قازاقستاننىڭ حالىق اقىنى ءاسيا بەركەنوۆا دۇنيەدەن ءوتتى

استانا. KAZINFORM - قازاقستاننىڭ حالىق اقىنى ءاسيا بەركەنوۆا 77 جاسقا قاراعان شاعىندا دۇنيەدەن ءوتتى. قارالى حاباردى قۇرىلتاي دەپۋتاتى، اقىن جاناربەك ءاشىمجان جەتكىزدى.

Асия Беркенова
Фото: qumaragsagalov / Instagram

جاناربەك ءاشىمجان الەۋمەتتىك جەلىدەگى جازباسىندا اقىننىڭ ومىردەن ءوتۋى قازاق ونەرى مەن مادەنيەتى ءۇشىن اۋىر قازا ەكەنىن اتاپ ءوتىپ، مارقۇمنىڭ تۋعان-تۋىستارىنا، ارىپتەستەرى مەن شاكىرتتەرىنە كوڭىل ايتتى.

- قازاقستاننىڭ حالىق اقىنى، اياۋلى اپامىز ءاسيا بەركەنوۆا 77 جاسقا قاراعان شاعىندا دۇنيەدەن ءوتتى. وكىنىشتى… اللا ايگىلى تۇلعانىڭ يمانىن جولداس، الدىن پەيىش، ارتىن كەنىش قىلعاي. ءاسيا ايىپ قىزىمەن اتامۇرا ونەرىمىزدىڭ ءبۇتىن ءبىر ءداۋىرى كەتىپ بارادى… - دەپ جازدى جاناربەك ءاشىمجان.

سونداي-اق ول سانالى عۇمىرىن قازاق ونەرى مەن مادەنيەتىنە ارناعان اقىننىڭ جارقىن بەينەسى ەل جادىندا ماڭگى ساقتالاتىنىن جەتكىزدى.

- بارشا ارىپتەستەرىنە، اعايىن-تۋىستارىنا، شاكىرتتەرىنە، ارتىنداعى ەل-حالقىنا قايعىرىپ كوڭىل ايتامىز. بار عۇمىرىن قازاقتىڭ ونەرى مەن مادەنيەتىنە ارناعان اسىل جاننىڭ بەينەسى جانىمىز باردا جادىمىزدا ساقتالادى. باقۇل بولىڭىز، اپا… - دەدى ول.

اقىن III دارەجەلى «بارىس» جانە «قۇرمەت» وردەندەرىمەن ماراپاتتالعان.

اسيا ءايىپ قىزى بەرگەنوۆا 1950 -جىلى قوستاناي وبلىسى اۋليەكول اۋدانىندا تۋعان. ايتىس اقىنى. قازاقستاننىڭ حالىق اقىنى (1990). 

1972 -جىلى قازاق مەملەكەتتىك قىزدار پەداگوگيكا ۋنيۆەرسيتەتىن (بۇرىنعى قازاق قىزدار پەداگوگيكالىق ينستيتۋتى) بىتىرگەن. جوعارعى ءبىلىمدى پەداگوگ.

1972 - 1997 -جىلدارى ناۋرىزىم، اۋليەكول اۋداندارىندا مەكتەپتە مۇعالىم بولىپ ءجۇمىس ىستەگەن.

ءاسيا ءايىپ قىزى ايتىسقا وتكەن عاسىردىڭ 80- جىلدارىنان باستاپ قاتىسقان. الماتىدا 1984 -جىلى وتكەن كەنەن ازىربايەۆتىڭ 100 جىلدىعىنا ارنالعان رەسپۋبليكالىق ايتىستا ءبىرىنشى ورىندى جەڭىپ العان ول، بۇدان كەيىنگى جىلداردا تالاي مارتە رەسپۋبليكالىق ايتىستاردىڭ جەڭىمپازى بولدى. اسىرەسە، ابىلاي حاننىڭ 280 جىلدىعى، ءانشى مۇحيتتىڭ 150 جىلدىعى، قاجىمۇقان پالۋاننىڭ 120 جىلدىعى، شاقشاق ۇلى جانىبەك باتىردىڭ 300 جىلدىعى تويلارىندا ونىڭ ايتىستاعى دارا تالانتى جارقىراي كورىندى.