قازاقستاننىڭ التى ۋنيۆەرسيتەتى لوندوندا عىلىمي جەتىستىكتەرىن تانىستىردى
استانا. قازاقپارات – ق ر عىلىم جانە جوعارى ءبىلىم مينيسترلىگى 22-24-قاڭتار ارالىعىندا ۇلى بريتانيانىڭ لوندون قالاسىندا Bett Show كورمەسى ءوتىپ جاتىر.

قازاقستان زاماناۋي ءبىلىم بەرۋ تەحنولوگيالارىنا ارنالعان اۋقىمدى كورمەگە العاش رەت ۇلتتىق پاۆيلون رەتىندە قاتىسىپ جاتىر. كورمەدە ەلىمىزدىڭ التى جەتەكشى ۋنيۆەرسيتەتى قاتىسىپ، وزدەرىنىڭ بىرەگەي جوبالارى مەن ازىرلەمەلەرىن ۇسىنىپ وتىر.
- Nazarbayev University الەمدىك جەتەكشى EdTech كورمەسىندە Soyle App، قازاق ءتىلىنىڭ ۇلكەن تىلدىك مودەلى ISSAI KAZ- LLM جانە Artisan Education ستارتاپىن تانىستىردى. Soyle App كوپ فۋنكسيالى قولدانبا ءسوزدى تانۋ، داۋىس سينتەزى جانە اۋىزشا ءسوز بەن ءماتىندى ءتورت تىلگە (قازاقشا، ورىسشا، اعىلشىنشا، تۇرىكشە) اۋدارۋ مۇمكىندىكتەرىن ۇسىنادى. Soyle App قولدانباسىنىڭ اۋدارما ساپاسى FLoRes دەرەكتەر جيىنىنداعى BLEU كورسەتكىشتەرى ارقىلى ولشەنىپ، Google Translate, Yandex Translate جانە GPT-4o- ءدىڭ اۋدارما ناتيجەلەرىنەن اسىپ تۇسەدى.
GPT چاتىنىڭ قازاقشا نۇسقاسىن ازىرلەۋگە نەگىز بولاتىن KAZ- LLM بارلىق جەردە - قازاق تىلىندەگى اۋدارمالار مەن مازمۇندى گەنەراتسيالاۋدان باستاپ ۇلكەن ماتىندەردى وڭدەۋگە دەيىن پايدالانۋعا بولادى.
- اتالمىش كورمەگە ءال-فارابي اتىنداعى قازاق ۇلتتىق ۋنيۆەرسيتەتى سوڭعى جەتىستىكتەرى مەن يننوۆاتسيالىق جوبالارىن ۇسىنىپ وتىر. ولار: Faraby سۋپەركومپيۋتەر ورتالىعى، Farabi Robotics - ورتالىق ازياداعى ءبىرىنشى ونەركاسىپتىك روبوتوتەحنيكا جانە قۇزىرەتتىلىك ورتالىعى، ۋنيۆەرسيتەتتىڭ ا ت- ينفراقۇرىلىمى، جاپپاي اشىق ونلاين كۋرستاردى جازۋ ستۋدياسى، ۆيرتۋالدى زەرتحانالىق جۇمىستار.
Faraby سۋپەركومپيۋتەر ورتالىعىندا الەمدەگى ەڭ ۇزدىك 600 سۋپەركومپيۋتەر تىزىمىنە كىرەتىن ءىرى قوندىرعى ورناتىلعان. ال Farabi Robotics ماقساتى - ونەركاسىپتىك كاسىپورىندارعا قولدانبالى تاجىريبەنى وقشاۋلاۋ، ماسشتابتاۋ جانە يندۋستريا 4.0 سالالارىندا وقىتۋ ارقىلى الەمدىك دەڭگەيدەگى تەحنولوگيالاردى يگەرۋگە كومەكتەسۋ.
- ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى حالىقارالىق كورمەدە ءبىلىمنىڭ قولجەتىمدىلىگى مەن ساپاسىن ارتتىرۋعا باعىتتالعان يننوۆاتسيالاردى كورسەتەدى. سونىڭ ىشىندە ينكليۋزيۆتى نۇسقاۋلىق، جاپپاي اشىق ونلاين كۋرستار (MOOCs)، سونىڭ ىشىندە سۋردواۋدارماسى بار كۋرستار، بارلىق وقۋشىلارعا تەڭ مۇمكىندىكتەر بەرەدى، جاساندى ينتەللەكت سالاسىنداعى ازىرلەمەلەر: قازاق تىلىندە ەموتسيونالدى تۇردە ءدارىس وقيتىن اۆاتار، سۋردواۋدارماشى اۆاتارى.
