قازاقستاندىق ونكولوگتار ءسۇت بەزىن قالپىنا كەلتىرۋدىڭ جاڭا تەحنولوگياسىن ەنگىزدى
استانا. KAZINFORM - قازاقستاندىق ونكولوگتار وتاندىق بيوماتەريالدى پايدالانۋ ارقىلى ءسۇت بەزىن قالپىنا كەلتىرۋدىڭ جاڭا تەحنولوگياسىن ەنگىزدى. استاناداعى ۇلتتىق عىلىمي ونكولوگيا ورتالىعىندا ءبىر جارىم جىل ىشىندە 120-دان استام پاتسيەنتكە رەكونسترۋكسيالىق وپەراتسيا جاسالدى.
ۇلتتىق عىلىمي ونكولوگيا ورتالىعىنىڭ مالىمەتىنشە، ءسۇت بەزىن رەكونسترۋكسيالاۋدىڭ جاڭا ءادىسىن قولدانۋ باعدارلاماسى اياقتالدى. ونىڭ اياسىندا حيرۋرگتەر قاتەرلى ىسىكتى الىپ تاستاۋمەن قاتار، پاتسيەنتتەردىڭ ءسۇت بەزىن ءبىر وپەراتسيا بارىسىندا قالپىنا كەلتىرگەن.
2026 -جىلعى شىلدەدە وپەراتسيا كەزىندە قولدانىلاتىن وتاندىق بيوماتەريال مەديتسينالىق بۇيىم رەتىندە مەملەكەتتىك تىركەۋدەن ءوتتى. بۇل ونى عىلىمي جوبا شەڭبەرىنەن تىس كلينيكالىق تاجىريبەدە پايدالانۋعا مۇمكىندىك بەرەدى.
ءسۇت بەزى وبىرى قازاقستانداعى ايەلدەر اراسىندا ەڭ كوپ تارالعان ونكولوگيالىق اۋرۋ بولىپ وتىر. 2025 -جىلى ەلىمىزدە وسى دەرتتىڭ 5743 جاڭا جاعدايى تىركەلگەن.
ۇلتتىق سكرينينگ باعدارلاماسىنىڭ ناتيجەسىندە اۋرۋ ەرتە كەزەڭدەردە ءجيى انىقتالا باستاعان. سونىمەن قاتار ءولىمنىڭ ستاندارتتالعان كورسەتكىشى 100 مىڭ ايەلگە شاققاندا 16,6-دان 10,2 جاعدايعا دەيىن تومەندەگەن.
دارىگەرلەردىڭ ايتۋىنشا، بۇگىندە ونكولوگيالىق ەمنىڭ نەگىزگى مىندەتتەرىنىڭ ءبىرى - اۋرۋدى باقىلاۋدا ۇستاۋمەن قاتار، پاتسيەنتتەردىڭ ءومىر ساپاسىن ساقتاۋ.
وسى ماقساتتا ءبىر مەزگىلدىك رەكونسترۋكسيا ءادىسى قولدانىلادى. ياعني قاتەرلى ىسىك الىنىپ، سول وپەراتسيا كەزىندە يمپلانت كومەگىمەن ءسۇت بەزىنىڭ ءپىشىنى قالپىنا كەلتىرىلەدى.
- ايەل ادام ءۇشىن ەمنىڭ قانشالىقتى ءساتتى وتكەنى عانا ەمەس، وپەراتسيادان كەيىن ءوزىن قالاي سەزىنەتىنى دە ماڭىزدى. ءبىر مەزگىلدە رەكونسترۋكتسيا جاساۋ ىسىكتى الىپ تاستاۋ مەن ءسۇت بەزىن قالپىنا كەلتىرۋدى ءبىر حيرۋرگيالىق ارالاسۋ اياسىندا ورىنداۋعا مۇمكىندىك بەرەدى. بۇل - پاتسيەنتكە كورسەتىلەتىن كەشەندى كومەكتىڭ ماڭىزدى بولىگى، - دەدى ۇعوو تەرى جانە جۇمساق تىندەر ىسىكتەرى، رەكونسترۋكتيۆتى حيرۋرگيا سەكتورىنىڭ اعا ورديناتورى باۋىرجان ءاناپيا.
