قازاقستاننىڭ ەڭبەك ەرى يليا جاقانوۆ ستۋدەنتتەرمەن بىرگە بوگەت سالۋعا قاتىستى

اتىراۋ. KAZINFORM - بەلگىلى كومپوزيتور، قازاقستاننىڭ ەڭبەك ەرى يليا جاقانوۆ ستۋدەنتتەرمەن بىرگە بوگەت سالۋعا قاتىستى.

وبلىستىق جەدەل شتابتىڭ مالىمەتىنشە، جايىق وزەنىنىڭ جاعالاۋىنداعى وسال تۇستاردى بەكىتۋگە كاسىپورىندار مەن مەكەمەلەر بەكىتىلگەن. ماسەلەن، ح. دوسمۇحامەدوۆ اتىنداعى اتىراۋ ۋنيۆەرسيتەتىنىڭ ۇستازدارى مەن ستۋدەنتتەرى المالى اۋىلىندا بوگەت سالۋعا كىرىسكەن.

بۇگىن، 9-ساۋىردە قازاقستان جانە قىرعىزستان رەسپۋبليكالارىنىڭ ەڭبەك سىڭىرگەن قايراتكەرى، كومپوزيتور، قازاقستاننىڭ ەڭبەك ەرى يليا جاقانوۆ المالى اۋىلىنا ارنايى باردى. ونەر قايراتكەرى ۋنيۆەرسيتەت وقىتۋشىلارىمەن، ستۋدەنتتەرىمەن بىرگە قاپشىققا توپىراق تولتىرىپ، بوگەت سالۋ جۇمىسىنا ۇلەسىن قوستى.

«اتىراۋ وبلىسىندا تابيعي سيپاتتاعى توتەنشە جاعداي جاريالانعالى بەرى جايىق وزەنىنىڭ جاعاسىن بەكىتۋ قارقىن الدى. تىرشىلىك ءنارى - جايىعىمىز ارناسى اسپاسا ەكەن، ەل قيىندىققا تاپ بولماسىن دەپ تىلەيمىن. قازىر سۋ تاسقىنى اتىراۋ وبلىسىنا عانا ەمەس، بىرنەشە وڭىرگە قاۋىپ ءتوندىردى. سول سەبەپتەن، بوگەت سالىپ جاتقان جاستاردى قولداۋعا كەلدىم. ەلىمىزدى قيىندىقتان بىرلىگىمىزبەن عانا قورعاي الامىز»، - دەدى يليا جاقانوۆ.

ونەر قايراتكەرىنىڭ ايتۋىنشا، تابيعي اپات سيپاتىنداعى قيىندىقتى جەڭۋگە بولادى.

«بۇل ءۇشىن بىرىنشىدەن، نيەت ءتۇزۋ، تازا بولۋى كەرەك. ەكىنشىدەن، نيەتتى قۇدىرەتتى كۇش بىرىكتىرۋى ءتيىس. ۇشىنشىدەن، مىقتى ءتارتىپ قاجەت. ءتارتىپ ساقتالسا، ەلدىڭ بىرلىگى، تۇتاستىعى نىعايا تۇسەدى. پرەزيدەنت قاسىم- جومارت توقايەۆ وسىنداي كەزدە شىدامدىلىق پەن ۇيىمشىلدىق ەلدى قيىندىقتان الىپ شىعاتىنىن ايتتى. بىرلىگىمىزبەن بار قيىندىقتى ەڭسەرەمىز»، - دەدى يليا جاقانوۆ.

ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ وقىتۋشى-پروفەسسورلار قۇرامى مەن ستۋدەنتتەرى ءۇش اۋىسىممەن جۇمىس ىستەيدى. ولار ءۇش كۇندە 20 مىڭنان استام قاپقا توپىراق تولتىرعان.

ەسكە سالا كەتەلىك، بۇدان بۇرىن اتىراۋ وبلىسىندا توتەنشە جاعداي جاريالاندى.

اتىراۋ وبلىسىنىڭ اكىمى سەرىك شاپكەنوۆ تۇرعىندار ومىرىنە قاۋىپ تونسە، الدىن الا حابارلاناتىنىن ايتتى.

كەيىن جايىق وزەنىنىڭ سۋى اتىراۋ قالاسىنا قاي تۇستان كىرۋى مۇمكىن ەكەنىن حابارلاعان بولاتىنبىز.

سونداي-اق، اتىراۋ تۇرعىندارى تاسقىن سۋعا قارسى بوگەت تۇرعىزۋعا جۇدىرىقتاي جۇمىلدى.

اۆتور

جولداسبەك شوپەعۇل