قازاقستاندىقتار ءتولقۇجات پەن جەكە كۋالىكتى تەرمينالدار ارقىلى الا الادى
استانا. قازاقپارات - «ادىلەت» ا ق ج سايتىندا سيفرلىق دامۋ مينيسترلىگى مەن ىشكى ىستەر مينيسترلىگىنىڭ بىرلەسكەن بۇيرىعى جاريالاندى. وندا «بيومەتريالىق قۇجاتتاۋ تەرمينالى» كەشەنىن پايدالانا وتىرىپ، قازاقستان ازاماتتارىنا ءتولقۇجات پەن جەكە كۋالىك بەرۋ بويىنشا پيلوتتىق جوبا تۋرالى ايتىلعان، دەپ حابارلايدى «24KZ».
بۇيرىقتا كورسەتىلگەندەي، قازاقستاندىقتار ءتولقۇجات پەن جەكە كۋالىكتى ارنايى تەرمينالدار ارقىلى رەسىمدەي الادى. بۇل ءتاسىل كەزەك كۇتۋدى جانە كوشى-قون قىزمەتىنىڭ ماماندارىنا جۇگىنۋدى قاجەت ەتپەيدى. تەرمينالدار استانا، الماتى، شىمكەنت قالالارىنداعى، وبلىس ورتالىقتارىنداعى جانە بايقوڭىرداعى «ازاماتتارعا ارنالعان ۇكىمەت» فرونت-وفيستەرىندە ورناتىلادى.
«جەكە كۋالىك بويىنشا قۇجاتتاۋ تەك ونىڭ قولدانىلۋ مەرزىمى وتكەن جاعدايدا عانا جۇزەگە اسىرىلادى. قىزمەت جەكە كۋالىكتىڭ قولدانىلۋ مەرزىمى اياقتالۋىنا 30 نەمەسە ودان از كۇن قالعاندا نەمەسە مەرزىمى 10 كۇنتىزبەلىك كۇننەن اسپايتىن ۋاقىت وتكەن جاعدايدا عانا كورسەتىلەدى. قۇجاتتاۋدىڭ باسقا سەبەپتەرى بويىنشا قىزمەت ەلەكتروندىق ۇكىمەت پورتالى جانە موبيلدى قوسىمشالار ارقىلى كورسەتىلمەيدى. بۇل جاعدايدا قىزمەت الۋشىعا «رەسىمدەۋ قولجەتىمدى ەمەس، ح ق ك و- عا جۇگىنىڭىز» دەگەن حابارلاما كەلەدى»، - دەلىنگەن قۇجاتتا.
قىزمەتتى 28--تامىزدان باستاپ پايدالانۋعا بولادى.
