قازاقستاندىقتار يپوتەكالىق نەسيەگە ءجيى جۇگىنەدى

استانا. KAZINFORM - قازاقستاندىقتار باسپانا الاردا يپوتەكالىق نەسيەگە ءجيى جۇگىنەدى. قاڭتار- قىركۇيەك ايلارىندا ەل بويىنشا 1,4 تريلليون تەڭگە سوماسىندا يپوتەكالىق قارىز بەرىلدى. بۇل بىلتىرعى 9 ايمەن سالىستىرعاندا 17 پايىزعا ارتىق.

مۇنىڭ ىشىندە 500 ميلليارد تەڭگەگە جۋىق نەسيە نارىقتىق شارتتارعا ساي بەرىلسە، ال جالپى قۇنى 876 ميلليارد تەڭگە بولاتىن نەسيەدە جەڭىلدىك قاراستىرىلعان. جالپى III توقساندا دا جەكە تۇلعالار تاراپىنان يپوتەكاعا سۇرانىس وسكەن.

ۇلتتىق بانكتىڭ مالىمەتىنە سۇيەنسەك، ءۇش ايدا نەسيە وتىنىمدەرىنىڭ سانى 31 پايىزعا ارتىپ، 274 مىڭعا جەتتى. ماماندار يپوتەكاعا سۇرانىستىڭ ارتۋىن مەملەكەتتىك باعدارلامالاردىڭ ىسكە قوسىلۋىمەن بايلانىستىرادى. ياعني بانكتەر مەملەكەتتىك باعدارلامالار اياسىندا قوسىمشا وتىنىمدەر قابىلداۋعا كىرىستى. جانە قۇرىلىس كومپانيالارىمەن تىعىز قارىم-قاتىناس ورناتتى. سونىمەن قاتار كەيبىر بانكتەردىڭ كەپىل تالاپتارىن قاتاڭداتۋى باسقا بانكتەردىڭ يپوتەكالىق ونىمدەرىنە سۇرانىستىڭ وسۋىنە اكەلدى. ال تۇرعىن ءۇي ساياساتىندا ەندى قولعا الىنعان رەفورما باسپانا باعاسىن قىمباتتادى دەپ قورقۋدىڭ قاجەتى جوق دەيدى ساراپشى.

لاريسا ستەپانەنكو، ساراپشى:

- بۇل وزگەرىس تۇرعىن ءۇي نارىعىنا ايتارلىقتاي اسەرىن تيگىزەدى دەپ ويلامايمىن. سەبەبى بۇدان سۇرانىس ارتپايدى. ۇيگە مۇقتاج ادامداردىڭ، ءۇي ساتىپ الۋعا شاماسى جەتەتىن ادامداردىڭ سانى وزگەرمەيدى، بۇرىنعىداي قالادى. ارينە ءۇي ساتۋشىلار، دەلدالدار بيلىكتىڭ مالىمدەمەسىن ءوز پايدالارىنا جاراتۋدى كوزدەپ، ءۇي باعاسىن قىمباتتاتۋعا تىرىسۋى مۇمكىن. ءبىراق ول دا ۇزاققا بارمايدى. نارىق ءوزىن- ءوزى رەتتەيدى. ءۇيدى قىمباتتاتقانمەن ونى ساتىپ الاتىن تۇتىنۋشى ءبارىبىر بولماعاندىقتان ۋاقىت وتە بۇرىنعى دەڭگەيىنە قايتا تۇسەدى.

يپوتەكالىق نەسيە (قاڭتار-قىركۇيەك، 2024 -جىل)

بارلىعى - ₸1,4 تريلليون

ءوسىم - %17

نارىقتىق شارتتارمەن - ₸498,2 ميلليارد

جەڭىلدەتىلگەن - ₸875,8 ميلليارد

زەينەتاقى جيناعىن باسپاناعا سالاتىندار كوبەيدى

سونىمەن قاتار زەينەتاقى جيناقتارىن تۇرعىن ۇيگە سالاتىندار كوبەيدى. ماسەلەن، قازان ايىندا 45 مىڭ ءوتىنىش قولداۋ تاپتى. بۇل - قىركۇيەكپەن سالىستىرعاندا 15 پايىزعا ارتىق. ماماندار ءوتىنىش بەرگەندەر سانىنىڭ كوبەيۋىن جيناقتاردى شەشۋگە تىيىم سالىنۋى مۇمكىن دەگەن قاۋەسەتتىڭ تارالۋىمەن بايلانىستىرىپ وتىر. بارلىعى 37 ميلليارد تەڭگە زەينەتاقى شوتىنان بانكتەرگە اۋدارىلدى. ءبىراق ماماننىڭ ايتۋىنشا، بۇل قارجى دا نارىقتاعى باعانىڭ كوتەرىلۋىنە اكەلمەيدى.

