قازاقستاننىڭ ەڭ قارت تۇرعىنى 116 جاسىندا دۇنيەدەن ءوتتى
ۇلىتاۋ. KAZINFORM - قازاقستانداعى ەڭ قارت تۇرعىن تۇيمەگۇل تەمىربايەۆا 116 جاسىندا ومىردەن وزدى. قارالى حاباردى ۇلىتاۋ وبلىسىنىڭ اكىمدىگى جەتكىزدى. وسىدان ەكى جىل بۇرىن Kazinform تىلشىسىنە سۇحبات بەرگەن عاسىر جاساعان اجە ۇزاق عۇمىر كەشۋىنىڭ سىرىن ايتىپ، بويىنداعى سەرگەكتىك پەن ومىرگە دەگەن قۇشتارلىعىن ساقتاۋعا نە كومەكتەسكەنىن بولىسكەن ەدى.
تۇيمەگۇل تەمىربايەۆا 1910 -جىلعى 1 -قاڭتاردا جامبىل وبلىسىنىڭ بايقادام اۋدانىندا دۇنيەگە كەلگەن. 22 جاسىندا ايازباي تەمىربايەۆپەن شاڭىراق كوتەرىپ، كوپ ۇزاماي جۇبايىمەن بىرگە جاڭاارقا اۋدانىنا قونىس اۋدارعان. سودان بەرى وسى وڭىردە 90 جىلدان استام ۋاقىت عۇمىر كەشتى.
ەرلى-زايىپتى ءتورت بالا تاربيەلەپ ءوسىردى. تۇيمەگۇل اپا 15 نەمەرە، 25 شوبەرە ءسۇيىپ، ۇلكەن اۋلەتتىڭ ارداقتى اناسىنا اينالدى. جۇبايى دا ۇزاق عۇمىر كەشىپ، 96 جاسىندا ومىردەن وتكەن.
وسىدان ەكى جىل بۇرىن بەرگەن سۇقباتىندا كەيۋانا باسىنان وتكەن كەزەڭدەردى ەسكە الىپ، ۇزاق جاساۋىنىڭ وزىندىك سىرىن اڭگىمەلەگەن ەدى.
عاسىردان اسقان عۇمىر يەسىنىڭ ايتۋىنشا، ۇزاق جاساۋىنىڭ باستى سەبەپتەرىنىڭ ءبىرى - وتباسىنىڭ ايالى الاقانى، كوڭىل تىنىشتىعى جانە ءومىر بويى ەڭبەكتەن قول ۇزبەۋى.
— جولداسىم ەكەۋمىز ۇزاق تا باقىتتى عۇمىر كەشتىك. ءتورت بالا تاربيەلەپ وسىردىك. قازىر بالالارىمنىڭ، نەمەرەلەرىم مەن شوبەرەلەرىمنىڭ ورتاسىندا، سولاردىڭ قامقورلىعىندامىن. بالالارىم ۇنەمى قۋانىشىمدى ەسەلەپ، ماعان قامقورلىق كورسەتىپ كەلەدى. ۇزاق جاساۋىما وسىنىڭ دا سەپتىگى تيگەن شىعار، — دەگەن ەدى تۇيمەگۇل اپا.
ول بالا كۇنىنەن ەڭبەككە ەتەنە ارالاسىپ وسكەن. اتا-اناسى جىلقى وسىرگەندىكتەن، كىشكەنتايىنان ءۇي شارۋاسىنا كومەكتەسىپ، بيە ساۋىپ، قىمىز اشىتقان، جىلقى كۇتىمىنە ارالاسقان. ەسەيگەن شاعىندا دا جۇبايىمەن بىرگە شارۋاشىلىقتىڭ بار اۋىرتپالىعىن ءبولىسىپ، قۇدىقتان سۋدى ءوزى تاسىپ، قارا جۇمىستان قاشپاعان.
كەيۋانانىڭ جۇرەگىنە جىلقىعا دەگەن ىقىلاسى دا ەرەكشە جاقىن بولعان. ول جاستايىنان اتقا مىنگەندى ۇناتقانىن، جاسى ۇلعايعان شاقتا دا مۇمكىندىگىنشە قيمىل-قوزعالىسىن شەكتەمەۋگە تىرىسقانىن ايتقان ەدى. تۇيمەگۇل اپانىڭ پايىمىنشا، ۇنەمى قوزعالىستا بولىپ، ەڭبەكتەن قول ۇزبەۋ ونىڭ بويىنداعى سەرگەكتىكتى ساقتاۋعا سەپ بولعان.
ۇلىتاۋ وبلىسىنىڭ اكىمدىگى تۇيمەگۇل تەمىربايەۆانىڭ دۇنيەدەن وتۋىنە بايلانىستى تۋعان-تۋىستارى مەن جاقىندارىنا كوڭىل ايتتى.
—- عاسىردان استام عۇمىر كەشىپ، تۇتاس ءبىر ءداۋىردىڭ كۋاسى بولعان قازاقستاننىڭ ەڭ قارت تۇرعىنى تۇيمەگۇل تەمىربايەۆانىڭ دۇنيەدەن وتۋىنە بايلانىستى تۋعان-تۋىستارىنا، جاقىندارى مەن بارشا وتباسى مۇشەلەرىنە قايعىرا كوڭىل ايتامىز. ۇزاق ءارى ونەگەلى عۇمىرىندا تۇيمەگۇل اپا 15 نەمەرە مەن 25 شوبەرە ءسۇيىپ، بىرنەشە ۇرپاقتىڭ ءوسىپ-جەتىلۋىنە كۋا بولدى. ءول وز اۋلەتىنىڭ اقىلشىسى، تىرەگى ءارى بەرەكەسى ەدى. تۇيمەگۇل اپا تەك وتباسىنىڭ اماندىعىن ويلاپ قانا قويماي، ەل ومىرىنە دە بەيجاي قاراماعان جان بولاتىن. مەملەكەت ءۇشىن ماڭىزدى وقيعالاردان تىس قالماي، قوعامداعى وزگەرىستەردى ءجىتى قاداعالاپ، ەل بولاشاعىنا ءاردايىم الاڭداپ وتىردى. عاسىردان استام عۇمىر كەشكەن انانىڭ ونەگەلى ءومىر جولى مەن جارقىن بەينەسى ۇرپاقتارىنىڭ جادىندا عانا ەمەس، ەلىمىزدىڭ تاريحىندا دا ساقتالاتىنىنا سەنىمدىمىز، - دەلىنگەن كوڭىل ايتۋدا.
