قازاقتىڭ تۇڭعىش ديكتورى 103 جاسقا اياق باستى
زۇلقيا جۇماتوۆا بيىل 103 جاسقا اياق باستى. «ءومىر ءوتىپ بارادى كورگەن تۇستەي...». اڭىزعا اينالعان اپامىزدىڭ ءومىرى مەن شىعارماشىلىعىنا ارنالعان كىتاپ جارىق كوردى.
كىتاپتا قازاق تەلەۆيزياسى مەن ونىڭ باستاۋىندا تۇرعان زۇلقيا جۇماتوۆانىڭ ەڭبەك جولىنداعى ەرەكشە ساتتەرى قامتىلعان. بيىل 103 جاسقا تولعان زۇلقيا مۇقان قىزى 1920-جىلى پاۆلودار وبلىسىنىڭ باياناۋىل اۋدانىندا دۇنيەگە كەلگەن. 1958 -جىلى الماتى تەلەستۋدياسى اشىلعان كەزدە «بالالار باعدارلاماسىنا رەداكتور بولام»، - دەپ كەلەدى.
سول كەزدە رەجيسسەر شاكەن ايمانوۆ زۇلقيا مۇقان قىزىنىڭ داۋىسى مەن سويلەۋ مانەرىنىڭ ەرەكشەلىگىن بايقاپ، ديكتورلىققا كەلگەن 750 ۇمىتكەردىڭ ىشىنەن تاڭداپ الادى.
«مادەنيەت مينيسترلىگىنىڭ وكىلدەرى باستاعان كوميسسيا 20 كىسىدەن تۇردى. ولار اقىلداسىپ بولعان سوڭ، «ءسىز ءبىراۋىزدان وتەسىز» دەدى. ارتىنان بىلگەنىمدەي، باعانادان بەرى مەنىمەن تىلدەسكەن شاكەن ايمانوۆ ەكەن. قاسىما كەلىپ ريزاشىلىعىن ءبىلدىردى. سول كەزدە 1 ورىنعا 750 ادام ۇمىتكەر بولىپتى. ءدال وسىلايشا، قازاق تەلەديدارىنداعى تۇڭعىش ديكتور بولۋ باقىتى مەنىڭ ماڭدايىما بۇيىردى»، - دەپ ەسكە الادى ز. جۇماتوۆا.
سول جىلى ماسكەۋدە وتكەن قازاق ادەبيەتى مەن ونەرىنىڭ ونكۇندىگىندە تەلەحابارلار مەن جاڭالىقتاردىڭ جۇرگىزۋشىسى رەتىندە قاتىسىپ، يۋريي لەۆيتان، نينا كوندراتوۆا سياقتى بۇكىل وداققا تانىمال ديكتورلارمەن قاتار ديكتورلىق ونەردىڭ قۇپياسىمەن تانىسادى. زۇلقيا جۇماتوۆا قارا شاڭىراقتا 1958 -جىلدان 1970 -جىلعا دەيىن قىزمەت ەتتى.
لاسكەر سەيىتوۆ، قازاق تەلەۆيزياسىنىڭ ارداگەرى:
- 1962-جىلى 20 -قازاندا ديكتور بولىپ قابىلدانعانىمدا ءبىرىنشى كورگەن ادامىم زۇلقيا جۇماتوۆا ەدى. اللا تاعالا بۇل كىسىنىڭ بويىنا ءبارىن سىيدىرىپ بەرگەن. اقىل بەرگەن. ءتۇر بەرگەن. داۋىس بەرگەن. يناباتتىلىق بەرگەن. ادامنىڭ ەكرانعا شىققاندا ءجۇزى جىلى بولۋى كەرەك. سول جىلىلىق كورەرمەندەرگە اسەر ەتەدى.
www.24.kz
