قازاقستاننىڭ ون نىسانىن يسەسكو مۇرا تىزىمىنە ەنگىزۋ پىسىقتالدى
استانا. KAZINFORM - الماتىدا ءال-فارابي مۇراسىنا ارنالعان حالىقارالىق سيمپوزيۋم اياسىندا ۆيتسە-پرەزيدەنت ەرلان قارين يسلام الەمىنىڭ ءبىلىم، عىلىم جانە مادەنيەت ۇيىمىنىڭ (يسەسكو) باس ديرەكتورى ساليم ءال-ماليكپەن كەزدەستى. بۇل تۋرالى اقوردانىڭ باسپا ءسوز قىزمەتى حابارلادى.
ەرلان قارين جاڭا كونستيتۋتسيانىڭ ماڭىزىنا توقتالىپ، باستى قۇجاتتا ادام كاپيتالىن دامىتۋ، ءبىلىم بەرۋ، عىلىم جانە يننوۆاتسيالاردى ىلگەرىلەتۋ ەلدىڭ ستراتەگيالىق باسىمدىعى رەتىندە بەكىتىلگەنىن اتاپ ءوتتى.
ۆيتسە-پرەزيدەنت ءال-فارابي مۇراسىن حالىقارالىق دەڭگەيدە ناسيحاتتاۋعا قولداۋ كورسەتىپ، تۇركىستان قالاسىن 2027 -جىلعى يسلام الەمىنىڭ مادەني استاناسى دەپ جاريالاۋ جونىندە شەشىم قابىلداعانى ءۇشىن يسەسكو باس ديرەكتورىنا مەملەكەت باسشىسى قاسىم-جومارت توقايەۆتىڭ العىسىن جەتكىزدى.
وسى ورايدا، تاراپتار تۇركىستان قالاسىندا بىرلەسكەن مادەني ءىس-شارالار وتكىزۋگە دايىندىق ماسەلەسىن، سونداي-اق ءال-فارابي مەن قوجا احمەت ياساۋي مۇراسىن عىلىمي تۇرعىدان زەردەلەۋگە جانە كەڭىنەن ناسيحاتتاۋعا قاتىستى جوبالاردى تالقىلادى.
سونىمەن قاتار قازاقستاننىڭ ون جاڭا نوميناتسياسىن يسەسكو- نىڭ يسلام الەمى مۇراسى تىزىمىنە ەنگىزۋ ءىسى پىسىقتالدى. بىرلەسكەن عىلىمي جانە ءبىلىم بەرۋ باعدارلامالارىن جۇزەگە اسىرۋ الەۋەتىنە نازار اۋدارىلدى.
ۆيتسە-پرەزيدەنت يسەسكو ۇيىمىمەن الەمدىك جانە ءداستۇرلى دىندەر ليدەرلەرى سەزى اياسىنداعى ىنتىماقتاستىقتىڭ باسىم باعىتتارىن ايقىندادى. ولاردىڭ قاتارىندا مەملەكەت باسشىسىنىڭ جاھاندىق بەيبىتشىلىك قوزعالىسىن قۇرۋ جونىندەگى باستاماسىن ىلگەرىلەتۋ، سونداي-اق الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXIV وتىرىسىندا قابىلدانعان قۇجاتتاردى جۇزەگە اسىرۋ ماسەلەلەرى بار.
كەزدەسۋ بارىسىندا ۇيىمنىڭ 2027 -جىلى وتەتىن حاتشىلىقتىڭ XXV وتىرىسىنا جانە 2028 -جىلى ۇيىمداستىرىلاتىن الەمدىك جانە ءداستۇرلى دىندەر ليدەرلەرىنىڭ IX سەزىنە دايىندىق جۇمىستارىنا قاتىسۋ جايى دا تالقىلاندى.
ايتا كەتەلىك ەسىك جازۋى مەن ءماشھۇر ءجۇسىپ جيناعى يۋنەسكو تىزىلىمىنە ەنگەن ەدى. سونىمەن قاتار قازاقتىڭ ءۇش بىردەي مادەني مۇراسى يۋنەسكو تىزىمىنە ۇسىنىلدى.
