قازاقستاندىق قۇتقارۋشىلار قانشا ادامدى امان الىپ قالدى

8 مىڭنان استام ادام قۇتقارىلعان

ەلىمىزدىڭ ازاماتتىق قورعاۋ سالاسىندا 29 مىڭنان استام مامان قىزمەت ەتەدى. ولاردىڭ قاتارىندا ءورت سوندىرۋشىلەر، سۇڭگۋىرلەر، كينولوگتار، دارىگەرلەر مەن پسيحولوگتار بار. ءارقايسىسىنىڭ مىندەتى ءارتۇرلى بولعانىمەن، ورتاق ماقساتى - توتەنشە جاعدايدىڭ سالدارىن ازايتىپ، ادام ءومىرىن ساقتاپ قالۋ.

جىل باسىنان بەرى قۇتقارۋشىلار 70 مىڭنان استام شاقىرتۋعا شىعىپ، 8 مىڭنان استام ادامدى قۇتقارعان. تاعى 9 مىڭنان استام ادام قاۋىپتى ايماقتاردان ەۆاكۋاتسيالانىپ، 3 مىڭعا جۋىق زارداپ شەككەن ادامعا مەديسينالىق كومەك كورسەتىلگەن. ەلىمىزدە جىل سايىن 18 مىڭنان استام تابيعي جانە تەحنوگەندىك توتەنشە جاعداي تىركەلەدى. ونىڭ شامامەن 12 مىڭى - ءورت.

مۇنداي جۇكتەمە قۇتقارۋشىلاردان كاسىبي دايىندىقتى، جەدەل ارەكەت ەتۋدى جانە كەز كەلگەن جاعدايعا ءازىر بولۋدى تالاپ ەتەدى. سوندىقتان سالادا مامانداردىڭ بىلىكتىلىگىن ارتتىرۋمەن قاتار، تەحنيكالىق مۇمكىندىكتەردى جەتىلدىرۋگە دە باسىمدىق بەرىلىپ وتىر.

جاڭا تەحنيكا مەن مىندەتتەر

سالاداعى جاڭارۋ قاۋىپتىڭ الدىن الۋ جۇيەلەرىن جەتىلدىرۋمەن قاتار، تەحنيكالىق جاراقتاندىرۋدان دا كورىنەدى. قازىر حالىققا توتەنشە جاعداي تۋرالى جەدەل حابار بەرەتىن Mass Alert جۇيەسى ەنگىزىلىپ جاتىر. مۇنداي جۇيەلەر قاۋىپ تۋرالى اقپاراتتى ۋاقىتىلى جەتكىزۋگە جانە تۇرعىنداردىڭ قاجەتتى شارالاردى ەرتەرەك قابىلداۋىنا مۇمكىندىك بەرەدى. تەحنيكانى جاڭارتۋ جۇمىستارى دا كەزەڭ-كەزەڭىمەن جۇرگىزىلۋدە.

- 2024- 2026 -جىلدارى توتەنشە جاعدايلار مينيسترلىگىنىڭ تەحنيكا پاركى 1468 بىرلىك تەحنيكامەن تولىقتى. ونىڭ 700- ءى - ءورت ءسوندىرۋ ماشينالارى. بۇعان قوسا 45 ءورت ءسوندىرۋ دەپوسى مەن 16 قۇتقارۋ بولىمشەسى سالىنىپ، 350-دەن استام نىسان جاڭعىرتىلىپ، جوندەۋدەن ءوتتى، - دەلىنگەن ۆەدومستۆونىڭ اقپاراتىندا.

جاڭارتۋ جۇمىستارى اۆياتسيانى دا قامتىدى. مينيسترلىك العاش رەت ۇشاقتار مەن باسقا دا اۋە كەمەلەرىن ساتىپ الىپ، پاركىن 13 زاماناۋي اۋە كەمەسىمەن تولىقتىردى. ولار ىزدەستىرۋ-قۇتقارۋ جۇمىستارىنا، تابيعي ورتتەردى سوندىرۋگە، گۋمانيتارلىق جۇكتەردى جەتكىزۋگە جانە ناۋقاستاردى مەديسينالىق ەۆاكۋاتسيالاۋعا پايدالانىلادى. سونىمەن قاتار سەيسميكالىق باقىلاۋ جۇيەلەرى جاڭارتىلىپ، ونەركاسىپتىك قاۋىپسىزدىك شارالارى كۇشەيتىلدى.

