قازاقستاندىقتارعا كرەديت بەرۋ: جاڭا زاڭ جوباسىنا قانداي وزگەرىستەر ەنگىزىلۋدە

پارلامەنت ءماجىلىسىنىڭ قاراۋىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەنگىزىلدى، دەپ حابارلايدى Kazinform.

بۇگىن ءماجىلىستىڭ جالپى وتىرىسىندا دەپۋتات تاتيانا ساۆەليەۆا بۇل قۇجات پارلامەنت دەپۋتاتتارىنىڭ باستاماسىمەن ازىرلەنگەنىن ايتتى.

زاڭ جوباسىندا نەسيەلەر بويىنشا مەرزىمى وتكەن بەرەشەگى بولعان جاعدايدا ازاماتتارعا جاڭا تۇتىنۋشىلىق نەسيەلەر بەرۋگە تىيىم سالۋ، 90 كۇن كەشىكتىرىلگەننەن كەيىن بارلىق نەسيە بويىنشا پايىزداردى ەسەپتەۋگە تىيىم سالۋ، سونداي- اق بانكتەر مەن ميكروقارجى ۇيىمدارىنىڭ كوللەكتورلىق اگەنتتىكتەرگە ازاماتتاردىڭ نەسيەلەرىن ساتۋىنا شەكتەۋ ەنگىزۋ قاراستىرىلعان.

مۇنىمەن قوسا، اتالعان قۇجاتتا ساتىپ العان قارىزداردى رەتتەۋگە قاتىستى كوللەكتورلىق اگەنتتىكتەردىڭ مىندەتىن ەنگىزۋ، قارجى نارىعىن رەتتەۋ جانە دامىتۋ اگەنتتىگى نورماتيۆتىك-قۇقىقتىق اكتىسىنە سايكەس بانك نەسيەسىنىڭ مەرزىمى مەن سوماسىنا جانە باسقا دا تالاپتارىنا شەكتەۋ بەلگىلەۋ ەسكەرىلگەن.

«جىلۋ بەرۋ ماۋسىمىندا (كۇزدە، قىستا) كامەلەتكە تولماعان بالالارى بار وتباسىلاردى جالعىز باسپاناسىنان شىعارۋعا تىيىم سالۋ نورماسى قاراستىرىلعان»، - دەدى ت. ساۆەليەۆا.

بۇدان بولەك، زاڭ جوباسىندا اسكەري قىزمەت وتكەرۋ كەزەڭىندە مەرزىمدى اسكەري قىزمەتشىلەرگە قارىزدار بويىنشا مىندەتتى كەيىنگە قالدىرۋ تالابى ەنگىزىلگەن.

سونىمەن قاتار زاڭ جوباسىندا ق ر قىلمىستىق كودەكسى مەن اكىمشىلىك قۇقىق بۇزۋشىلىق تۋرالى كودەكسىنە تۇزەتۋلەر كوزدەلگەن. بۇل رەتتە، جەكە دەرەكتەردى ساتۋ، ابونەنتتىك ءنومىردى اۋىستىرۋ جانە ابونەنتتىك ءنومىردى باسقا تۇلعالارعا زاڭسىز بەرگەنى ءۇشىن قىلمىستىق جانە اكىمشىلىك جاۋاپكەرشىلىكتى بەلگىلەۋ بولىگىندە وزگەرىستەر بولادى.

«دەپۋتاتتار باستاماشىلىق ەتكەن زاڭ جوباسى بويىنشا ۇكىمەتتىڭ قورىتىندىسى 2023 -جىلعى 12-قاراشادا كەلىپ تۇسكەن. باستامالاردىڭ باسىم بولىگى قولداۋ تاپتى. سونىمەن بىرگە، كەيبىر تۇجىرىمدامالىق ۇستانىمدار بويىنشا، ياعني كوللەكتورلىق كومپانيالارعا نەسيە ساتۋعا تىيىم سالۋ باعىتىندا ۇكىمەت بالامالى ۇستانىمىن جاريالادى. ونىمەن دەپۋتاتتار كەلىسپەي وتىر جانە وسى نورمانى ەنگىزۋ بويىنشا جۇمىس توپتارىندا جۇمىسىن جالعاستىرادى»، - دەدى دەپۋتات.

اۆتور

رۋسلان عابباسوۆ