قازاقستاننىڭ تاريحي ورىندارىن يۋنەسكو- عا ەنگىزۋگە نە كەدەرگى
استانا. KAZINFORM - وتىرار، سىعاناق، كۇلتوبە-ياسسى، جانكەنت، ساۋران، جەتى اسار تاريحي ورىندارىن يۋنەسكو- نىڭ بۇكىلالەمدىك مۇرا تىزىمىنە ەنگىزۋ جۇمىستارى جالعاسۋدا. بۇل تۋرالى ق ر مادەنيەت جانە اقپارات ءمينيسترى ايدا بالايەۆا ايتىپ بەردى.
«بۇگىنگى تاڭدا ەلىمىزدە 12 مۋزەي- قورىق بار. قازىر تۋريزمنەن ءتۇسىپ وتىرعان پايدانىڭ قوماقتى ۇلەسى دە سول مۇراجاي-قورىقتاردىڭ ەنشىسىندە. دەسە دە، ءبىز وسى پوتەنتسيالدى ءالى دە تولىق پايدالانباي كەلەمىز. ءتىپتى، شەتەلدىكتەردى بىلاي قويعاندا، ولاردىڭ تابالدىرىعىن اتتاماعان قانشاما وتانداستارىمىز بار»، - دەدى ا.بالايەۆا قازمەديا ورتالىعىندا مينيسترلىكتىڭ القا وتىرىسىندا.
مينيسترلىك مۋزەي-قورىقتاردىڭ ۇلتتىق مارشرۋتىن مادەني-رۋحاني مازمۇنمەن كۇشەيتۋ ماسەلەسىن قولعا الماق. ول ءۇشىن ارنايى تۇجىرىمداما جاسالادى.
سونىمەن بىرگە، قازاقستانداعى تاريحي-مادەني نىسانداردى يۋنەسكو- نىڭ بۇكىلالەمدىك مۇرا تىزىمىنە ەنگىزۋ جۇمىستارى جالعاسۋدا.
«وسى ماقساتتا وتىرار، سىعاناق، كۇلتوبە-ياسسى، جانكەنت، ساۋران، جەتى اسار تاريحي ورىندارىنىڭ ءتيىستى قۇجاتتارى ازىرلەنگەن بولاتىن. بۇل جۇمىس وڭاي بولىپ جاتقان جوق، ويتكەنى، يۋنەسكو-نىڭ ەڭ ماڭىزدى تالاپتارىنىڭ ءبىرى - جادىگەردىڭ فيزيكالىق جاعدايى. ارينە، بىزگە جەرگىلىكتى ورگانداردىڭ كومەگى اۋاداي قاجەت، اسىرەسە مۋزەي-قورىقتار مەن تاريحي-مادەني وبەكتىلەر اۋماعىن اباتتاندىرۋ، جول جۇرگىزۋ، جوندەۋ، ەسكەرتكىشتەرگە اپاراتىن جول كورسەتكىشتەردى، ينتەرنەت جۇيەلەرىن، مودۋلدىك دارەتحانالار ورناتۋ سەكىلدى ينفراقۇرىلىمدى دامىتۋ نەمەسە ساپاسىن جاقسارتۋ بويىنشا بەلسەندى جۇمىستار جۇرگىزۋ كەرەك»، - دەدى مادەنيەت ءمينيسترى.
ا. بالايەۆا بۇل باستامانىڭ جەرگىلىكتى حالىق ءۇشىن ۇلكەن ەكونوميكالىق پايداسى بارىن ەستەن شىعارماۋدى ايتتى.
اۆتور
ايجان سەرىكجان قىزى
