قازاقتان شىققان رەسەيلىك ساياساتكەر امان تولەيەۆ ومىردەن ءوتتى

كەمەروۆو وبلىسىن 2018 - جىلعا دەيىن 20 جىل باسقارعان امان تولەيەۆ 80 جاسقا قاراعان شاعىندا قايتىس بولدى. قارالى حاباردى ايماق باسشىسى سەرگەي سيۆيليەۆ ۆكونتاكتە پاراقشاسىندا جەتكىزدى، دەپ حابارلايدى Kazinform.

«1997- جىلدان 2018- جىلعا دەيىن كەمەروۆو وبلىسىنىڭ گۋبەرناتورى بولعان امان عۇمىر ۇلى تولەيەۆ ومىردەن ءوتتى. ول بار عۇمىرىن كۋزباس پەن رەسەيگە قىزمەت ەتۋگە ارناعان جارقىن، ەرەكشە ادام. بۇل - ورنى تولماس قازا. ءبىزدىڭ ايماقتىڭ تۇتاس ءداۋىرى امان عۇمىر ۇلىمەن بايلانىستى: ول كەنشىلەر ترانس ءسىبىر تەمىر جولىنداعى قوزعالىستى بوگەپ، رەلستە وتىرعان قيىن- قىستاۋ كەزەڭدە ونى باسقارىپ، داعدارىستان الىپ شىقتى»، - دەپ جازدى ول.

امان تولەيەۆ - نوۆوسيبيرسك تەمىر جول ينجەنەرلەرى ينستيتۋتىن (1973)، قوعامدىق عىلىمدار اكادەمياسىن (1989) بىتىرگەن. ەڭبەك جولىن 1964- جىلى كەمەروۆ وبلىسىندا تەمىر جولشى بولىپ باستادى. 1973 - 1985- جىلدارى مەجدۋرەچەنسك تەمىر جول ستانسياسىنىڭ باستىعى، 1985 - 1988- جىلدارى كەمەروۆو وبلىستىق پارتيا كوميتەتىندە كولىك جانە بايلانىس ءبولىمىنىڭ مەڭگەرۋشىسى، 1988 - 1990-جىلدارى كەمەروۆو تەمىر جولىنىڭ باستىعى بولدى. 1990- 1993- جىلدارى ر ف جوعارعى كەڭەسىنىڭ دەپۋتاتى، كەمەروۆو وبلىستىق حالىق دەپۋتاتتارى كەڭەسىنىڭ ءتوراعاسى، 1994 - 1996- جىلدارى كەمەروۆو وبلىستىق زاڭ شىعارۋشى جينالىستىڭ ءتوراعاسى، 1996 - 1997- جىلدارى ر ف- نىڭ ت م د ەلدەرىمەن قارىم- قاتىناس ءمينيسترى قىزمەتتەرىن اتقاردى. 1997- جىلدان كەمەروۆو وبلىسىنىڭ گۋبەرناتورى. 3 رەت (1991، 1996، 2000) ر ف پرەزيدەنتتىگىنە كانديدات بولىپ تىركەلدى.

رەسەيدىڭ، ۋكراينانىڭ، قازاقستاننىڭ، بەلارۋستىڭ، موڭعوليانىڭ كوپتەگەن وردەندەرىمەن ماراپاتتالعان. ساياسي تۇلعا رەتىندە بىرنەشە رەت قازاقستاندا رەسمي ساپارمەن بولىپ قايتقان.

اۆتور

ەركەجان سماعۇلوۆا