الەمدىك تاجىريبەدە يمپلانتتى سەنىمدى بەكىتۋ جانە تىندەرگە قاجەتتى قولداۋ كورسەتۋ ءۇشىن ارنايى تورلار مەن بيولوگيالىق ماتريتسالار پايدالانىلادى. الايدا ولاردىڭ يمپورتتىق تۇرلەرى قىمباتقا تۇسەدى.
وپەراتسيالاردىڭ قولجەتىمدىلىگىن ارتتىرۋ ءۇشىن ۇعوو ماماندارى قازاقستاندىق X- Matrix كومپانياسى وندىرەتىن X- Graft وتاندىق كوللاگەندى ماتريكسىن قولدانۋدى قولعا العان.
بۇل - جانۋار تەكتى اتسەلليۋليارلى كسەنوگەندىك بيوماتەريال. بۇعان دەيىن ول نەگىزىنەن كۇيىك پەن جارالاردى ەمدەۋدە پايدالانىلعان.
ال ءسۇت بەزىن قالپىنا كەلتىرۋ وپەراتسيالارىندا قولدانۋ ءۇشىن ماماندار قازاقستان رەسپۋبليكاسىنىڭ №11199 پايدالى مودەل پاتەنتىمەن قورعالعان ارنايى ادىستەمە ازىرلەگەن.
- ءبىزدىڭ ماقساتىمىز يمپورتتىق ماتەريالدى وتاندىق ونىممەن جاي عانا الماستىرۋ ەمەس ەدى. ونى ناقتى حيرۋرگيالىق مىندەتكە بەيىمدەۋ، ياعني يمپلانتقا قاجەتتى تىرەك قالىپتاستىرىپ، تىندەردىڭ قالپىنا كەلۋىنە جاعداي جاساۋ قاجەت بولدى. وسى ماقساتتا ونى قولدانۋدىڭ وزىندىك ادىستەمەسىن ازىرلەپ، تاجىريبەگە ەنگىزدىك، - دەدى حيرۋرگ.
باعدارلاما اياسىندا وتاندىق ماتريكستى پايدالانۋ ارقىلى 120-دان استام ءبىر مەزگىلدىك رەكونسترۋكتسيالىق وپەراتسيا ءساتتى جاسالعان. ولاردىڭ ناتيجەلەرى حالىقارالىق تاجىريبەمەن سالىستىرىلعان.
مەديتسينالىق بۇيىمنىڭ 2026 -جىلعى شىلدەدە رەسمي تىركەۋ كۋالىگىن الۋى جاڭا تەحنولوگيانى ەلىمىزدىڭ باسقا مەديتسينالىق ۇيىمدارىندا قولدانۋعا مۇمكىندىك بەرەدى.
- ءبىز ماڭىزدى كەزەڭنەن وتتىك: وتاندىق ماتريكس مەملەكەتتىك تىركەۋدەن ءوتتى جانە ەندى كلينيكالىق تاجىريبەدە قولدانىلا الادى. الايدا جۇمىسىمىز مۇنىمەن اياقتالمايدى. الداعى ۋاقىتتا پاتسيەنتتەردى باقىلاۋدى جالعاستىرىپ، ۇزاق مەرزىمدى ناتيجەلەر مەن تەحنولوگيانىڭ ەكونوميكالىق تيىمدىلىگىن باعالاۋىمىز قاجەت. بولاشاقتا مۇنداي رەكونسترۋكتسيالىق وپەراتسيالار استانا قالاسىندا عانا ەمەس، قازاقستاننىڭ وزگە وڭىرلەرىندەگى ايەلدەرگە دە قولجەتىمدى بولعانىن قالايمىز، - دەپ اتاپ ءوتتى باۋىرجان ءاناپيا.
ايتا كەتەيىك، بۇعان دەيىن قازاقستاندا «قىزعىلت قازان» حالىقارالىق اقپاراتتىق ناۋقانى اياسىندا وتكەن ءبىرىڭعاي اشىق ەسىك كۇنىندە 2198 ايەل دارىگەرلەردىڭ كەڭەسىن العانى حابارلانعان ەدى. تەكسەرۋ ناتيجەسىندە 54 ايەلدەن قاتەرلى ىسىككە كۇدىك تۋدىراتىن بەلگىلەر انىقتالعان.