني، 780 ميلليون توننا دەگەن قاتىپ قالعان، ەشقاشان وسپەيتىن كورسەتكىش ەمەس. جاڭاعى ايتىپ وتىرعان 50 مىڭ ءوز ادامدارىمىز بەن 30 مىڭ مەردىگەرلەردىڭ جۇمىسشىلارىن جۇمىسپەن قامتاماسىز ەتۋ - ءبىزدىڭ مىندەتىمىز»، - دەدى كومپانيا باسشىسى.
اسحات حاسەنوۆ كومپانيا وڭدەۋ سالاسىن دامىتۋ ارقىلى دا جۇمىس ورىندارىن قىسقارتپاي ۇستاپ تۇرۋعا مۇمكىندىك بار ەكەنىن ايتادى.
«تەك مۇناي ءوندىرۋ ارقىلى عانا جۇمىس ورىندارىن ۇستايمىز دەگەن ۇستانىم بولماۋ كەرەك. بىزدە مۇناي وڭدەۋ بار. مۇناي- گاز- حيميا دەيتىن جاڭا باعىت قارقىن الىپ كەلەدى. مىسالى پوليەتيلەن، كارباميد، پوليەتيلەنتەرەفتالات جوبالارى ىسكە قوسىلعاندا 2 مىڭنان استام ادام، قۇرىلىس كەزىندە 15 مىڭ جۇمىسشى قاجەت بولادى. ءبىز ءوز ۇجىمىمىزدىڭ ىشىندە قاجەت بولعان جاعدايدا جاڭا جوبالارعا وقىتىپ، قايتا دايارلاي الامىز. قازىرگى تاڭدا جۇمىس ورنى قىسقارادى دەگەن ەشقانداي قاۋىپ جوق. 780 ميلليون توننانى 40 جىل دەپ ءبولىپ وتىرمىز عوي. ءبىراق 80 مىڭ جۇمىسشىنىڭ ءبارى مۇناي وندىرىسىندە عانا جۇرگەن جوق. مۇنايمەن بايلانىستى ونەركاسىپتىڭ بىرنەشە سالاسىندا ءجۇر. سوندىقتان كەم دەگەندە 50 جىل بويى قازىرگى جۇمىس ورىندارىن ۇستاپ تۇرا الامىز دەگەن جوسپار بار. ويتكەنى جاڭا كەن ورىندارى اشىلادى، مۇناي- گاز- حيميانىڭ جاڭا باعىتتارى پايدا بولىپ جاتىر»، - دەدى ول.
اۆتور
ەسىمجان ناقتىباي