تەحنيكالىق مۇمكىندىكتەردىڭ ارتۋىمەن بىرگە مينيسترلىكتىڭ مىندەتتەرى دە كەڭەيدى. ۇكىمەتتىڭ 2026 -جىلعى 18-تامىزداعى قاۋلىسىمەن شاعىن كولەمدى كەمەلەردىڭ قاۋىپسىز پايدالانىلۋىن باقىلاۋ، قۇجاتتارىن تەكسەرۋ جانە زاڭ بۇزۋشىلىقتاردىڭ الدىن الۋ مىندەتتەرى قوسىلدى. ال الماتىدا اپاتقا ۇشىراعان تۋريستەرگە كومەك كورسەتۋ «بارىس» رەسپۋبليكالىق قۇتقارۋ قىزمەتىنە جۇكتەلدى. بۇل وزگەرىستەر ازاماتتىق قورعاۋ سالاسىنىڭ مىندەتتەرى توتەنشە جاعدايدىڭ سالدارىن جويۋمەن عانا شەكتەلمەيتىنىن كورسەتەدى.

ادام ومىرىنە اراشا تۇسەتىن ماماندار

تەحنيكانىڭ جاڭارۋى مەن جاڭا جۇيەلەردىڭ تيىمدىلىگى توتەنشە ساتتە دۇرىس شەشىم قابىلدايتىن مامانداردىڭ بىلىكتىلىگىنە دە بايلانىستى. ولاردىڭ ءبىرى زارداپ شەككەندەرگە مەديسينالىق كومەك كورسەتسە، ەندى ءبىرى جوعالعان ادامداردى ىزدەيدى. ال كومەككە شاقىرعان ازاماتتاردىڭ قوڭىراۋىن ديسپەتچەرلەر قابىلداپ، قاجەتتى قىزمەتتەردى وقيعا ورنىنا باعىتتايدى. وسىنداي مامانداردىڭ ءارقايسىسى قۇتقارۋ جۇمىستارىنىڭ ءوز مىندەتىنە ساي كەزەڭىن اتقارادى.

استانا قالاسى بويىنشا اپاتتار مەديتسيناسى ورتالىعى فيليالىنىڭ فەلدشەرى ەركەبۇلان مىرزابەكوۆ قاراعاندى وبلىسىنىڭ قارقارالى اۋدانىنداعى تابيعي ءورت كەزىندە جاۋاپتى مىندەت اتقارعان. ءورت سالدارىن جويۋ بارىسىندا قاۋىپتى ايماقتان 18 بالا مەن التى ەرەسەك ادام، ونىڭ ىشىندە ءۇش جۇكتى ايەل ەۆاكۋاتسيالاندى. ال ەركەبۇلان قاناي-1 قىستاعىنا جىبەرىلىپ، ءيىس ءتيىپ ۋلانعان بەس ادامعا العاشقى مەديسينالىق كومەك كورسەتتى.

زارداپ شەككەندەر اۋرۋحاناعا جاتۋدان باس تارتقان سوڭ، فەلدشەر تاڭعا دەيىن ولاردىڭ جاعدايىن باقىلاپ، ءتيىستى قىزمەتتەرگە اقپارات بەرىپ وتىرعان. ەڭبەگى ءۇشىن ول ۆەدومستۆولىق ناگرادامەن ماراپاتتالعان.

