قازاقستاننىڭ جۇك تاسىمالدايتىن العاشقى Airbus ۇشاعى قاراشادا جەتكىزىلەدى
استانا. KAZINFORM - قازاقستاننىڭ ۇلتتىق جۇك تاسىمالداۋشىسى اۋە فلوتىن Airbus A340 ۇشاقتارىمەن تولىقتىرماق. العاشقى اۋە كەمەسى بيىل قاراشادا، ەكىنشىسى كەلەر جىلدىڭ ناۋرىز ايىندا جەتكىزىلەدى. بۇل تۋرالى ۇكىمەت وتىرىسىندا كولىك ۆيتسە-ءمينيسترى تالعات لاستايەۆ باياندادى.
ونىڭ ايتۋىنشا، «ەير كارگو» كومپانياسى اۋە كەمەلەرىن جەتكىزۋ جونىندە كەلىسىمشارتقا قول قويعان.
- بيىل قاراشا ايىندا العاشقى Airbus A340 اۋە كەمەسىنىڭ كەلۋى كۇتىلۋدە. ەكىنشى اۋە كەمەسىن جەتكىزۋ كەلەسى جىلدىڭ ناۋرىز ايىنا جوسپارلانعان. ناتيجەسىندە اۋە كەمەلەرىنىڭ جالپى سانى 10-عا جەتەدى، - دەدى كولىك ۆيتسە-ءمينيسترى.
كەشە ءوز جولداۋىندا پرەزيدەنت قاسىم-جومارت توقايەۆ «Air Cargo» جەكە كومپانياسىنا ۇلكەن ءۇمىت ارتىلعانىن ايتقان ەدى.
- ونىڭ قارجىلىق مۇمكىندىگى مول، سونىڭ ىشىندە شەتەلدىڭ جەتەكشى ماماندارىنىڭ ەڭبەكاقىسىن تولەۋگە دە قاۋقارلى. سونداي-اق كومپانيا دەربەس شەشىم قابىلداي الادى. ءبىراق ءالى كۇنگە دەيىن ناقتى شەشىم دە، ناتيجە دە جوق. سىزدەرگە سەنىم ارتتىق. ەندى ناقتى ناتيجە كۇتەمىز، - دەدى پرەزيدەنت.
ايتا كەتەيىك، قازاقستان اۆياتسياسى 2050 -جىلعا دەيىنگى دامۋ باعىتىن ايقىنداپ جاتىر.
