قازاقستاندىقتاردىڭ جەكە قۇجاتىنىڭ قاعاز كوشىرمەلەرىن جيناۋعا تىيىم سالىنادى

بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپاراتتىق قاۋىپسىزدىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

заң жобасы
Фото: "ҚазАқпарат" ХАА

زاڭ جوباسى اقپاراتتى، ونىڭ ىشىندە دەربەس دەرەكتەردى قورعاۋدىڭ قۇقىقتىق بازاسىن قالىپتاستىرۋعا ارنالعان.

«قۇجات ءۇش بلوكتان تۇرادى. ءبىرىنشى بلوك جەكە دەرەكتەردى قورعاۋدىڭ قوسىمشا شارالارىنا ارنالعان. زاڭ جوباسىندا دەربەس دەرەكتەردىڭ اينالىمى جانە ساقتالۋى سالاسىندا مەملەكەتتىك باقىلاۋ ەنگىزىلەدى. قۇجات نورماسى وپەراتورلارمەن پروفيلاكتيكالىق جۇمىستى دا جولعا قويۋعا مۇمكىندىك بەرەدى. سونىمەن قاتار زاڭ جوباسىنا سايكەس ءاربىر وپەراتور رەتتەۋشىگە دەربەس دەرەكتەردىڭ نەگىزسىز جاريالانىپ كەتكەنى تۋرالى حابارلاۋى ءتيىس. اقپاراتتىڭ جاريالانىپ كەتۋى دەرەگى انىقتالعان ساتتەن باستاپ ءۇش كۇن ىشىندە بەرىلۋى كەرەك»، - دەدى ءماجىلىس دەپۋتاتى ەكاتەرينا سمىشليايەۆا.

زاڭ جوباسىنىڭ ەكىنشى بلوگى «اق حاكەرلەر» ينستيتۋتىن جانە باك- باۋنتي پلاتفورماسىنىڭ قازاقستاندىق انالوگى جۇمىسىن قۇقىقتىق رەتتەۋدى ۇسىنادى. بۇل شارا اقپاراتتىق جۇيە زەرتتەۋشىلەرىن اقپاراتتىق جۇيە قاتەلىكتەرى مەن وسال تۇستارىن انىقتاۋعا تارتۋعا ىقپال ەتەدى. بارلىق جۇمىستار زاڭ اياسىندا جۇرگىزىلەدى. الەمدە مۇنداي پلاتفورمالار اقپاراتتىق قاۋىپسىزدىك بويىنشا ۇزدىك مامانداردى تارتادى.

«زاڭ جوباسىنىڭ ءۇشىنشى بلوگى مەملەكەتتىك ورگانداردىڭ اقپاراتتاندىرۋ وبەكتىلەرىنە عانا قىزمەت كورسەتەتىن مەملەكەتتىك اقپاراتتىق قاۋىپسىزدىك ورتالىعىن قۇرۋعا ارنالعان. قازىر 350-گە جۋىق مەملەكەتتىك اقپاراتتاندىرۋ نىسانى جۇمىس ىستەپ تۇر. ورتالىق ۇلتتىق قاۋىپسىزدىك كوميتەتىنىڭ مەملەكەتتىك تەحنيكالىق قىزمەتى جانىندا جۇمىس ىستەيتىن بولادى. بۇدان باسقا، مەملەكەتتىك تەحنيكالىق قىزمەت بازاسىندا باعدارلامالىق قامتاماسىز ەتۋدىڭ باستاپقى كودتارى رەپوزيتورييى قۇرىلاتىن بولادى. وندا ەلەكتروندىق ۇكىمەتتىڭ باعدارلامالىق ونىمدەرىنىڭ باستاپقى كودتارى ساقتالادى. بۇل ولاردىڭ نۇسقالارىن باسقارۋدى قامتاماسىز ەتەدى. وسىلايشا، ۇسىنىلىپ وتىرعان شارالار كەشەنى مەملەكەتتىك ورگانداردىڭ اقپاراتتىق جۇيەلەرىنىڭ قاۋىپسىزدىگىن كۇشەيتەدى. جالپى، ەلەكتروندىق ۇكىمەتتىڭ تۇراقتىلىعىن ارتتىرادى»، - دەدى دەپۋتات.

ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ مالىمەتىنە قاراعاندا، زاڭ جوباسىندا 12 زاڭنامالىق اكتىگە:

- «دەربەس دەرەكتەردىڭ قاۋىپسىزدىگىن بۇزۋ» ۇعىمىن ايقىنداۋ؛

- دەربەس دەرەكتەردى قورعاۋ سالاسىنداعى ۋاكىلەتتى ورگانعا قازاقستان رەسپۋبليكاسىنىڭ دەربەس دەرەكتەر جانە ولاردى قورعاۋ تۋرالى زاڭناماسىنىڭ ساقتالۋىن مەملەكەتتىك باقىلاۋ فۋنكتسياسىن بەرۋ؛

- قازاقستان رەسپۋبليكاسىنىڭ زاڭدارىندا تىكەلەي كوزدەلگەن جاعدايلاردى قوسپاعاندا، جەكە باسىن كۋالاندىراتىن قۇجاتتاردىڭ قاعاز كوشىرمەلەرىن جيناۋعا، وڭدەۋگە تىيىم سالۋ جونىندە وزگەرىستەر مەن تولىقتىرۋلار ەنگىزۋ كوزدەلەدى.

اۆتور

گۇلميرا الياكپاروۆا

سوڭعى جاڭالىقتار