ال جوعالعان ادامداردى ىزدەۋدە كينولوگتار مەن ولاردىڭ سەنىمدى سەرىكتەرى ماڭىزدى ءرول اتقارادى. شىمكەنت قالاسى توتەنشە جاعدايلار دەپارتامەنتىنىڭ قۇتقارۋشى- كينولوگى سەرگەي زينوۆيەۆ كينولوگيا سالاسىنا 30 جىلدان استام ۋاقىتىن ارناعان. ءقازىر ول كينولوگيالىق بولىمشەنى باسقارىپ، ىزدەستىرۋ يتتەرىن دايىندايدى جانە جاس مامانداردىڭ كاسىبي شەبەرلىگىن ارتتىرۋعا ۇلەس قوسادى.

سەرگەيدىڭ سەنىمدى سەرىگى - نەمىس وۆچاركاسى دينكا. ول ميحايلوۆ سۋ قويماسى ماڭىندا 13 جاستاعى بالانى، سونداي-اق سايرام اۋدانىنىڭ شاپىراشتى اۋىلىندا جوعالعان ادامدى ىزدەۋگە قاتىسقان. جاقىندا دينكا رەسپۋبليكالىق سەرتيفيكاتتاۋ سىناقتارىنان ءساتتى ءوتتى. قازاق جانە ورىس تىلدەرىندەگى كوماندالاردى تۇسىنەتىن ءيتتىڭ دايىندىعى كۇندەلىكتى جاتتىعۋلار مەن جۇيەلى ەڭبەكتىڭ ناتيجەسى. ىزدەستىرۋ كەزىندە ءيتتىڭ دايىندىعى مەن كينولوگتىڭ ونى دۇرىس باعىتتاي ءبىلۋى جۇمىستىڭ ناتيجەسىنە تىكەلەي اسەر ەتەدى.

سەرگەيدىڭ كاسىبي دايىندىعى كينولوگيامەن شەكتەلمەيدى. ول حالىقارالىق قۇتقارۋ كومانداسىنىڭ مۇشەسى، سونداي-اق سۇڭگۋىر جانە الپينيست رەتىندە دە قىزمەت اتقاراتىنىن بىلدىك.

قۇتقارۋ جۇمىستارىنىڭ تاعى ءبىر ماڭىزدى كەزەڭى - شاقىرتۋدى قابىلداپ، ءتيىستى قىزمەتتەردى وقيعا ورنىنا باعىتتاۋ. بۇل مىندەتتى استانا قالاسىنىڭ جوسپارلاۋ جانە جەدەل باسقارۋ ورتالىعىنداعى ءورت ءسوندىرۋ قىزمەتىمەن بايلانىس جونىندەگى ورتالىق بايلانىس پۋنكتىنىڭ ديسپەتچەرى ايدانا ءىلياسوۆا اتقارادى. ول كۇن سايىن ازاماتتاردىڭ قوڭىراۋىن قابىلداپ، وقيعانىڭ ءمان- جايىن انىقتايدى جانە قاجەتتى اقپاراتتى ءتيىستى قىزمەتتەرگە جەتكىزەدى. مۇنداي جۇمىستا ءار مينۋتتىڭ ماڭىزى بار. وقيعا تۋرالى ناقتى مالىمەت الۋ قۇتقارۋشىلاردىڭ ارەكەتىن دۇرىس ۇيىمداستىرۋعا كومەكتەسەدى.

- ءبىز ءۇشىن ءاربىر قوڭىراۋ ماڭىزدى. تەلەفوننىڭ ار جاعىندا كومەككە مۇقتاج ادام تۇر. كەيدە بۇل قوڭىراۋ ونىڭ سوڭعى قوڭىراۋى بولۋى مۇمكىن. سوندىقتان ادامدى سابىرعا شاقىرۋ، وعان كومەك مىندەتتى تۇردە جەتەتىنىن جەتكىزۋ قاجەت، - دەدى ايدانا ءىلياسوۆا.

P. S. قۇتقارۋشىلاردىڭ جۇمىسى - ادام ءومىرىن ساقتاپ، قيىن ساتتە كومەككە كەلۋ. ولاردىڭ كاسىبيلىگى مەن جاۋاپكەرشىلىگى توتەنشە جاعداي كەزىندە تالاي ادامنىڭ امان قالۋىنا مۇمكىندىك بەرىپ وتىر.

اۆتورلار

ءمولدىر سنادين