ينكليۋزيۆتى نۇسقاۋلىق - ەرەكشە قاجەتتىلىكتەرى بار ستۋدەنتتەر ءۇشىن ۋنيۆەرسيتەت ينفراقۇرىلىمى مەن ءبىلىم بەرۋ رەسۋرستارىنىڭ قولجەتىمدىلىگىن جاقسارتۋعا ارنالعان شەشىم. Smart.ENU پلاتفورماسى - «اقىلدى كامپۋس» قۇرۋ ءۇشىن جاساندى ينتەللەكت ەلەمەنتتەرىن جانە زاتتار ينتەرنەتىن قامتيتىن ءبىلىم بەرۋ ۇدەرىسىن باسقارۋدىڭ ينتەگراتسيالانعان جۇيەسى.
- د. سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى BETT UK 2025 كورمەسىندە يننوۆاتسيالىق ءبىلىم بەرۋ باعدارلامالارىنا جانە قىتاي مەن قازاقستان اراسىنداعى ىنتىماقتاستىق اياسىندا قۇرىلعان «لۋ بان شەبەرحاناسى» اتتى ەرەكشە ءبىلىم بەرۋ جوباسىنا باسا نازار اۋداردى. بۇل جوبا ستۋدەنتتەر مەن وقىتۋشىلاردىڭ كاسىبي جانە ينجەنەرلىك داعدىلارىن دامىتۋعا، ءبىلىم بەرۋ ۇدەرىسىنە يننوۆاتسيالىق تەحنولوگيالاردى ەنگىزۋگە، ءداستۇرلى ينجەنەرلىك پاندەردى زاماناۋي سيفرلىق جانە اۆتوماتتاندىرىلعان تەحنولوگيالارمەن ۇيلەستىرۋگە باعىتتالعان.
- ق. ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى Digital SU جوباسى مەن جوعارى تەحنولوگيالىق MIT FabLab زەرتتەۋ ورتالىعىن ۇسىندى. Digital SU جوباسى - ءبىلىم بەرۋ پروتسەسىن اۆتوماتتاندىراتىن، ستۋدەنتتەر مەن وقىتۋشىلار اراسىنداعى بايلانىستى جاقسارتاتىن جانە تۇتاستاي ۋنيۆەرسيتەتتىڭ تيىمدىلىگىن ارتتىرۋعا كومەكتەسەتىن كەشەندى سيفرلىق ەكوجۇيە.
ال MIT FabLab - بۇل 3D پرينتەرلەرمەن، چپۋ ستانوكتارىمەن، جوبالاۋ جانە مودەلدەۋگە ارنالعان باعدارلامالىق قۇرالدارىمەن جابدىقتالعان زەرتحانا. مۇندا ستۋدەنتتەر ءوز عىلىمي جوبالارىن ازىرلەۋمەن قاتار، ساندىق ينجەنەر- كونسترۋكتور، ريەۆەرس- ينجەنەر جانە چپۋ ستانوكتارىنىڭ وپەراتورى ماماندىعىن مەڭگەرىپ شىعادى.
- سافي وتەبايەۆ اتىنداعى اتىراۋ مۇناي جانە گاز ۋنيۆەرسيتەتى ستۋدەنتتەرى مەن عالىمدارى كورمەدە «VR ۆيرتۋالدى كەن ورنى» تەحنولوگياسىن تانىستىردى. VR تەحنولوگيانىڭ كومەگىمەن ستۋدەنتتەر ۆيرتۋالدى ورتادا ءتۇرلى كەن ورىندارىن زەرتتەپ، تەوريالىق بىلىمدەرىن بەكىتە الادى. جوبانىڭ ارتىقشىلىعى - قاۋىپسىز ەكسپەريمەنتتىك ورتا، ۆيرتۋالدى ەكسكۋرسيالار، ينتەراكتيۆتى جانە يممەرسيۆتى وقۋ پروتسەسى.
Utebayev University اتالعان كورمەدە ءتۇرلى ەلدەردەن كەلگەن ءبىلىم بەرۋ جانە تەحنولوگيا سالاسىنىڭ ماماندارىمەن تانىسىپ، ىنتىماقتاستىق ورناتۋ ماقساتىندا ديالوگ جۇرگىزەدى.
BETT UK 2025 كورمەسىنە قاتىسۋ ۋنيۆەرسيتەتتىڭ جەتىستىكتەرىن كورسەتۋ الاڭى عانا ەمەس، سونداي-اق حالىقارالىق بايلانىستاردى نىعايتۋدا، ونىڭ ىشىندە بۇل حالىقارالىق پلاتفورمادا جوعارى ءبىلىم مەن كاسىپتىك باعدار بەرۋ جۇمىسىن جۇرگىزۋدەگى ماڭىزدى قادام بولدى. كورمەگە 600-دەن استام ەكسپونەنت جانە 300 سپيكەر قاتىستى، سونداي- اق 130-عا جۋىق مەملەكەت ءبىلىم بەرۋ بويىنشا ءوز ازىرلەمەلەرىن ۇسىندى، ال 600-دەن استام حالىقارالىق كومپانيالار، ونىڭ ىشىندە Google, Microsoft, Lenovo جانە ت. ب. قاتىسىپ جاتىر.