قازاقستاندىق قاتەرلى ىسىككە قارسى ءدارى 2027 -جىلى شىعۋى مۇمكىن
استانا. قازاقپارات - قازاقستاندىق قاتەرلى ىسىككە قارسى ءدارى 2027 -جىلى پايدا بولۋى مۇمكىن، دەپ حابارلايدى «24KZ».
قازىرگى ۋاقىتتا پرەپارات پاتسيەنتتەرگە كلينيكالىق سىناقتاردىڭ ەكىنشى كەزەڭىنەن ءوتىپ جاتىر، سودان كەيىن ول تىركەۋدەن وتپەك. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى. ءمينيستردىڭ سوزىنشە، سىناقتار استاناداعى ونكولوگيالىق ورتالىق بازاسىندا جۇرگىزىلىپ جاتىر. قازىرگى كەزەڭدە ماماندار پرەپاراتتىڭ قاجەتتى مولشەرىن انىقتاپ، پاتسيەنتتەر اعزاسىنىڭ ونىڭ ءتۇرلى دوزاسىنا رەاكسياسىن زەرتتەپ جاتىر.
«قازىر پاتسيەنتتەرگە ناقتى دوزالاۋدى سىناۋ ءجۇرىپ جاتىر. بيىلعى جىلدىڭ اياعىنا دەيىن وسى پروتسەدۋرالاردىڭ بارلىعىن اياقتاپ، ءدارىنى تىركەۋگە ءوتىنىم بەرۋگە تىرىسامىز»، - دەدى ساياسات نۇربەك ۇكىمەتتە وتكەن بريفينگتە.
كلينيكالىق سىناقتىڭ ەكىنشى كەزەڭى اياقتالعاننان كەيىن راستالعان ناتيجە ساراپتاماعا جىبەرىلەدى. مينيستر بۇدان ءارى دارىلىك زاتتاردى ساراپتاۋ ۇلتتىق ورتالىعى ارقىلى پرەپاراتتى تىركەۋ پروتسەدۋراسى كۇتىپ تۇرعانىن ءتۇسىندىردى. قازىر ازىرلەۋشىلەر پرەپاراتتى تىركەۋ الدىنداعى سوڭعى كەزەڭدە تۇر.