لاريسا ستەپانەنكو، ساراپشى:

- زەينەتاقى قورىنداعى جيناقتىڭ ءبىر بولىگىن شەشۋگە رۇقسات بەرىلگەندە تۇرعىن ءۇي نارىعىنداعى باعانىڭ كۇرت وسكەنىنە كۋا بولدىق. ارينە بۇل - بىرنەشە جىل بۇرىن بولعان جاعداي. كەيىن جەتكىلىكتىلىك شەگى كوتەرىلىپ، ازاماتتاردىڭ زەينەتاقى جيناقتارىن شەشۋ مۇمكىندىگى كەمىدى. قازىر دە جيناقتارىنىڭ ءبىر بولىگىن باسپاناعا سالىپ جاتقاندار بار. الايدا ول بۇرىنعىمەن سالىستىرعاندا وتە از. سوندىقتان زەينەتاقى جيناقتارى تۇرعىن ءۇي نارىعىنا اسەر ەتپەيدى.

جاڭا ۇيلەر ءسال قىمباتتادى

قازان ايىندا ەلدە ءۇيدى جالداۋ باعاسى ءوستى. سونداي-اق جاڭا ۇيلەر دە ازداپ قىمباتتادى. ال بۇرىن سالىنعان ۇيلەر باعاسى ءسال ارزاندادى. ۇلتتىق ستاتيستيكا بيۋروسىنىڭ مالىمەتى بويىنشا جاڭا ءۇيدىڭ باعاسى قىركۇيەكپەن سالىستىرعاندا 0,6 پايىزعا ءوستى. مۇندا 1 شارشى مەتر 497 مىڭ تەڭگەگە باعالاندى. قايتالاما نارىقتاعى ۇيلەر 0,4 پايىزعا ارزاندادى. ياعني ورتاشا باعا 1 شارشى مەترگە 509 مىڭ تەڭگەدەن كەلىپ وتىر.

ال باسپانانى جالداۋ اقىسى ءبىر ايدا 0,6 پايىزعا ءوسىپ، 1 شارشى مەتر 4,5 مىڭ تەڭگەگە دەيىن قىمباتتادى.

تۇرعىن ءۇي نارىعىنداعى باعا (1 شارشى مەتر)

جاڭا ءۇي - ₸497,3 مىڭ

قايتالاما نارىق - ₸509,4 مىڭ

جالداۋ اقىسى - ₸4,5 مىڭ

ەڭ قىمبات باسپانا الماتىدا

جارناما قوسىمشالارىنىڭ دەرەگى بويىنشا قىركۇيەك ايىندا اقتاۋ قالاسىندا ءۇي باعاسى ەرەكشە كوتەرىلدى. ماڭعىستاۋ وبلىسىنىڭ ورتالىعىندا ءبىر شارشى مەتر قۇنى ورتا ەسەپپەن 10 پايىزعا جۋىق ءوستى. ال ەڭ قىمبات باسپانا الماتىدا. مۇندا ءار شارشى مەتر 723 مىڭ تەڭگەگە باعالاندى. استانادا ءۇي ايتارلىقتاي ارزان، ءبىر شارشى مەتر 490 مىڭ تەڭگەگە ساتىلىپ جاتىر. ەلدەگى ءۇشىنشى مەگاپوليس شىمكەنتتە باسپانانىڭ ءار شارشىسى 417 مىڭ تەڭگە تۇرادى.

سونداي- اق العاشقى بەستىكتى اتىراۋ مەن وسكەمەن تۇيىندەيدى.

1 شارشى مەتر قۇنى الماتى - ₸723000

استانا - ₸490000

شىمكەنت - ₸417000

اتىراۋ - ₸390000

وسكەمەن - ₸382000

24.kz