قازاقستاندىق ءوز اتى-ءجونىن قانشا رەت وزگەرتە الادى؟

 ەلدە اتى-ءجونىن وزگەرتۋگە قاتىستى ءوتىنىم ءجيى تۇسەدى. كەيبىرى ورفوگرافيالىق قاتەنى تۇزەتۋدى قالاسا، كەيبىرى ەسىم-سويىن تۇگەل اۋىستىرۋعا نيەتتى. بۇعان زاڭمەن تىيىم سالىنباعان. 16 جاسقا تولعان كەز كەلگەن ازامات ءتيىستى مەكەمەگە ءوتىنىم جولداي الادى.

 اسىلبەك دانيار، جۋرناليست

 - اتىمدى جىڭىشكە ارىپتەرمەن ايتىپ جىبەرگەن عوي ءاسىلبەك (Әсілбек) دەپ. ءسويتىپ سولاي جازىلىپ كەتكەن قۇجاتقا. شىنىمدى ايتسام، ءاسىلبەك دەگەن اتپەن ءجۇرۋ ىڭعايسىز بولدى. اتا-اناما بىرنەشە رەت ايتىپ كوردىم اتىمدى اسىلبەك دەپ اۋىستىرايىقشى دەگەن سەكىلدى. رۇقسات بەردى. بىردەن ح ق ك و- عا باردىم تۋۋ تۋرالى كۋالىگىممەن. پروتسەسس ءارى كەتسە، 1-2 اپتاعا عانا سوزىلدى.

نەكە جانە وتباسى تۋرالى كودەكسكە سايكەس، ادام اتى-ءجونىن 13 ءتۇرلى سەبەپپەن وزگەرتىنە بولادى. العاشقىسى - ەسىم- سويى ايتۋعا قيىن جانە وعاش ەستىلۋى. ودان كەيىنگى 6 تارماق ادام تەگىندەگى تۇزەتۋلەرمەن بايلانىستى. سەگىزىنشى سەبەپ - ورفوگرافيالىق قاتەلەردى تۇزەتۋ. ودان كەيىن ەكى ەسىمدى بولەك نەمەسە سىزىقشا ارقىلى جازۋ. ونىنشىسى - قۇجاتتاعى ەسىمدى كۇندەلىكتى ومىردە قولدانىلاتىن ەسىممەن الماستىرۋ. سونىمەن قاتار بالا اسىراپ الۋ جانە اتا-اناسىنىڭ اتى-ءجونى وزگەرۋى قۇجات اۋىستىرۋعا نەگىز بولادى. بۇعان قوسا، جىنىسىن حيرۋرگيالىق جولمەن وزگەرتكەندەر دە ءوزى تاڭداعان ەسىمدى الا الادى.

اتى-ءجونىن تۇزەتۋ جانە وزگەرتۋ سەبەپتەرى:

1. ەسىمىن ايتۋعا قيىن بولۋى نەمەسە وعاش ەستىلۋى؛

 2. تەگىن نەمەسە اكەسىنىڭ اتىن ۇلتتىق داستۇرگە سايكەستەندىرۋ؛

 3. نەكە قيۋ كەزىندە جۇبايىنىڭ تەگىن قابىلداۋ؛

 4. نەكە بۇزۋ كەزىندە تەگىن قايتا وزگەرتۋ؛

 5. بالا كۇنگى تەگىن قايتارۋ؛

6. ءىس جۇزىندە تاربيەلەگەن ادامنىڭ تەگىن الۋ؛

 7. جۇرناقتى الىپ تاستاۋ نەمەسە قوسۋ؛

 8. ورفوگرافيالىق قاتەنى تۇزەتۋ؛

 9. ەكى ەسىمدى بولەك نەمەسە سىزىقشا ارقىلى جازۋ؛

 10. كۇندەلىكتى ومىردەگى ەسىمىن زاڭداستىرۋ؛

 11. بالا اسىراپ الۋ نەمەسە قورعانشىلىققا بايلانىستى وزگەرىستەر؛

 12. اتا-اناسىنىڭ تەگى وزگەرگەن بالالاردىڭ قۇجاتىن اۋىستىرۋ؛

 13. حيرۋرگيالىق جولمەن جىنىسىن وزگەرتۋ.

التىنگۇل تىنىشتىقوۆا، «ازاماتتارعا ارنالعان ۇكىمەت» مەملەكەتتىك كورپوراتسياسى تىركەۋ قىزمەتى دەپارتامەنتىنىڭ باس مەنەدجەرى

- تەگىن، اتىن جانە اكەسىنىڭ اتىن وزگەرتۋ بويىنشا ازاماتتار وسى كودەكستىڭ (نەكە جانە وتباسى تۋرالى) 257-بابىنا سايكەس، تىركەۋشى ورگاندارعا جۇگىنەدى. كوبىنە ازاماتتار اتا-انالارىنىڭ ۇلتتارى ءارتۇرلى بولۋىنا بايلانىستى بەلگىلى ءبىر ۇلتتىڭ ەسىمىن العىسى كەلگەندە، سونداي-اق قۇجاتتاردا كورسەتىلگەن ەسىمنەن بولەك ومىردە قالىپتاسقان ەسىمدى يەلەنگىسى كەلگەندە جانە وزگە دە نەگىزدەر رەتىندە ءوتىنىش بەرەدى.

كەز كەلگەن ادام اتى-ءجونىن نەشە رەت وزگەرتسە دە، ءوز ەركى. زاڭمەن شەكتەۋ قويىلماعان. تەك تولقۇجاتپەن بىرگە وزگە دە قۇجاتتاردى اۋىستىرۋعا تۋرا كەلەدى. ياعني كوك پاسپورتتان باستاپ، كولىك جۇرگىزۋ كۋالىگى مەن بانك كارتالارىنا دەيىن جاڭارتۋعا دايىن بولىڭىز.

 التىنگۇل تىنىشتىقوۆا، «ازاماتتارعا ارنالعان ۇكىمەت» مەملەكەتتىك كورپوراتسياسى تىركەۋ قىزمەتى دەپارتامەنتىنىڭ باس مەنەدجەرى:

- مەملەكەتتىك كورپوراتسيا جالپى تۇرعىدا ستاتيستيكا جۇرگىزبەيدى. دەگەنمەن 2025 -جىلى تىركەۋشى ورگاندار تەگىن، اتىن، اكەسىنىڭ اتىن وزگەرتۋ بويىنشا تۋۋ، نەكە قيۋ، نەكە بۇزۋ تۋرالى اكت جازبالارىنا اتى-ءجونىن وزگەرتۋگە بايلانىستى 18763 ءوتىنىمدى قارادى. ال 2026 -جىلدىڭ العاشقى 9 ايىندا بۇل كورسەتكىش 14162 بولدى.

 اتى-ءجوندى وزگەرتۋ زاڭ جۇزىندە جاڭا ادامعا اينالعانىڭىزدى بىلدىرمەيدى. ويتكەنى جەكە سايكەستەندىرۋ ءنومىرى ەشقاشان وزگەرمەيدى. مەملەكەتتىك دەرەكتەر بازاسىندا بۇرىنعى مالىمەتتەر ساقتالىپ تۇرادى.

 24.kz