قازاقستاننىڭ قىتايداعى ەلشىسى «شىڭجاڭنىڭ تاريحى مەن بولاشاعى» اتتى حالىقارالىق فورۋمعا قاتىستى
استانا. قازاقپارات - 2024 -جىلعى 12-ماۋسىم - قازاقستاننىڭ قىتايداعى ەلشىسى شاحرات نۇرىشيەۆ ق ح ر ۇلتتار ىستەرى جونىندەگى مەملەكەتتىك كوميتەتى مەن ق ح ر شىڭجاڭ-ۇيعىر اۆتونوميالىق ولكەسى حالىق ۇكىمەتىنىڭ شاقىرۋىمەن قاشقار قالاسىنا (ش ۇ ا ا) بارىپ، «شىڭجاڭنىڭ تاريحى مەن بولاشاعى» اتتى حالىقارالىق فورۋمعا قاتىستى.

ەلشى ءىس-شارانىڭ اشىلۋ سالتاناتىندا ءسوز سويلەپ، فورۋمعا قاتىسۋشىلاردى قازاقستان مەن قىتاي قاتىناستارىنىڭ جاي-كۇيى مەن دامۋ پەرسپەكتيۆالارى تۋرالى حاباردار ەتتى. ش. نۇرىشيەۆ قازاقستان مەن شىڭجاڭ اراسىنداعى سەرپىندى ىنتىماقتاستىققا ەرەكشە نازار اۋدارىپ، ش ۇ ا ا اۋماعىنداعى 1,6 ميلليون ەتنيكالىق قازاقتىڭ «التىن كوپىر» رەتىندە قازاقستان مەن قىتاي اراسىنداعى ەكىجاقتى ستراتەگيالىق ارىپتەستىكتى نىعايتۋعا قوسىپ وتىرعان ۇلەسىن اتاپ ءوتتى.
اتالعان ءىس-شاراعا ق ح ر ۇلتتار ىستەرى جونىندەگى مەملەكەتتىك كوميتەتىنىڭ ءتوراعاسى پان يۋە، ش ۇ ا ا حالىق ۇكىمەتىنىڭ ءتوراعاسى ەركين تۋنياز، بەيجىڭ ۋنيۆەرسيتەتى پارتكوم حاتشىسىنىڭ ورىنباسارى جيان گوحۋا، ورتالىق ۇلتتار ۋنيۆەرسيتەتى مەن قاشعار ۋنيۆەرسيتەتىنىڭ رەكتورلارى، سونداي-اق قازاقستان، وزبەكستان، قىتاي، اۆستراليا، مىسىر، گەرمانيا، ماجارستان، يتاليا، رەسەي، ا ق ش، موڭعوليا جانە ت. ب. 170-تەن استام ساراپشىلار مەن عالىمدار قاتىستى.
«شىڭجاڭنىڭ تاريحى مەن بولاشاعى» اتتى حالىقارالىق فورۋم ايماقتاعى ارحەولوگيالىق قازبا جۇمىستارىنىڭ ناتيجەلەرىنە، سونداي-اق شىڭجاڭ مادەنيەتى مەن تاريحىن جاقسى ءتۇسىنۋ ءۇشىن حالىقارالىق الماسۋلار مەن بىرلەسكەن زەرتتەۋلەرگە ىقپال ەتۋگە باعىتتالعان.
ساپار بارىسىندا قازاقستاندىق دەلەگاتسيا «قاشعار پاركى» ەكونوميكالىق دامۋ ايماعىنا بارىپ، ءوڭىردىڭ ساۋدا- ەكونوميكالىق الەۋەتىمەن جانە شەكارالاس ەلدەرمەن ءجۇرىپ جاتقان ساۋدا جوبالارىمەن تانىسىپ، قازاقستانمەن ىنتىماقتاستىقتى دامىتۋ پەرسپەكتيۆالارىن تالقىلادى.
قاشقاردىڭ ەكونوميكالىق دامۋ ايماعىندا 4 مىڭنان استام تىركەلگەن كاسىپورىن، ونىڭ ىشىندە 250-دەن استام سىرتقى ساۋدا كاسىپورىندارى بار. قاشقار اۋدانى شىڭجاڭنىڭ سىرتقى ساۋداسىندا ماڭىزدى ورىن الادى، 2023 ج. قورىتىندىسى بويىنشا ونىڭ ش ۇ ا ا يمپورتى مەن ەكسپورتىنداعى جالپى ۇلەسى %23,4 قۇرادى.